استانا مەديسينا ۋنيۆەرسيتەتىنىڭ 117 ستۋدەنتى جالعان IELTS سەرتيفيكاتىن ساتىپ العانى ءۇشىن ولاردى وقۋدان شىعارۋ تۋرالى شەشىم قابىلدانعان، دەپ حابارلايدى Qamshy.kz اقپارات اگەنتتىگى.
ق ر ءبىلىم جانە عىلىم ءمينيسترى ەرلان ساعادييەۆ استانا مەديسينا ۋنيۆەرسيتەتىندەگى شۋعا قاتىستى ءوز پىكىرىن ءبىلدىردى.
«بىلتىر ءبىز استانا مەديسينا ۋنيۆەرسيتەتىنىڭ جۇمىسىن تەكسەرىپ، جالعان IELTS سەرتيفيكاتتارىن ساتىپ العان ستۋدەنتتەردى وقۋدان شىعارۋ بويىنشا تاپسىرما بەردىك. بۇل نۇسقاما ءىشىنارا ورىندالدى. ستۋدەنتتەردىڭ ءبىر بولىگى وزدەرىنىڭ قۇقىقتارىن قورعاۋ ءۇشىن سوتقا جۇگىندى. نۇسقاما ورىندالۋى ءتيىس. ستۋدەنتتەردى وقۋدان شىعارۋىن دۇرىس شەشىم دەپ سانايمىز»، - دەدى ساعادييەۆ.
ق ر ءبىلىم جانە عىلىم مينيسترلىگى دەنساۋلىق ساقتاۋ مينيسترلىگىمەن جانە ۋنيۆەرسيتەتپەن بىرىگىپ كوميسسيا قۇرماقشى. مينيستر وقۋ ورنى مەن ستۋدەنتتەرگە قاتىستى قانداي قۇقىقتىق قادامدار قابىلداۋ كەرەكتىگىن تالقىلاۋ ماڭىزدى ەكەنىن ايتادى.
الداعى ۋاقىتتا اتالمىش ماسەلە بويىنشا باسقا دا وقۋ ورىندارى تەكسەرىلەدى. ال ستۋدەنتتەر تاراپىنان جالعان IELTS سەرتيفيكاتتارىن الۋى فاكتىسى بويىنشا قۇقىق قورعاۋ ورگاندارى تەكسەرۋ جۇمىستارىن جۇرگىزىپ جاتىر.
ايتا كەتەيىك، بىلتىر IELTS-تى ءوز بىلىمىمەن تاپسىرعاندار شاعىم تۇسىرگەن. سونىڭ ناتيجەسىندە اعىلشىن ءتىلى ەمتيحانى بويىنشا 117 تىركەلمەگەن سەرتيفيكات انىقتالدى.
پىكىر قالدىرۋ