بيىل ماقتارال اۋدانىندا 10 مىڭ گەكتارعا جەرگە جۇگەرى داقىلى ەگىلەتىن بولادى. قايتا وڭدەگەن جاعدايدا 25 ءتۇرلى ءونىم الۋعا بولاتىن داقىلدى ءازىردىڭ وزىندە بىرنەشە شارۋا قوجالىعى ەكسپەريمەنت رەتىندە ەگىپ كورمەك. سونداي-اق، اۋداندا الداعى 1-2 جىلدا قۇس فەرمالارىن كوبەيتۋ جوسپارلانىپ وتىر.

بۇدان بولەك، اۋداندا ماقتا شيكىزاتىن تەرەڭ وڭدەۋ ءىسى جاندانا تۇسپەك. ناقتىراق ايتساق، اق التىننان ءجىپ ءيىرۋ، توقىما ونىمدەرىن دايارلايتىن ءىرىلى-ۇساقتى سەحتار سالۋ كوزدەلىپ وتىر. بۇل تۋرالى «حامرو اتا» شارۋا قوجالىعىنىڭ تىنىس-تىرشىلىگىمەن تانىسقان اۋدان اكىمى جامانتاي بەيسەنبايەۆ ءمالىم ەتتى.

اۋدان اكىمى الدىمەن اتالعان قوجالىقتىڭ ماقتا وڭدەۋ زاۋىتىنا ات باسىن بۇردى. مۇندا ءقازىر ماقتا ەگۋ ناۋقانىنا قاجەتتى تۇقىمدىق شيت ازىرلەۋ جانە شيتپەن شارۋالاردى قامتاماسىز ەتۋ جۇمىستارى جالعاسۋدا. مۇنان بولەك، اتالعان شارۋا قوجالىقتىڭ يەلەگىندە 7 گەكتار جىلىجاي بار. وندا بيىل 5،5 گەكتار قىزاناق پەن 1،5 گەكتار جەرگە كوكتەمگى داقىلداردىڭ بىرنەشە ءتۇرى ەگىلگەن.

قىزاناق جىلىجايىن ارالاپ كورگەن اۋدان اكىمى انار باعىنىڭ بۇگىنگى جاي-كۇيىن دە سۇراستىردى. سونداي-اق، اۋداندىق تاجىك مادەني ورتالىعىنىڭ ءتوراعاسىنا قوستاناي وبلىسىنا جەر يگەرۋ ناۋقانىنا ەرىكتى جۇمىسسىز جاستاردى تارتۋ ماسەلەسىن جۇكتەدى. ناقتىراق ايتساق، تانىمال كاسىپكەر باحارادين ابلازيموۆتىڭ يەلىگىندەگى 950 مىڭ گەكتار بيداي ەگىستىگىن يگەرۋگە جۇمىس كۇشى قاجەت بولىپ جاتىر ەكەن. مەسەنات قوستاناي وڭىرىنە قاجەتتى جۇمىسشىلاردى ماقتارالدان كوپتەپ تارتۋدى جوسپارلاپ وتىرعان كورىنەدى. ەگەر، سوندا جۇمىس ىستەيمىن دەۋشىلەر تابىلىپ جاتسا، باسپانا الىپ بەرىپ، تۇراقتى جۇمىسپەن قامتىماق.

وسى رەتتە، اۋدان اكىمى جاز ايلارىندا ەرىكتى توپتى قوستاناي وڭىرىنە ارنايى جىبەرەتىندىگىن ءمالىم ەتتى.