بۇگىن ق ر پرەمەر-مينيسترى باقىتجان ساعىنتايەۆ مەملەكەت باسشىسىنىڭ تاپسىرماسى بويىنشا قاراعاندى وبلىسىنا جۇمىس ساپارى اياسىندا وبلىستىڭ جوو مەن كوللەدجدەرىنىڭ ستۋدەنتتەرىمەن، «سەرپىن» باعدارلاماسى بويىنشا ءبىلىم الۋشىلارمەن، ستۋدەنتتەر ۇيىمدارىنىڭ كوشباسشىلارىمەن، جوو رەكتورلارىمەن، كوللەدجدەردىڭ ديرەكتورلارىمەن كەزدەستى. بۇل تۋرالى primeminister.kz حابارلايدى.

كەزدەسۋ بارىسىندا مەملەكەت باسشىسىنىڭ جولداۋلارىندا، «پرەزيدەنتتىڭ بەس الەۋمەتتىك باستاماسىندا» قاراستىرىلعان جاڭا ەكونوميكاعا مامانداردى دايارلاۋ، ءبىلىم بەرۋدىڭ قولجەتىمدىلىگى مەن ساپاسىن ارتتىرۋ، ستۋدەنت جاستاردىڭ ءومىر ءسۇرۋ جاعدايلارىن جاقسارتۋ ماسەلەلەرى تالقىلاندى.

ب. ساعىنتايەۆ كەزدەسۋدى اشا وتىرىپ، ءار وڭىرگە جۇمىس ساپارلارى بارىسىندا مىندەتتى تۇردە جۇمىس ىستەيتىن جاستارمەن جانە ستۋدەنتتەرمەن كەزدەسەتىنىن ايتىپ ءوتتى. قاراعاندى ءوڭىرىنىڭ ستۋدەنتتەرى ءارقاشان جاڭا يدەيالار ۇسىنۋمەن جانە زياتكەرلىك قۇندىلىقتارىمەن ەرەكشەلەنەدى.

باقىتجان ساعىنتايەۆ «پرەزيدەنتتىڭ بەس باستاماسىن» جۇزەگە اسىرۋ ءۇشىن ۇكىمەت ناقتى ءىس-شارالاردى جانە ىسكە اسىرۋ مەرزىمدەرىن قامتيتىن جول كارتاسىن قابىلداعانىن ايتتى. ەلىمىزدىڭ بارلىق وڭىرلەرىندە الەۋمەتتىك باستامالاردى جۇزەگە اسىرۋعا قاتىستى جۇمىستار باستالدى. العا قويىلعان تاپسىرمالاردى ورىنداۋ بويىنشا بارلىق قاجەتتى شارالار قابىلدانىپ جاتىر. ب. ساعىنتايەۆ قازىرگى كەزدە ۇكىمەت ەڭبەك نارىعىنىڭ ينفراقۇرىلىمىن جاڭعىرتۋ بويىنشا جۇمىس جۇرگىزىپ جاتقانىن اتاپ ءوتتى.

ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا اتالعان جۇمىس تۋرالى تولىعىراق باياندادى، ءبىلىم جانە عىلىم ۆيسە-مينيسترى بيبىگۇل اسىلوۆا «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ» اتتى پرەزيدەنتتىڭ ءۇشىنشى باستاماسىن ىسكە اسىرۋ بويىنشا اتقارىلىپ جاتقان جۇمىستار تۋرالى مالىمدەدى، قاراعاندى تەحنيكا-قۇرىلىس كوللەدجىنىڭ ديرەكتورى س. بالابەكوۆا كوللەدجدە الەۋمەتتىك باستامالاردى ىسكە اسىرۋ مەن ينكليۋزيۆتى ءبىلىم بەرۋدىڭ قولجەتىمدىلىگى تۋرالى ايتىپ بەردى.

