الماتى نارىعىندا كونترافاكتىلىك تاۋارلار ازايماي تۇر. ساۋدانىڭ قىر-سىرىن بىلەتىن پىسىقايلار حالىق كۇندەلىكتى تۇتىناتىن ازىق-تۇلىكتەن باستاپ، ءتىپتى، دارى-دارمەكتى دە قولدان جاساپ، تانىمال تاۋار بەلگىسىنىڭ اتىمەن ساتۋدا. ماسەلەن، جوتەلگە قارسى «مۋكالتين» پرەپاراتىنىڭ كوشىرمەلەرىن قالاداعى ەكى ءدارىحانا اشىق ساۋدالاعان. سويتسە، الگى دارىلەرگە كۇماندى قوسپالار قوسىلعان ەكەن. جالعان ءونىمدى اشكەرەلەگەن ادىلەت دەپارتامەنتىنىڭ ماماندارى  باراحولكاداعى ساۋدا نۇكتەسىن دە ءسۇزىپ شىقتى.

كاسىپكەر كەلىنشەك مەرەيگۇلدىڭ باراحولكاداعى بۇل نۇكتەنى جالعا الىپ، سومكە ساتقانىنا 3 جىلعا جۋىقتاپتى. سورەدە سامساعان تاۋارلار اراسىندا قىز-كەلىنشەكتەردىڭ جوعارى سۇرانىسىنا يە بولعان تانىمال برەندتى سومكەلەر دە بار. ادىلەت دەپارتامەنتى وكىلدەرىنىڭ نازارىن اۋدارعانى دا وسى تاۋارلار. ويتكەنى، مەكەمەگە بىرنەشە الەمدىك برەندتتىڭ وكىلدەرى حات جازىپ، بۇل ساۋدا نۇكتەسىندە تانىمال تاۋار بەلگىسىنىڭ اتىمەن شىعارىلعان جاساندى سومكەلەر ەمىن-ەركىن ساتىلىپ جاتقانىنا شاعىمدانعان. ماماندار كوپ كىدىرمەي، سورەدەگى تاۋارلاردى تاركىلەۋگە كىرىستى.

«بازاردان ءار-ار جەردەن الىپ وسىلاي ساتامىز. ەندى جالعىز تەك ماعان تەكسەرىس كەلىپ جاتىر. ول جاعىن بىلەمىن. ەندى زاڭدى تۇردە تەكسەرىس بولعاندىقتان مەن وعان قارسى شىعا المايمىن»، - دەدى كاسىپكەر مەرەيگۇل جۇماحان.

تەكسەرۋشىلەر تانىمال تاۋار بەلگىسىنىڭ اتىمەن جاسالعان 42 سومكەنى تاركىلەپ اكەتتى. بۇعان ىشتەي قىنجىلعان كاسىپكەر كەلىنشەك بازارداعى تاۋارلاردىڭ بارلىعى دەرلىك جالعان جولمەن جاسالعانىن العا تارتتى. ال قۇزىرلى مەكەمە ماماندارى تەكسەرىستى تەك شاعىم تۇسكەن ورىندارعا عانا جۇرگىزەتىنىن جەتكىزدى. ماسەلەن، وتكەن جىلى الماتىدا 3 ميلليون تەڭگە كولەمىندەگى 2 مىڭنان استام كونترافاكتىلى ءونىم تاركىلەنىپ، كاسىپكەرلەرگە دە ايىپپۇل سالىنعان.

«بۇل ساۋدا نۇكتەسىندە جالعان ونىمدەر ساتىلىپ جاتقانى تۋرالى اقپارات بىزگە مەنشىك قۇقىعى يەسىنەن ءتۇستى. ءبىز بىردەن شاعىمدى ادىلەت دەپارتامەنتىنە جولداپ، ونىمدەردى تاركىلەتتىك. كونترافاكتىلىك ءونىمدى ساتۋ ەڭ الدىمەن كومپانيانىڭ بەدەلىنە زيان كەلتىرەدى. ويتكەنى، ەكسكليۋزيۆتى تاۋارلاردى الۋعا اسىعاتىن تۇراقتى تۇتىنۋشىلارى بار. سوندىقتان كومپانيا ءوز كليەنتتەرىن قورعايدى»، - دەدى مەنشىك قۇقىعى بار كومپانيانىڭ زاڭگەرى جانات نۇرماعامبەتوۆ.

ءقازىر اسىرەسە كولىك بولشەكتەرىن، برەند ماركالى كيىمدەر مەن سومكەلەردى، تۇرمىستىق حيميا جانە ازىق-تۇلىك ونىمدەرىن قولدان جاسايتىندار كوبەيىپ كەتكەن. ءتىپتى، دارى-دارمەكتى دە تانىمال تاۋار بەلگىسىنىڭ اتىن جامىلىپ ساتۋ ەتەك جايعان. 

«2017 جىلى الماتى قالاسى بويىنشا 2 جەكە كاسىپكەرگە قاتىستى وسى «مۋكالتين» دارى-دارمەك تاۋار تاڭباسىن زاڭسىز پايدالانۋ بويىنشا جوسپاردان تىس تەكسەرىس جۇرگىزىلگەن بولاتىن. تەكسەرىس بارىسىندا 100-دەن اسا «مۋكالتين» دارى-دارمەگى تاركىلەندى. ءبىرىنشى سۋبەكتىدەن 60-قا جۋىق، ەكىنشى سۋبەكتىدەن 40-قا جۋىق تاركىلەنىپ، 158-باپ بويىنشا اكىمشىلىك ءىس قوزعالىپ، ولارعا ايىپپۇل سالىنعان بولاتىن»، - دەدى الماتى قالاسى ادىلەت دەپارتامەنتىنىڭ زياتكەرلىك مەنشىك قۇقىقتارى ءبولىمىنىڭ مامانى گۇلناز وڭعاربايەۆا.

ايىپپۇلدارعا قاراماستان، نارىقتاعى زاڭسىز تاۋارلارعا توسقاۋىل قويۋ مۇمكىن بولماي تۇر. 2015 جىلدان بىلتىرعا دەيىن الماتى قالاسىندا 43 مىڭ دانا كونترافاكتىلىك تاۋار تاركىلەنىپ، ساتىلىمنان شىعارىلعان. ماماندار تۇتىنۋشىلارعا ءونىمدى ساتىپ الماس بۇرىن، زاتتاڭباسىنا مۇقيات زەر سالۋعا كەڭەس بەرەدى. ويتكەنى، زاڭسىز جولمەن قولدان جاسالعان تاۋار دەنساۋلىققا ءقاۋىپتى بولۋى مۇمكىن.