استاناداعى ۇلتتىق اكادەميالىق كىتاپحانادا بەلگىلى جازۋشى، ەتنوگراف عالىم، باسپاگەر، قازاقستان جازۋشىلار وداعىنىڭ جانە جۇڭگو مەملەكەتتىك جازۋشىلار قوعامىنىڭ مۇشەسى زەينوللا سانىكتىڭ 15 تومدىق جانە ونىڭ جارى، اقىن، ۇستاز ءشامشابانۋ حامزا قىزىنىڭ 2 تومدىق شىعارمالار جيناعىنىڭ تۇساۋكەسەرى ءوتتى دەپ حابارلايدى، Qamshy.kz اقپارات اگەنتتىگىنىڭ ءتىلشىسى.
بۇل ءىس-شارا ەلوردا تورىندەگى "كورمە" كەشەنىندە وسىمەن ءۇشىنشى رەت وتكىزىلىپ جاتقان ەۋرازيا حالىقارالىق كىتاپ كورمە-جارمەڭكەسىمەن تۇسپا-تۇس كەلىپ وتىر. الىس-جاقىن شەتەلدىڭ 200-گە جۋىق باسپاسى قاتىسىپ جاتقان كورمەدە وقىرمان نازارىنا تەك جاڭا كىتاپتار ۇسىنىلسا، «زەينوللا سانىك اتىنداعى مادەنيەت قورى» ۇيىمداستىرعان تانىستىرىلىمعا اكادەميك سەيىت قاسقاباسوۆ، پروفەسسورلار سەرىك نەگيموۆ، ديحان قامزابەك ۇلى، تۇرسىنحان زاكەن ۇلى، دۇكەن ءماسىمحان، ەلتاڭبا اۆتورى جانداربەك مالىبەك ۇلى، ت.ب. بەلگىلى عالىمدار، اقىن-جازۋشىلار مەن قالامگەردىڭ جاقىن-جۋىق جەرلەستەرى قاتىستى. تاعىلىمى مول تۋىندىلاردىڭ تانىستىرىلىمىن فيلولوگيا عىلىمدارىنىڭ كانديداتى سەرىكزات دۇيسەنعازين جۇرگىزدى.
ايتا كەتسەك، 15 تومدىقتىڭ 1-تومىنا «سەرگەلدەڭ» رومانى، 2-تومىنا «باسباي» رومانى، 3-تومىنا باسباي باي تۋرالى زەرتتەۋلەر، 4-تومىنا «قاراكەرەي قابانباي» جانە «حان باتىر قابانباي» تاريحي ەسسەلەرى، 5-تومىنا «سۇلەيمەن بي» تاريحي ەسسەسى، 6-تومىنا «تۇعىرىل حان»، «قايراقباي»، دەمەجان» تاريحي ەسسەلەرى، 7-8-تومدارعا «قازاق ەتنوگرافياسى»، 9-تومىنا اڭگىمە، نوۆەللا، حيكاياتتارى، 10-تومىنا «ءىز» بيوگرافيالىق حيكاياتى، 11-12-تومدارعا ماقالالارى مەن رەفەراتتارى، 13-تومىنا «قازاق ەمشىلىگى مەن دارىگەرلىگى» ەڭبەگى، 14-تومىنا وچەركتەرى مەن ەستەلىكتەرى، سونداي-اق، 15-تومىنا جولجازبالارى توپتاستىرىلعان. وعان قوسا، «ءسوز-عۇمىر» اتتى جيناق پەن «زەينوللا الەمى» اتتى ەستەلىكتەر كىتابى بار. ال جازۋشىنىڭ جارى ءشامشابانۋ حامزا قىزىنىڭ 2 تومدىق شىعارمالارىنان بولەك، «سوز-كەستە» اتتى كىتاپشاسى دا جارىق كورگەن. بۇنىڭ ءبارى تۇساۋكەسەرگە جينالعان كوپشىلىككە تەگىن تاراتىلدى.
شارا بارىسىندا الدىمەن عالىم سەيىت قاسقاباسوۆ زەينوللا سانىكتىڭ شەتەلدەگى قازاق ادەبيەتى مەن تاريحىنىڭ كورنەكتى وكىلى رەتىندە ۇلت رۋحانياتىنا ولشەۋسىز ۇلەس قوسقانىن باسا ايتتى.