قاراعاندى جوعارى پوليتەحنيكالىق كوللەدجىنىڭ ستۋدەنتى س. نورماتوۆ جاڭا ەكونوميكا جاعدايىندا مامانداردى دايارلاۋ ءۇشىن Worldskills International قوزعالىسىنىڭ ماڭىزدىلىعى تۋرالى ايتتى. قوسارلى ءبىلىم بەرۋ، وندىرىستىك تاجىريبەدەن ءوتۋ، كوللەدج تۇلەكتەرىنىڭ جۇمىسقا ورنالاسۋى تۋرالى قاراعاندى كاسىپتىك-تەحنيكالىق كوللەدجىنىڭ وندىرىستىك وقىتۋ شەبەرى ك.تۇرعامبەك باياندادى. قاراعاندى تەحنيكالىق ۋنيۆەرسيتەتىنىڭ 3 كۋرس ستۋدەنتى ج. ارعىنباي «سەرپىن» جوباسى اياسىندا تۇرعىن ۇيمەن قامتاماسىز ەتۋ، جۇمىسپەن قامتۋ ماسەلەلەرى جونىندە سويلەدى. ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ 2 كۋرس ستۋدەنتى و. كالمىكوۆا ءبىلىم ساپاسىن ساقتاندىرۋ ماسەلەلەرى تۋرالى ايتتى.

تالقىلاۋ قورىتىندىسىن شىعارا وتىرىپ، پرەمەر-مينيستر وسى سالاداعى ءبىرقاتار وزەكتى ماسەلەلەرگە نازار اۋداردى. ب. ساعىنتايەۆ الدىمەن مەملەكەت باسشىسىنىڭ نەگىزگى سالالاردىڭ باسەكەگە قابىلەتتىگىن ارتتىرۋ ارقىلى ەكونوميكالىق ءوسىمنىڭ جاڭا مودەلىن دامىتۋ تۋرالى جۇكتەگەن مىندەتىن ەسكە سالدى.

سونداي-اق، باقىتجان ساعىنتايەۆ شەتەلدىك ينۆەستورلاردىڭ وڭىرلەردە سالىپ جاتقان جاڭا كاسىپورىندارىنا قاجەتتى مامانداردى دايىنداۋدىڭ ماڭىزدىلىعىنا نازار اۋدارىپ، تەحنيكالىق ماماندىقتارعا دەگەن سۇرانىستى زەردەلەۋ ءۇشىن جوو-لار مەن كوللەدجدەرگە وسى وندىرىستەردىڭ اسيونەرلەرىمەن بايلانىس ورناتۋدى تاپسىردى.

پرەمەر-مينيستر مىسال رەتىندە مۇناي-گاز سەكتورىنا مامانداردى دايىندايتىن اتىراۋ وبلىسىنداعى كوللەدجدەردىڭ ءبىرىنىڭ تابىستى تاجىريبەسىن اتاپ ءوتتى. وسىعان بايلانىستى ب. ساعىنتايەۆ قازاقستاننىڭ بارلىق وبلىسىندا وسىنداي كوللەدجدەردى اشۋ جونىندەگى ۇكىمەتتىڭ شەشىمى تۋرالى ايتىپ بەردى.

تاقىرىپتى جالعاستىرا كەلە، باقىتجان ساعىنتايەۆ ءاربىر وڭىردە ستۋدەنتتەردى دايىنداپ جاتقان تەحنيكالىق ماماندىقتاردىڭ اراقاتىناسى قاجەتتىلىكتەرگە ساي كەلۋى ءتيىس ەكەنىن اتاپ ءوتتى. ەڭبەك نارىعىن ۇنەمى زەردەلەۋ قاجەت، ستۋدەنتتەرگە وقۋلارى اياقتالعاننان كەيىن جۇمىسقا ورنالاسۋ ءۇشىن بوس ورىندار تۋرالى اقپارات بەرىپ وتىرۋ كەرەك.

ماسەلەنى تالقىلاۋ قورىتىندىسى بويىنشا پرەمەر-مينيستر مينيسترلەرگە، وبلىس اكىمىنە بارلىق قوزعالعان ماسەلەلەردى باقىلاۋعا الۋدى تاپسىردى.