ەلباسىمىز نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا «نۇرلى جول-بولاشاققا باستار جول» وبلىستىق ونەر فەستيۆالى شاردارا قالاسىندا ءوتتى، دەپ حابارلايدى Qamshy.kz اقپارات اگەنتتىگى.

شارا «مادەني مۇرا» باعدارلاماسى اياسىندا ۇزىن اتا كەسەنەسىنە زيارات جاساپ، تاريحىمەن تانىسۋدان باستالدى. XIV-XV عاسىرلارعا ءتان تاريحي نىسان قازاقستاننىڭ كيەلى جەرلەرى تىزىمىنە ەنگەن.

«ءدىني ءىلىمدى جالعاستىرۋشى، ەلگە ىزگىلىك پەن ادالدىقتىڭ نۇرىن سەبۋشى ۇستازدىق، اۋليەلىك قاسيەتىمەن اڭىزعا اينالعان ۇزىن اتا داڭقىنا باس ءيىپ، ارنايى قۇران باعىشتاپ كەلۋشىلەردىڭ قاراسى مول»، - دەدى «شەجىرەلى شاردارا» اۋداندىق ولكەتانۋ مۇراجايى ديرەكتورىنىڭ ورىنباسارى ن.سەيدۋللايەۆ.

كەسەنە اۋماعىن اباتتاندىرۋ جۇمىستارى دا ەرەكشە قولعا الىنعان.

فەستيۆال شاردارا قالاسىنداعى اباي الاڭىندا جوعارعى جانە ورتا ارناۋلى وقۋ ورىندارىنداعى قولونەر شەبەرلەرىنىڭ ۇيىرمەسى مەن كىتاپ كورمەسى، «بولاشاققا باعدار: رۋحاني جاڭعىرۋ» فلەشموبىمەن جالعاسىپ، اباي ەسكەرتكىشىنە گۇل شوقتارى قويىلدى.

سونىمەن قاتار، شاردارا اۋداندىق مادەنيەت جانە تىلدەردى دامىتۋ بولىمىنە قاراستى 9 اۋىلدىق مادەنيەت ءۇيىنىڭ مەڭگەرۋشىلەرى اتقارعان جۇمىستارى مەن الداعى جوسپارى، حالىقپەن مادەني بايلانىسى جونىندە ەسەپ بەرىپ، اقساقالدى قاريالار مەن اق جاۋلىقتى انالاردىڭ قاتىسۋىمەن «ساۋمالىق» جانە باتا بەرۋ سالت-داستۇرلەرىن كورسەتتى.

بۇعان قوسا، 80-گە جۋىق تۋىندىلارى تۋعان جەر مەن تابيعات، تاريحي ساتتەرى ءتۇرلى-تۇستى بوياۋلارمەن  سىر شەرتكەن قىلقالام شەبەرى ايداربەكوۆ تەمىرالى وسەر ۇلىنىڭ «رۋحاني جاڭعىرۋ» اتتى تۋىندىلار بۇرىشتاماسى دا ءوز ەرەكشەلىگىن بايقاتتى.

اۋدانداعى مادەنيەت ۇيلەرى مەن كلۋب ۇيىرمەلەرى ونەرپازدارىنىڭ گالا-كونسەرتىندە حالىق شىعارماشىلىعىنىڭ ءان، بي، كۇي، حور، سيرك، دراما سىندى 18 جانرىنان ونەر كورسەتكەن شاردارالىقتاردىڭ مادەني كۇنى باسپا ءسوز كونفەرەنسياسىمەن قورىتىندىلاندى.

ايتا كەتسەك، شاردارا اۋدانىنداعى مادەنيەت ۇيلەرىنەن اشىلعان 46 ۇيىرمەدە 1400-دەي قاتىسۋشى ءدارىس السا، ولاردىڭ ىشىندە 30-40 جاس ارالىعىنداعى قاتىسۋشىلار دا بار.