م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتريساسى  ناز قۇرمانعازى قىزى جەكەنوۆا 39 جاسىنا قاراعان شاعىندا اۋىر ناۋقاستان دۇنيە سالدى. بۇل تۋرالى تەاتردىڭ باسپا ءسوز قىزمەتى حابارلادى.

ناز قۇرمانعازى قىزى جەكەنوۆا  1979 جىلى الماتى وبلىسى، رايىمبەك اۋدانى، قاراساز اۋىلىندا دۇنيەگە كەلگەن. قاراساز ورتا مەكتەبىن جانە م.ماقاتايەۆ اتىنداعى ونەر مەكتەبىن بىتىرگەن.

1994-1998جىلدارى ەسىك پەداگوگيكالىق كوللەدجىنىڭ «مۋزىكالىق ءبىلىم» بولىمىندە ءبىلىم العان.

1998 جىلى ت.جۇرگەنوۆ اتىنداعى قازاق ۇلتتىق   ونەر اكادەمياسىنىڭ «تەاتر ونەرى» فاكۋلتەتىنە وقۋعا ءتۇسىپ، 2002 جىلى اتالمىش اكادەميانى «مۋزىكالىق تەاتر ءارتيسى» ماماندىعى بويىنشا ۇزدىك ءتامامداعان.

2002 جىلى م.اۋەزوۆ اتىنداعى  قازاق مەملەكەتتىك اكادەميالىق دراما تەاترىنىڭ اكتەرلىك قۇرامىنا قابىلدانعان اكتريسا، قىسقا عۇمىرىندا كوپتەگەن بەينەلەردى سومداپ، كورەرمەن جۇرەگىنەن ورىن الدى.

اتاپ ايتساق، م. اۋەزوۆتىڭ «ايمان-شولپانىندا» ايمان، «ابايىندا» قارلىعاش،  ع.مۇسىرەپوۆتىڭ  «ماحاببات داستانى» تراگەدياسىندا تاڭسىق، ۋ.شەكسپيردىڭ «گاملەت» تراگەدياسىندا وفەليا، م.كارىمنىڭ «اي تۇتىلعان ءتۇن» تراگەدياسىندا شافاق، م.بايدجييەۆتىڭ «قىلمىسىندا» ماريام، ە.ۋاحيتوۆتىڭ «قۇدالارىندا» شاپاعات، ت.ۋيليامستىڭ «شىنى حايۋاناتىندا» لاۋرا، د. يسابەكوۆتىڭ «اپكەسىندە» گاۋھار، كاميلا، م. ماقاتايەۆتىڭ «قوش، ماحابباتىندا» بانۋ، ي.عايىپتىڭ «قورقىتتىڭ كورىندە» نەكە، «مەن كەلەمىندە» اقمۇنار، «مەن ىشپەگەن ۋ بار ما؟..» رەكۆيەمىندە كىشى كەمپىر، ر.مۇقانوۆانىڭ «ماڭگىلىك بالا-بەينەسىندە» بالەرينا، ت.نۇرماعانبەتوۆتىڭ «ەسكى ۇيمەن قوشتاسۋىندا» ايجان، ت.نۇرماعامبەتوۆتىڭ «قوجاناسىر ءتىرى ەكەنىندە» ايەل، «بەس بويداققا ءبىر توي» كومەدياسىندا كۇيكەتاي، ب.جاكييەۆ پەن ءا.سىعايدىڭ «جۇرەيىك جۇرەك اۋىرتپايىندا» نەمەرە، ە.جۋاسبەكتىڭ «كۇلەمىز بە، جىلايمىز با؟» كومەدياسىندا  ايكا، س.اسىلبەك ۇلىنىڭ «يمپەرياداعى كەشىندە»، يران-عايىپتىڭ ءا.ءراحيموۆتىڭ «شاكارىمىندە» قىز، ن.ءورازاليننىڭ «شىراق جانعان تۇنىندە» ءسانتاي ، ف.ديۋمانۋار مەن ا.د.ەننەريدىڭ «دون سەزار دە بازاندا» ماركيزا دە مونتەفيورە، ي.ۆوۆنيانكونىڭ «قازا مەن جازاسىندا» مادوننا، ر.بەلەسكييدىڭ «جەلىككەن جاستارىندا» ەلميرا، ا.ءۆولوديننىڭ «قوشتاسقىم كەلمەيدى» دراماسىندا لاريسانىڭ اناسى سەكىلدى بىر-بىرىنە ۇقسامايتىن ساحنالىق بەينەلەر.

قامشىنىڭ سابىنداي قىسقا عۇمىرىندا اكتەرلىك تالانتىن تانىتىپ، كوپتەگەن شىعارماشىلىق جەتىستىكتەرگە جەتىپ، قازاق تەاتر ونەرىنە ءوز ۇلەسىن قوستى. تەاتردىڭ ءداستۇرلى «تەاتر كوكتەمى-2004» فەستيۆالىندە – م. اۋەزوۆتىڭ «ايمان-شولپان» كومەدياسىنداعى ايمان ءرولى ءۇشىن «ۇزدىك دەبيۋت» 2008 جىلى م.كارىمنىڭ «اي تۇتىلعان ءتۇن» تراگەدياسىندا شافاح ءرولى ءۇشىن «ەكىنشى پلانداعى ەڭ ۇزدىك ايەل بەينەسى»، «تەاتر كوكتەمى-2015» فەستيۆالىندە ت.ءۋيليامستىڭ «شىنى حايۋانات» دراماسىنداعى لاۋرا ءرولى ءۇشىن «ەستە قالار كەيىپكەر» جۇلدەسى، «تەاتر كوكتەمى-2016» فەستيۆالىندە ا.ءۆولوديننىڭ «قوشتاسقىم كەلمەيدى» دراماسىنداعى لاريسانىڭ  اناسى ءرولى ءۇشىن «ۇزدىك ەپيزودتاعى ايەل بەينەسى» جۇلدەسىنە يە بولدى.

تالانتتى اكتريسا ناز جەكەنوۆانىڭ اكەسى قۇرمانعازى اعامىزعا، تۋما-تۋىسقاندارى، ارىپتەستەرى مەن دوستارىنا م.اۋەزوۆ اتىنداعى قازاق مەملەكەتتىك اكادەميالىق تەاتر ۇجىمىنىڭ  اتىنان قايعىرىپ كوڭىل ايتامىز. ناز جەكەنوۆانىڭ ادامي بولمىسى، ساحنادا سومداعان بەينەلەر كورەرمەن جادىندا ساقتالادى.

مارقۇممەن قوشتاسۋ ءراسىمى 27 ءساۋىر كۇنى ساعات 10.00-دە م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كىشى زالىندا وتەدى.