ۇكىمەت وتىرىسىندا پرەمەر-مينيستر ولجاس بەكتەنوۆ جاڭا كونستيتۋسيا نورمالارىن جۇزەگە اسىرۋعا باعىتتالعان جاڭا كونستيتۋسيالىق زاڭداردىڭ قابىلدانۋىن قامتاماسىز ەتۋ قاجەت ەكەنىنە نازار اۋداردى.

«ۇكىمەت تاراپىنان «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» جانە «قازاقستان رەسپۋبليكاسى استاناسىنىڭ مارتەبەسى تۋرالى» جاڭا كونستيتۋسيالىق زاڭداردىڭ قابىلدانۋىن قامتاماسىز ەتۋ قاجەت. ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن بىرگە 15 ساۋىرگە دەيىن كونستيتۋسيالىق زاڭداردىڭ جوبالارىن ازىرلەپ، ۇكىمەتكە ەنگىزۋدى تاپسىرامىن»، — دەپ اتاپ ءوتتى ولجاس بەكتەنوۆ. سونىمەن قاتار جاڭا كونستيتۋسياعا سايكەس، كەيبىر وڭىرلەردىڭ جەدەل ەكونوميكالىق دامۋىن قامتاماسىز ەتۋ ءۇشىن «قارقىندى داميتىن قالا» ارناۋلى قۇقىقتىق رەجيمى بەلگىلەنۋى مۇمكىن ەكەنى اتاپ ءوتىلدى.

«پارلامەنتتە “الاتاۋ قالاسىنىڭ ارناۋلى مارتەبەسى تۋرالى” كونستيتۋسيالىق زاڭ جوباسىن قاراۋدى جەدەلدەتىپ، مەملەكەت باسشىسىنا ناۋرىز ايىنىڭ سوڭىنا دەيىن قول قويۋعا ۇسىنۋ قاجەت. پرەزيدەنت “قازاقستان رەسپۋبليكاسىنىڭ كونستيتۋسياسىن ىسكە اسىرۋ جونىندەگى شارالار تۋرالى” جارلىققا قول قويدى. 7 ساۋىرگە دەيىن جاڭا كونستيتۋسيانى ىلگەرىلەتۋ جوسپارىن بەكىتۋىمىز كەرەك. ادىلەت مينيسترلىگىنە مۇددەلى مەملەكەتتىك ورگاندارمەن بىرگە جوسپار جوباسىن ازىرلەپ، 1 ساۋىرگە دەيىن ۇكىمەت اپپاراتىنا ەنگىزۋدى تاپسىرامىن. بارلىق ورتالىق جانە جەرگىلىكتى مەملەكەتتىك ورگاندار مەن كۆازيمەملەكەتتىك سەكتور جوسپاردى ىسكە اسىرۋ بويىنشا جان-جاقتى ءارى تۇبەگەيلى شارالاردى قابىلداسىن»، — دەپ اتاپ ءوتتى ولجاس بەكتەنوۆ.