اقتوبەدەگى كولىكتەگى اتىس پەن جۇك كولىگى جۇرگىزۋشىسىنىڭ ءولىمى اراسىنداعى بايلانىس تەكسەرىلىپ جاتىر. بۇل تۋرالى اقتوبە وبلىسى ءىىد قىلمىستىق پوليسيا باسقارماسىنىڭ باستىعى ارمان مۇحامەدياروۆ حابارلادى.

«الەۋمەتتىك جەلىدە وبلىس تراسساسىندا باندا پايدا بولدى دەگەن اقپارات تارادى. ءبىراق ولاي ەمەس. تەرگەۋ جۇمىستارى باستالدى، 6 جانە 19 ساۋىردە بولعان جاعدايلاردىڭ بايلانىسى تەكسەرىلىپ جاتىر»، - دەدى ءىىد وكىلى.

ارمان مۇحامەدياروۆتىڭ ايتۋىنشا، بۇگىن وبلىس جولدارىنداعى پاترۋلدەۋ كۇشەيتىلگەن، ءارى جاعداي قۇقىق قورعاۋ ورگاندارىنىڭ قاتاڭ باقىلاۋىنا الىندى.

ەسكە سالا كەتەيىك، العاشقى وقيعا 6 ساۋىردە بولعان. قارۋلى بەلگىسىز ءبىر توپ اقتوبە قالاسى سولتۇستىك اينالما تاس جولىنداعى اقشات اۋىلى ماڭىندا Mersedes Benz ميكرواۆتوبۋسىنداعى جولاۋشىلارعا تاپ بەرىپ، اقشا مەن التىن بۇيىمدار الىپ كەتەدى. اتىس بارىسىندا 35 جاستاعى رەسەيلىك ازامات زارداپ شەككەن.

ال 19 ساۋىردە اقتوبە-ورىنبور تاس جولىندا كاماز كولىگىنىڭ جۇرگىزۋشىسىن اتىپ كەتەدى. ەر ادامنىڭ ءولى دەنەسى تاس جولدان 35 شاقىرىم قاشىقتىقتا تابىلعان.