بۇگىن استانادا ءۇشىنشى مارتە ءوتىپ جاتقان ەۋرازيا حالىقارالىق كىتاپ كورمەسىندە «فوليانت» باسپاسىنىڭ ۇيىمداستىرۋىمەن «جاڭا زامان ءازىربايجان پوەزياسىنىڭ انتولوگياسى» اتتى كىتاپتىڭ تۇساۋى كەسىلدى دەپ جازادى Qamshy.kz اقپارات اگەنتتىگى. 

سالتاناتتى راسىمگە قانداس اقىندار ەكبەر گوشالى، يلگار تۇركوگلى، يىلماز وكۋگلى كەلىپ قاتىستى.
جيىندى قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت جانە ازەربايجاننىڭ قازاقستانداعى توتەنشە جانە وكىلەتتى ەلشىسى راشاد مامەدوۆ اشىپ بەردى.

ءازىربايجان شايىرلارىنىڭ ءتارجىمالانعان جىرلارىن وڭايگۇل تۇرجان، ميراس اسان، جانات جاڭقاش، ولجاس قاسىم، ايزادا راحىمجانوۆا، راۋان قابيدولدين سىندى اقىندار وقىدى.  جارىق كورىپ وتىرعان انتولوگياعا 40-تان استام قانداس اقىنداردىڭ ولەڭدەرى ەنگەن.

يگى شاراعا  داۋلەتكەرەي كاپ ۇلى، تاناگوز تولقىن قىزى باستاعان اقىندار مۇرىندىق بولدى. ايتا كەتەيىك، بىلتىر "قازىرگى قازاق پوەزياسىنىڭ انتولوگياسى" دەگەن اتپەن قازاق اقىندارىنىڭ ولەڭدەرى ءازىربايجان تىلىندە شىعىپ، اتالمىش جيناقتىڭ تۇساۋى باكۋدە كەسىلگەن بولاتىن.