وبلىس اكىمدىگى Telegram قوسىمشاسىندا چات-ارنا اشتى. ونندا بارلىق دەڭگەيدەگى اكىمدەر، باسقارمالار مەن كوممۋنالدىق مەكەمەلەردىڭ باسشىلارى تۇرعىنداردىڭ سۇراقتارىنا تىكەلەي جاۋاپ بەرەدى.

ورتالىق كوممۋنيكاسيالار قىزمەتىندە اتىراۋ وبلىسىنىڭ اكىمى نۇرلان نوعايەۆتىڭ قاتىسۋىمەن وتكەن بريفينگ بارىسىندا جۋرناليستەردى جەرگىلىكتى اتقارۋشى ورگانداردىڭ تۇرعىندارمەن ءوزارا ارەكەتتەستىگى تۋرالى ماسەلە قىزىقتىردى.

اكىمدىكتەردىڭ تۇرعىندارمەن كەرى بايلانىسىنىڭ ۇتىمدى تاسىلدەرىنىڭ ءبىرى – الەۋمەتتىك جەلىلەر. مۇندا ءاربىر ازامات ءوزىن قىزىقتىراتىن سۇراقتارىن قويا الادى. سونىمەن بىرگە وبلىس اكىمىنىڭ تۇرعىنداردى جەكە قابىلداۋى كەزىندەگى قارىم-قاتىناسى كوپتەگەن ماسەلەردى شەشۋگە ىقپال ەتەدى.

–جەرگىلىكتى اتقارۋشى ورگاندار تۇرعىندارمەن كەرى بايلانىس مەحانيزمدەرىن جولعا قويۋ باعىتىندا اۋقىمدى جۇمىستار اتقارۋدا. ەگەر جەكە قابىلداۋلار تۋرالى ايتاتىن بولساق، 2017 جىلى ءوڭىر تۇرعىندارىمەن 40-تان اسا جەكە قابىلداۋ وتكىزدىم، - دەدى نۇرلان نوعايەۆ.

400-دەن استام ادام وبلىس اكىمىنە ءارتۇرلى سۇراقتارى مەن ۇسىنىستارىن بىلدىرگەن. سونىمەن قاتار مەملەكەتتىك ورگانداردىڭ تۇرعىندارمەن ءوزارا قارىم-قاتىناس مەحانيزمىن جاقسارتۋ باعىتىندا جۇمىستار اتقارىلىپ جاتىر. قازىرگى تاڭدا چات-ارنادا 3100 پايدالانۋشى بار، 1500 سۇراق قارالدى.

بۇعان قوسا، وبلىس اكىمى وبلىس ورتالىعىندا وسىنداي پرينسيپپەن جۇمىس جاسايتىن «اتىراۋ سيفرلىق قابىلداۋ» ءموبيلدى قوسىمشاسى قولدانىلاتىنىن دا ايتىپ ءوتتى. مۇندا 3162 پايدالانۋشى تىركەلگەن، بۇگىنگى كۇنگە 600-دەن استام سۇراق قارالدى.

–ءوزى ءۇشىن ماڭىزدى سۇراقپەن حابارلاسقان ءاربىر پايدالانۋشى بارلىق قاجەتتى اقپاراتتى الا الادى. جەرگىلىكتى اتقارۋشى ورگاندار تۇرعىنداردىڭ بارلىق ساۋالدارىنا جەدەل ءارى ساپالى جاۋاپ بەرۋ ءۇشىن كەرى بايلانىستىڭ جاڭا مەحانيزمدەرىن ەنگىزۋ بويىنشا تۇراقتى جۇمىستار جۇرگىزۋدە. «سيفرلى قازاقستان» مەملەكەتتىك باعدارلاماسىن ىسكە اسىرۋ اياسىندا ونلاين قۇرالدارعا ەرەكشە باسىمدىق بەرۋدەمىز،- دەپ ناقتىلاپ ءوتتى نۇرلان نوعايەۆ.