«ناۋرىزناما» ونكۇندىگى اياسىندا الماتى وبلىسىندا ۇلتتىق سپورت كۇنى بۇرىن-سوڭدى بولماعان اۋقىمدا ءوتىپ، 600 مىڭنان استام ادامنىڭ باسىن قوستى. جارىستار مەن مەرەكەلىك ءىس-شارالار ءوڭىردىڭ ءاربىر اۋدانىن، قالاسى مەن اۋىلدىق وكرۋگىن — ورتالىق قالالاردان باستاپ ءىرى ەلدى مەكەندەر مەن اۋىلدارعا دەيىن تۇگەل قامتىدى.

جالپى العاندا، ونداعان الاڭدا ءداستۇرلى سپورت تۇرلەرىنەن تۋرنيرلەر، حالىقتىق ويىندار مەن ۇلتتىق ناقىشتا كورمەلەر ۇيىمداستىرىلدى. مەرەكە بىرلىك پەن ۇرپاقتار ساباقتاستىعىنىڭ، ۇلتتىق مۇراعا دەگەن قۇرمەتتىڭ ناعىز سيمۆولىنا اينالدى.

مەرەكەنىڭ باستى الاڭى قونايەۆ قالاسى بولدى. مۇندا ۇلتتىق سپورت تۇرلەرىنەن اۋقىمدى فەستيۆال جالاۋىن جەلبىرەتتى. قالا كەڭىستىگى ءتىرى داستۇرلەر مەكەنىنە اينالىپ، كورەرمەندەر قازاق مادەنيەتىنىڭ رۋحىن تەرەڭ سەزىنۋگە مۇمكىندىك الدى. مەرەكە جارقىن ەموسيالار مەن مازمۇندى باعدارلاماعا تولى بولدى.

قاتىسۋشىلار كۇش-قايراتى مەن ەپتىلىگىن كورسەتسە، كورەرمەندەر ولاردى قىزۋ قولداپ، ناعىز حالىقتىق تويدىڭ اتموسفەراسىن قالىپتاستىردى. اسىرەسە، ءار بەلدەسۋى مىنەز سىناعىنا اينالعان قازاق كۇرەسى، سونداي-اق كوپتەگەن قاتىسۋشى مەن جانكۇيەر جيناعان اسىق اتۋ مەن بەس اسىق ويىندارى ەرەكشە قىزىعۋشىلىق تۋدىردى. ارقان تارتىس پەن بۇقا تارتىس تا تارتىستى ءوتتى، مۇندا تەك قارا كۇش قانا ەمەس، كوماندالىق رۋح تا شەشۋشى ءرول اتقاردى.

فەستيۆالدىڭ اشىلۋىندا الماتى وبلىسى اكىمىنىڭ ورىنباسارى عاني مايلىبايەۆ ۇلتتىق سپورت كۇنىنىڭ ماڭىزدىلىعىنا توقتالىپ، تۇرعىنداردى ناۋرىز مەرەكەسىمەن قۇتتىقتادى: «بارشا الماتى وبلىسىنىڭ تۇرعىندارىن ناۋرىز مەيرامىمەن شىن جۇرەكتەن قۇتتىقتايمىن! ۇلتتىق سپورت كۇنى — بۇل جاي عانا جارىس ەمەس، بۇل ءبىزدىڭ تاريحىمىزدىڭ، مىنەزىمىز بەن بىرلىگىمىزدىڭ كورىنىسى. وسىناۋ كوكتەم كۇندەرىندە ۇرپاقتار بايلانىسى ەرەكشە سەزىلەدى: ۇلكەندەر ءداستۇردى اماناتتاسا، جاستار ونى ماقتانىشپەن قابىلداپ، دامىتىپ كەلەدى. بۇگىن الاڭداردا ءبىزدى مىقتى ەتەتىن شىنايى قۋانىش پەن بىرلىكتىڭ رۋحىن كورىپ وتىرمىز».

كۇش سىناساتىن سپورت تۇرلەرى ەڭ قىزىقتى ساتتەردىڭ ءبىرى بولدى. بۇقا تارتىستا 18 جاستان اسقان ەرلەر توزىمدىلىگى مەن قايسارلىعىن كورسەتسە، ارقان تارتىستا كوماندالار فيزيكالىق كۇشپەن قاتار ۇيلەسىمدى ءىس-قيمىل ارقىلى جەڭىسكە ۇمتىلدى. ءداستۇرلى ويىندار دا كورەرمەندەردى ءتانتى ەتتى:
- لاڭگى تەبۋدە قاتىسۋشىلار ەپتىلىك پەن ۇيلەسىمدىلىك تانىتتى.
- اسىق اتۋدا مەرگەندىك، ەسەپ پەن سۋىققاندىلىق باستى ءرول اتقاردى.
- بەس اسىق ويىنىندا رەاكسيا جىلدامدىعى مەن دالدىك الدىڭعى پلانعا شىقتى.
قاتىسۋشىلار اراسىندا قازاقستان چەمپيوندارى تالشىن اسلانبەك قىزى مەن جانەل عابيت بولدى. ولار بۇل تۋرنيردە دە وزدەرىنىڭ جوعارى دايىندىق دەڭگەيىن دالەلدەدى. «بۇل تۋرنيردە قاتىسۋشىلاردىڭ دەڭگەيى وتە جوعارى بولدى، ءار ويىن سوڭعى ساتكە دەيىن شيەلەنىستى ءوتتى. ەلىمىزدە بەس اسىققا دەگەن قىزىعۋشىلىقتىڭ ارتىپ كەلە جاتقانى قۋانتادى»، — دەپ اتاپ ءوتتى جانەل عابيت.

وبلىس اۋداندارىندا دا ءىس-شارالار اۋقىمدى ءوتتى:
- ىلە اۋدانىندا مىقتى پالۋانداردىڭ قاتىسۋىمەن قازاق كۇرەسىنەن ءىرى تۋرنير ۇيىمداستىرىلدى.
- ەڭبەكشىقازاق اۋدانىندا كورەرمەندەردى ساياتشىلىق — ەجەلگى قۇس سالۋ ونەرى قىزىقتىردى.
- باسقا اۋدانداردا توعىزقۇمالاق، اسىق اتۋ جانە وزگە دە ۇلتتىق سپورت تۇرلەرىنەن جارىستار ءوتتى.

ۇلتتىق سپورت كۇنى الماتى وبلىسىندا داستۇرلەردىڭ جاڭاشا قارقىنمەن دامىپ، مادەنيەت پەن سالاۋاتتى ءومىر سالتىنا دەگەن قىزىعۋشىلىقتى ارتتىرىپ جاتقانىنىڭ ايقىن دالەلى بولدى.