بيىل الماتىدا زەينەتكەرلەرگە ارنالعان ارنايى ورتالىق اشىلادى.

بۇدان بىلاي الماتىنىڭ قامكوڭىل قارتتارى قول قۋسىرىپ قۇرى جۇرمەيدى. قوعامنان قالىس قالماي، بەلسەندى ءومىر سۇرەدى. بيىل شاھاردا ەگدە جاستاعى ادامدارعا ارنالعان ارنايى ورتالىق اشىلماق. وندا اعا بۋىن وكىلدەرى باس قوسىپ، بوس ۋاقىتتارىن ءتيىمدى وتكىزەدى. ياعني، كوڭىلى قالاعان ىسپەن اينالىسىپ، پسيحولوگيالىق كومەك الادى. قالا بيلىگى قاريالاردى قولداۋ ماقساتىندا «بەلسەندى ءومىر ءسۇرۋ» جول كارتاسىن ازىرلەدى.

بۇگىندە الماتى قالاسىندا 222 مىڭنان استام زەينەتكەر تۇرادى. اعا بۋىن وكىلدەرىنە كوڭىل ءبولىپ، قولداۋ ءبىلدىرۋ ءۇشىن قالا بيلىگى ارنايى «بەلسەندى ءومىر ءسۇرۋ» جول كارتاسىن ازىرلەدى. حالىقارالىق تاجىريبەگە سۇيەنە دايىندالعان جوبانىڭ ءبىرىنشى كەزەڭىنە جەرگىلىكتى قازىنادان 150 ميلليون تەڭگە بولىنبەك. اتالمىش باعدارلاما ەگدە جاستاعى تۇرعىنداردىڭ بەلسەندىلىگىن ارتتىرىپ، ولاردىڭ ءومىر سۇرۋگە قۇشتارلىعىن وياتپاق.

«ەلباسى نۇرسۇلتان ءابىش ۇلى نازاربايەۆتىڭ «بەس ينستيتۋسيونالدىق رەفورماسى» شەڭبەرىندە الماتى قالاسىنىڭ قوعامدىق كەڭەسى قۇرىلىپ، سودان بەرگى ۋاقىتتا قالا تۇرعىندارى كوتەرىپ كەلە جاتقان كەزەك كۇتتىرمەيتىن ماسەلەلەردى شەشۋدە وزدەرىڭىزبەن بىرلەسىپ، تىعىز جۇمىس اتقارىپ كەلەمىز. ەندەشە، «الماتى 2020» دامۋ باعدارلاماسىندا كورسەتىلگەن دامۋدىڭ باسىم باعىتتارىن بىرلەسە ىسكە اسىرۋدا قوعامدىق كەڭەستىڭ ورنى قاشاندا بولەك بولماق. سوندىقتان دا قاريالارىمىزعا دەگەن قامقورلىعىمىزدى ارتتىرۋعا، ولاردىڭ ءومىر ساپاسىن جوعارىلاتا تۇسۋگە باعىتتالىپ ارنايى ازىرلەنگەن «بەلسەندى ۇزاق ءومىر» جول كارتاسىن ەڭ العاشقى بولىپ بۇگىن وزدەرىڭىزدىڭ نازارلارىڭىزعا ۇسىنباقپىز»، - دەدى الماتى قالاسىنىڭ اكىمى باۋىرجان بايبەك.

قارتتار ءۇشىن بەكىتىلگەن باعدارلاما اياسىندا وسى جازدا الماتىدا «بەلسەندى ۇزاق ءومىر ءسۇرۋ ورتالىعى» اشىلادى. وندا كۇن سايىن قالانىڭ 200-گە جۋىق ەگدە جاستاعى تۇرعىنى باس قوسىپ، كوڭىلى قالاعان ىسپەن شۇعىلدانادى. ياعني، ۇيلەرىندە قول قۋسىرىپ قۇر جاتپايدى. ورتالىققا كەلىپ كىتاپ وقيدى، سپورت زالدارىنا بارىپ، شاحمات، توعىزقۇمالاق تا وينايتىن بولادى. ال «بولدىم، تولدىم» دەمەي، ىزدەنىسكە جانى قۇمار جاندار ءۇشىن، ءتىپتى، اعىلشىن ءتىلى مەن كومپيۋتەرلىك كۋرستار جۇمىس ىستەيدى. ءارى، تەگىن پسيحولوگيالىق جانە مەديسينالىق كەڭەس بەرىلەدى.

«بيىل بىرەۋ اشىلسا، كەلەسى جىلى تاعى دا اشۋ قاراستىرىلعان. بۇنىڭ نەگىزگى فۋنكسياسى - سول ورتالىقتىڭ بازاسىندا مادەني، دەمالىس ورنىن ۇيىمداستىرۋ. سونىمەن قاتار، ولاردىڭ كومپيۋتەرلىك ساۋاتتىلىعىن، سولارعا وقىتۋ تاعى باسقا جاعدايلار قاراستىرىلادى. بۇل باعدارلاما ەگدە جاستاعى ادامداردى وزدەرىنىڭ ۇسىنىستارى بويىنشا وزگەرە بەرەدى. ياعني، بۇل جەردە ءبىر قاتىپ قالعان قاعيدا جوق»، - دەدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى مەيىرجان وتىنشييەۆ.

ۇيىمداستىرۋشىلاردىڭ ايتۋىنشا، قاريالاردىڭ ۇسىنىس پىكىرىدە ەسكەرىلەدى. بۇدان بولەك، وسى جىلى قالانىڭ بارلىق اۋماعىنان 40 الەۋمەتتىك كلۋب اشىلادى. ول جەرلەردە دە قارتتارعا ءار ءتۇرلى تەگىن ۇيىرمەلەر قاراستىرىلماق.

«بۇگىندە قالامىزدا قارتتارعا ەرەكشە كوڭىل ءبولىنىپ، كوپ قولداۋ كورسەتىلىپ كەلەدى. وسى باعىتتاعى جۇمىستارعا 2،6 ملرد تەڭگە بولىنەدى. جىل سايىن 4 مىڭ زەينەتكەر ساۋىقتىرۋ ورىندارىنا  جولدامالار الادى. ەگدە جاستاعى ادامدار وزدەرىنىڭ قوعامعا قاجەتتىلىگىن سەزىنىپ، ءبىزدىڭ قولداۋىمىزدى سەزىنۋى قاجەت. ولارعا قارىم-قاتىناس، تىلدەسۋ قاجەت. ولار ۇلكەن ومىرلىك تاجىريبە مەن دانالىقتىڭ قاينار كوزى. ولاردىڭ جاستارعا بەرەرى كوپ»، - دەدى الماتى قالاسىنىڭ اكىمى باۋىرجان بايبەك.

سونداي-اق ەگدە جاستاعى تۇرعىندار اراسىندا الەۋمەتتىك ءتۋريزمدى دامىتۋعا ەرەكشە نازار اۋدارىلادى. قارتتار ءۇشىن قالا مەن تاۋ اراسىندا تۋريستىك مارشرۋتتار ۇيىمداستىرىلماق. ال قوعامدىق كەڭەس مۇشەلەرىنىڭ ۇسىنىسىمەن «اتا -اپا.kz» ارنايى ينتەرنەت-پورتالى اشىلۋى مۇمكىن. وندا قاريالار ءۇشىن بارلىق پايدالى اقپاراتتاردى توپتاستىرۋ كوزدەلگەن.