اقش 21 قاڭتاردان 75 ەل ازاماتتارىنا يمميگراسيالىق ۆيزالاردى وڭدەۋدى ۋاقىتشا توقتاتادى. بۇل قادام ۇمىتكەرلەردى ىرىكتەۋ مەن تەكسەرۋ ءتارتىبىن قايتا قاراپ جاتقاندا، «public charge» ولشەمىن كۇشەيتۋ اياسىندا قابىلداندى.

جاڭالىقتى Fox News Digital قىزمەتتىك جازباعا سۇيەنىپ حابارلادى. العاشقى حاباردا بارلىق ۆيزالار تۋرالى ايتىلسا، كەيىن ناقتىلاۋ بويىنشا توقتاتۋ يمميگراسيالىق ۆيزالارعا عانا قاتىستى دەلىندى.

نە وزگەردى؟

كونسۋلدىقتارعا ۇمىتكەرلەرگە قولدانىستاعى زاڭناماعا سۇيەنىپ، ۆيزا بەرۋدەن ۋاقىتشا باس تارتۋ جونىندە نۇسقاۋ بەرىلدى. پروسەدۋرالاردى قايتا باعالاۋ اياقتالعانشا وسى ءتارتىپ ساقتالادى.

قاي ەلدەر اتالدى؟

Fox News جاريالاعان قۇجاتتا رەسەي، تايلاند، ەگيپەت، اۋعانستان، برازيليا، يراك، يران، يەمەن، سومالي جانە نيگەريا اتالدى. تولىق ءتىزىم ءالى رەسمي جاريالانبادى.

الەۋمەتتىك جەلىلەردە تاراعان بەيرەسمي تىزىمدەر تۋرالى مالىمەتتى رەسمي دەرەككوزدەر راستامادى. جوسپار قۇراردا ناقتى اقپاراتتى اقش مەملەكەتتىك دەپارتامەنتىنىڭ نەمەسە ەلشىلىكتەردىڭ رەسمي حابارلاماسىنان تەكسەرگەن ءجون.

نەگە مۇنداي شەشىم قابىلداندى؟

فەدەرالدىق بيلىك «public charge» ءقاۋپىن جوعارى دەپ باعالاناتىن ءوتىنىش بەرۋشىلەرگە نازارىن كۇشەيتتى. ميننەسوتا شتاتىنداعى الەۋمەتتىك تولەمدەر بويىنشا تەرگەۋلەردەن كەيىن سومالي باعىتىنا بولەك نازار اۋدارىلدى.

«Public charge» دەگەن نە؟

قاراشادا مەملەكەتتىك دەپارتامەنت ديپلوماتيالىق وكىلدىكتەرگە «public charge» ولشەمدەرى بويىنشا جاڭا تەكسەرۋ ءتارتىبىن جولدادى. ەندى كونسۋلدىقتار ۇمىتكەردىڭ دەنساۋلىعىن، جاسىن، اعىلشىن ءتىلىن ءبىلۋ دەڭگەيىن، قارجىلىق تۇراقتىلىعىن جانە ۇزاق مەرزىمدى مەديسينالىق كۇتىمگە مۇقتاجدىق تاۋەكەلىن ەسكەرەدى. بۇعان دەيىن مەملەكەتتىك اقشالاي كومەك العان جاعدايلار دا نازارعا الىنادى.

رەسمي تۇسىنىكتەمە

«ەگەر ۇمىتكەر مەملەكەتتىڭ موينىنا سالماق سالۋى مۇمكىن بولسا، مەملەكەتتىك دەپارتامەنت ونى قابىلداماۋعا ەجەلگى وكىلەتىن قولدانادى. بۇل – امەريكالىق سالىق تولەۋشىلەردىڭ جومارتتىعىن قورعاۋعا باعىتتالعان قادام»، – دەپ مالىمدەدى دەپارتامەنت وكىلى توممي پيگگوتت. ەرەكشەلىكتەر وتە شەكتەۋلى تۇردە قارالاتىنى اتاپ ءوتىلدى.

زاڭ تاريحى قىسقاشا

«Public charge» نورماسى ونداعان جىل بويى قولدانىستا بولدى. 2019 جىلى دونالد ترامپ اكىمشىلىگى كريتەرييلەردى كەڭەيتتى، كەيىن بۇل تۇزەتۋلەردىڭ ءبىر بولىگى سوتتاردا داۋلاندى، ال بايدەن اكىمشىلىگى ولاردى كەرى شەگىندىردى. ءقازىر تارتىپتەردى قايتا باعالاۋ ءجۇرىپ جاتىر.

قازاقستانعا اسەرى قانداي؟

تولىق ءتىزىم رەسمي جاريالانباي تۇرعاندىقتان، قازاقستاننىڭ مارتەبەسىن ناقتى ايتۋ قيىن. Fox News كەلتىرگەن ون ەلدىڭ ىشىندە قازاقستان اتالمادى. يمميگراسيالىق ەمەس ۆيزالار (مىسالى، تۋريستىك نەمەسە ستۋدەنتتىك) جونىندە بۇل حابارلامادا وزگەرىس كورسەتىلمەدى.

اقپارات Fox News Digital جانە Tengrinews.kz ماتەريالدارىنا سۇيەنىپ جازىلدى.

بۇل تۋرالى Qamshy.kz اقپارات اگەنتتىگى حابارلايدى.