اقتوبەلىك پوليسەيلەر اقتوبە-ورىنبور تراسساسىندا بولعان قىلمىستى كورگەندەردى ءۇن قاتۋعا شاقىرادى، دەپ حابارلايدى Qamshy.kz اقپارات اگەنتتىگى.

بۇل تۋرالى اقتوبە وبلىسىنىڭ وڭىرلىك كوممۋنيكاسيالار قىزمەتىندەگى باسپا ءسوز كونفەرەنسياسىندا اقتوبە وبلىسىنىڭ ىشكى ىستەر دەپارتامەنتىنىڭ كريمينالدى پوليسيا باسقارماسىنىڭ باستىعى ارمان مۇحامەدياروۆ مالىمدەدى.

ءقازىر قۇقىق قورعاۋ ورگاندارىنىڭ قىزمەتكەرلەرى 19 ساۋىردە تۇندە اقتوبە-ورىنبور تراسساسى بويىمەن رەسەي فەدەراسياسى شەكاراسىنان قازاقستانعا وتكەندەردىڭ ءتىزىمىن انىقتاۋدا. ولار اۋىر قىلمىس كۋاگەرلەرى بولۋى مۇمكىن.

«بۇل قىلمىس كىسى كوپ جۇرەتىن اقتوبە-ورىنبور تراسساسىنداعى 35ء-شى شاقرىمدا بولعاندىقتان ازاماتتاردى كومەك كورسەتۋگە شاقىرامىز. ول جەردەگى جۇك اعىنى وتە جوعارى. قازىردە ءبىز سول ۋاقىتتا قانشا ادام جۇرگەنىن، كىم شەكارانى كەسىپ وتكەنىن تەكسەرۋدەمىز. ولاردىڭ اراسىندا قازاقستاننىڭ، تاجىكستاننىڭ، وزبەكستاننىڭ جانە رەسەي فەدەراسياسىنىڭ ازاماتتارى بار. نە دە بولماسىن بىردەمەنى اڭعارعان، كورگەن ادامداردى ىزدەستىرۋدەمىز. كەيبىرەۋلەرىنىڭ ماشينالارىندا بەينەتىركەگىشتەر بولادى. ەگەر مۇمكىندىكتەرى بولسا نەمەسە بىردەمەنى بىلەتىن بولسا، بىزگە حابارلاسۋلارىن سۇرايمىز، قۇپيالىلىققا كەپىلدىك بەرەمىز»، - دەدى اقتوبە وبلىسىنىڭ ىشكى ىستەر دەپارتامەنتىنىڭ كريمينالدى پوليسيا باسقارماسىنىڭ باستىعى ارمان مۇحامەدياروۆ.

19 ساۋىردە، شامامەن تۇنگى ەكىلەر شاماسىندا اقتوبە-ورىنبور تراسساسى بويىنداعى 35ء-شى شاقىرىمدا «كاماز» اۆتوماشيناسى (بەتون ارالاستىرعىش) تابىلعانىن، ونىڭ سالونىندا جۇرگىزۋشى، اقتوبە قالاسىنىڭ 1966 جىلعى تۇرعىنىنىڭ باسىنا تيگەن وقتان قايتىس بولعان ولىگى تابىلعانى بۇرىن حابارلانعان بولاتىن. وسى دەرەك بويىنشا ق ر قك 2 تاراۋى، 99 بابى بويىنشا (ادام ءولتىرۋ)، سونداي-اق، قاراقشىلىق شابۋىل بابى بويىنشا سوتقا دەيىنگى تەرگەۋ جۇرگىزىلۋدە. ءبىرقاتار ساراپتامالار تاعايىندالدى. اسا تاجىريبەلى قىزمەتكەرلەردەن جەدەل تەرگەۋ توبى قۇرىلدى.

تەرگەۋدى اقتوبە وبلىسىنىڭ ءىىد جانە پروكۋراتۋرا باقىلاۋعا الدى.

«وسى قىلمىس تۋرالى اقپاراتتارى بار الەۋمەتتىك جەلىلەردە تارالعان داۋىسپەن حابارلاۋ شىندىققا جاناسپايدى. سوندا دا بارلىق نۇسقالار تەكسەرىلۋدە. رەيدتىك ءىس-شارالار، تەكسەرىستەر جۇرگىزىلۋدە. جەرگىلىكتى پوليسيا قىزمەتىنىڭ قىزمەتكەرلەرى قارۋ يەلەرىن تۇرعىلىقتى جەرى بويىنشا تەكسەرۋدە. ءبىز سوڭعى بەس جىل ىشىندە جوعالعان نەمەسە ۇرلانعان قارۋمەن بايلانىسى بار-جوعىن دا قاراستىرۋدامىز. وتكەن جانە وسى جىلى بوساپ شىققان، بۇرىن سوتتالعان ادامداردى دا تەكسەرۋدەمىز. بۇل قىلمىستى اشۋ ماقساتىندا وسى باعىتتا وتە ۇلكەن جۇمىس جۇرگىزىلۋدە»، - دەدى ا.مۇحامەدياروۆ.