«اتاكەنت» ورنالاسقان اۋماق قالا مەنشىگىنە قايتارىلماق.
الماتىداعى «اتاكەنت» كەشەنىنىڭ جەرى قالانىڭ كوممۋنالدىق مەنشىگىنە قايتارىلادى. ال كەشەنگە كىرەبەرىس قاقپا الدىنداعى اۆتوتۇراق تۇگەلدەي جويىلىپ، بىردە-بىر كولىككە اركاعا كىرۋگە تىيىم سالىنادى. قالا اكىمى باۋىرجان بايبەك قاراماعىنداعىلارعا بۇگىن وسىنداي تاپسىرما بەردى. ويتكەنى، ىسكەرلىك ورتالىقتى باسقارۋشى كومپانيا اۋماققا ءاتۇستى قاراپ، دامىتۋ جونىندەگى مىندەتتەرىن ورىنداماعان. ەندى ساياباقتىڭ ءسانىن كەتىرىپ، تىنىعۋشىلارعا جاعداي جاساماعاندارمەن كەلىسىمشارت بۇزىلادى.
اتاكەنت اۋماعىنداعى ساياباق ءبىر كەزدەرى قالا تۇرعىندارىنىڭ ءجيى كەلەتىن كەرەمەت دەمالىس ورنى بولعان. ءقازىر مۇندا ادام قاراسى كوپ كورىنبەيدى. تەك جاقىن ماڭدا تۇراتىن تۇرعىندار عانا تىنىعادى. ويتكەنى، قاراۋسىز قالعان باقتىڭ ءسانى كەتىپ، جۇرتقا مۇلدەم جاعداي جاسالماي وتىر. ساياباقتىڭ ىشىندەگى تاس جولدار مەن بورديۋرلار وپىرىلىپ جاتىر. شىرىگەن بۇتاقتار دا ءتيىستى تازالانباعان. كەزىندە ءتىز قاتار قويىلعان ورىندىقتار دا ابدەن ەسكىرىپ كەتكەن.
ساياباق ىشىندەگى زەينەتكەرلەرگە ارنالعان ورىن دا «جەتىم قىزدىڭ كۇيىن» كەشىپ وتىر. ءبىر كەزدەرى مۇندا قالانىڭ قارتتارى باس قوسىپ، شاحمات ويناپ، اڭگىمە-دۇكەن قۇراتىن. ءقازىر بۇل ورىننىڭ كۇيى كەتىپ، جۇلىم-جۇلىمى شىققان. بۇدان بولەك، تۇرعىندار بالالار وينايتىن الاڭداردىڭ جوقتىعىنا قاپالاندى. ساياباق ىشىندە بۇلدىرشىندەرگە ارنالعان جالعىز ورىننىڭ سىيقى مىناۋ.
ەندى تۇرعىنداردى مازالاعان ماسالەلەر شەشىمىن تابادى. ويتكەنى، مۇنداي باسسىزدىقتاردى ءوز كوزىمەن ارالاپ كورگەن قالا اكىمى باۋىرجان بايبەك اۋماققا ءاتۇستى قاراپ، كورىكتەندىرۋ جۇمىستارىن جاساماعان باسقارۋشى كومپانيامەن كەلىسىمشارتتى بۇزۋدى تاپسىردى. ءارى، «اتاكەنتتەگى» تەلىمدى قالانىڭ كوممۋنالدىق مەنشىگىنە قايتارۋدى قاداپ ايتتى. كەشەن اينالاسىنداعى اسفالتتى جەردى ازايتىپ، جاسىل جەلەكتى كوبەيتۋدى العا تارتتى. سونداي-اق وتىراتىن ورىندىقتار مەن قوقىس جاشىكتەرىن اۋىستىرۋدى مىندەتتەدى.
بۇدان بولەك، جاياۋ جۇرگىنشىلەردىڭ قاۋىپسىزدىگىن قامتاماسىز ەتۋ ءۇشىن ورتالىققا كىرەبەرىستەگى كولىك تۇراعى تۇگەلدەي الىناتىن بولدى. جانە «اتاكەنت» اۋماعىنا قاقپادان كولىكتەردىڭ كىرۋىنە تىيىم سالىنادى.
پىكىر قالدىرۋ