«تاۋ سىلەمىندەي مول مۇرا فولكلور، اۋىز ادەبيەتى، جىر-اڭىزدار، ەل اڭگىمەلەرى، كوركەم پروزا، ەتنوگرافيالىق جازبالار، جولساپارلار، پۋبليسيستيكالىق ماتەريالدار، روماندار، پوۆەستتەر مەن كوركەم اڭگىمەلەر، قىسقا افوريزمدەر مەن ناقىل سوزدەر سىندى ادەبيەتتىڭ الۋان جانرىندا قالام تەربەۋى زەينوللا سانىكتىڭ شىعارماشىلىق قازىناسى باي ادام بولعانىن قاپىسىز كورسەتەدى. شىن مانىندە، ول سان قىرلى تالانت يەسى بولاتىن. ءبىر عانا «بابالار ءسوزىنىڭ» 20 تومى جۇڭگو قازاقتارى فولكلورىنىڭ نەگىزىندە شىققانىن ايتساق، بۇل قىرۋار ەڭبەكتى جيناۋ جولىندا زەكەڭنىڭ ەڭبەگى ۇشان-تەڭىز بولدى. مىنا نارىق زامانىندا دا قىزدىڭ جيعان جۇگىندەي ەتىپ، باقانداي 15 تومدىقتى شىعارۋدىڭ ءوزى وڭاي ەمەس»، – دەدى اكادەميك. سول سەبەپتى، بۇل ماسەلەنىڭ وڭ شەشىمىن تاپقان قالامگەردىڭ وتباسى مەن بالالارىنا، ولارعا كومەك قولىن سوزعان وزگە دە ازاماتتارعا العىس ءبىلدىردى.
ال پروفەسسور سەرىك نەگيموۆتىڭ ايتۋىنشا، زەينوللا سانىكتىڭ «باسباي» رومانى – ەرتەرەكتە جازىلعانمەن، قازىرگى اۋىل شارۋاشىلىعىنىڭ العا جىلجۋىنا سەپتىگىن تيگىزىپ، وسى سالا ماماندارىنا اجەپتاۋىر جول نۇسقايتىن ەڭبەك. نەگە دەسەڭىز، زامانىندا اتاقتى باي بولعان باسباي اتتى كەيىپكەر كادىمگى ارقارلاردى ءۇي قويلارىمەن بۋدانداستىرىپ، ەكەۋىنەن مىقتى تۇقىم العان سەلەكسيونەر بولعان. سونى كوركەم شىعارماعا ارقاۋ ەتكەن جازۋشىنىڭ ونەگەلىك ورنەگى مىعىم.
ەسكە سالا كەتسەك، زەينوللا مۇباراك ۇلى سانىك 1935 جىلى قىتايدىڭ تارباعاتاي ايماعىندا دۇنيەگە كەلگەن. بەيجىڭ قالاسىنداعى ورتالىق جاستار ينستيتۋتىن ءتامامداپ، ەڭبەك جولىن باسپاگەرلىكتەن باستاعان. ءسويتىپ، ۇرىمجىدەگى جاستار باسپاسىندا جاۋاپتى رەداكتور بولىپ 40 جىلداي قىزمەت اتقارادى. ال 1955 جىلدان باستاپ ادەبي زەرتتەۋ جۇمىستارىن جازا باستاعان. سول ۋاقىتتا قىتايدا جۇرگىزىلگەن "مادەني توڭكەرىستىڭ" اۋىر سوققىسىنا ۇشىراپ، "حالىق جاۋى" اتانىپ، باسىنان نەبىر اۋىر كۇندەردى دە وتكەرگەن. سوعان قاراماستان، قالامگەردىڭ عىلىمي ەڭبەكتەرىنەن، رومان، پوۆەستەرىنەن قۇرالعان 20-دان استام كىتابى جارىق كورىپتى. قازاقستاندا "قاراكەرەي قابانباي"، "حاس باتىر قابانباي"، "تۇعىرىل حان"، "دەمەجان باتىر"، "حالىق كۇيشىسى قايراقباي"، "باسپاي" اتتى كىتاپتارى باسىلىپ شىقتى.
ءقادىرلى قالامگەر 2013 جىلدىڭ 26 قىركۇيەگىندە ومىردەن وزدى.
پىكىر قالدىرۋ