قازاقستانداعى رەسەيدىڭ مادەنيەت كۇندەرى اياسىندا قازاقستان رەسپۋبليكاسىنىڭ ۇلتتىق مۋزەيىندە «مادەني داستۇرلەردى بىرىكتىرۋ جانە زاماناۋي شىعارماشىلىق تاجىريبەلەر: قازاقستان مەن رەسەيدىڭ مادەني ىنتىماقتاستىعى» تاقىرىبىندا دوڭگەلەك ۇستەل ءوتتى.

جيىنعا ق ر پرەمەر-مينيسترىنىڭ ورىنباسارى – مادەنيەت جانە اقپارات ءمينيسترى ايدا بالايەۆا، رەسەي فەدەراسياسى مادەنيەت ءمينيسترىنىڭ ورىنباسارى اندرەي مالىشيەۆ، سونداي-اق ەكى ەلدىڭ مۋزەي، تەاتر، ءبىلىم بەرۋ جانە كينو سالاسىنداعى كاسىبي قاۋىمداستىق پەن كونسەرتتىك ۇيىمدارىنىڭ وكىلدەرى قاتىستى.

ايدا بالايەۆا قازاقستان مەن رەسەي اراسىنداعى قارىم-قاتىناستا مادەني ىنتىماقتاستىقتىڭ ايرىقشا ماڭىزعا يە ەكەنىن اتاپ ءوتتى. ونىڭ ايتۋىنشا، تاراپتار بىرلەسكەن كورمەلەر ۇيىمداستىرىپ، كينوفەستيۆالدەر وتكىزىپ، ونەر ۇجىمدارىنىڭ گاسترولدەرىن جولعا قويىپ كەلەدى. سونداي-اق مادەني-گۋمانيتارلىق سالاداعى ءوزارا ءىس-قيمىلدىڭ جاڭا تەتىكتەرىن بىرلەسە ىزدەستىرىپ وتىر.

«كەزدەسۋلەرىمىزدىڭ ءداستۇرلى سيپات الىپ كەلە جاتقانى وتە ماڭىزدى. وسىدان ءبىر جىل بۇرىن دا وسىنداي دوڭگەلەك ۇستەلدە باس قوسىپ، ىنتىماقتاستىقتىڭ كەلەشەگىن تالقىلاعان ەدىك. بۇگىندە مادەنيەت سالاسىنىڭ ءىس جۇزىندەگى بارلىق باعىتى بويىنشا ناقتى ناتيجەلەر تۋرالى نىق سەنىممەن ايتۋعا تولىق نەگىز بار. بۇل مۋزەي جانە ارحيۆ ىسىنەن باستاپ، تەاترلار مەن كونسەرتتىك ۇيىمدار اراسىنداعى بايلانىستارعا دەيىنگى كەڭ اۋقىمدى قامتيدى. مۇنىڭ ءبارى وسىنداي ديالوگتىڭ ناقتى ناتيجە بەرەتىنىن ءارى مادەني-گۋمانيتارلىق بايلانىستارىمىزدى مازمۇندىق تۇرعىدان بايىتىپ، كەڭەيتۋگە جول اشاتىنىن كورسەتەدى. بۇگىنگى كەزدەسۋ دە ءوزارا ۇستانىمداردى تاعى ءبىر پىسىقتاپ، جاڭا باستامالار ۇسىنۋعا جانە بىرلەسكەن ءىس-شارالار اياسىن كەڭەيتۋگە مۇمكىندىك بەرەدى»، – دەدى ايدا بالايەۆا.

ءوز كەزەگىندە اندرەي مالىشيەۆ تە رەسەي تاراپى قازاقستانمەن مادەني بايلانىستاردى دامىتۋعا ەرەكشە ءمان بەرەتىنىن ايتتى.

«ءبىز قازاقستانمەن مادەنيەت پەن ونەر سالاسىنداعى ىنتىماقتاستىققا ايرىقشا ءمان بەرەمىز. باۋىرلاس قازاقستان رەسەيدىڭ مادەنيەت قايراتكەرلەرىن ەرەكشە ىقىلاسپەن قارسى الىپ كەلەدى. بۇل ەكى ەلدى ورتاق مادەني كەڭىستىك، رۋحاني قۇندىلىقتاردىڭ ساباقتاستىعى بايلانىستىرىپ وتىرعانىن تاعى ءبىر مارتە ايعاقتايدى. سونداي-اق، رەسەيدە وتكەن قازاقستان مادەنيەتى كۇندەرىن دە ىستىق ىقىلاسپەن ەسكە الامىز. ول ماڭىزدى وقيعاعا اينالىپ، شىعارماشىلىق بايلانىستارىمىزدىڭ جوعارى دەڭگەيىن تانىتتى. بۇگىن ءبىز ءۇشىن الداعى جىلدارداعى ءوزارا ىقپالداستىقتىڭ كەلەشەگىن تالقىلاۋ اسا ماڭىزدى. اسىرەسە مۋزەي ءىسى، تەاتر سالاسى، ءبىلىم بەرۋ، كىتاپحانا ءىسى جانە ىنتىماقتاستىقتى ناقتى مازمۇنمەن بايىتا الاتىن وزگە دە باعىتتار بويىنشا پىكىر الماسۋ قاجەت»، – دەدى اندرەي مالىشيەۆ.

دوڭگەلەك ۇستەلدە مۋزەي ىسىنە باسىمدىق بەرىلدى. قازاقستان رەسپۋبليكاسىنىڭ ۇلتتىق مۋزەيى مەن ءى پەتر اتىنداعى انتروپولوگيا جانە ەتنوگرافيا مۋزەيى قازاق ەتنوگرافيالىق ماتەريالدارىنىڭ كاتالوگىن بىرلەسىپ ازىرلەۋ جونىندە كەلىسىمگە كەلدى. بۇدان بولەك، مەملەكەتتىك ەرميتاجبەن بىرلەسىپ، 2027 جىلدىڭ كۇزىنە جوسپارلانعان جاڭا ارحەولوگيالىق كورمەلەر مەن ءوزارا ەكسپوزيسيالار دايىنداۋ جۇمىستارى جۇرگىزىلىپ جاتىر.

ال، بيىل كۇزدە قازاقستان رەسپۋبليكاسى ءابىلحان قاستەيەۆ اتىنداعى ۇلتتىق ونەر مۋزەيىندە مەملەكەتتىك ترەتياكوۆ گالەرەياسى قورىنان الىنعان تۋىندىلار ۇسىنىلاتىن «حح ۆەك رۋسسكوگو يسكۋسستۆا ۆ 30 شەديەۆراح» اتتى كورمە اشىلادى.

سونىمەن قاتار رەستاۆراسيا سالاسىنداعى ارىپتەستىك تە جاندانا ءتۇستى. قازاقستان تاراپى وسى باعىتتاعى مامانداردىڭ رەسەي ورتالىقتارى بازاسىندا تاعىلىمدامادان ءوتۋ باعدارلامالارىن جالعاستىرۋعا، سونداي-اق شەكارالاس اۋماقتارداعى مۋزەيلەرمەن كاتالوگتاۋ جانە ارحيۆ ءىسى بويىنشا بىرلەسكەن جۇمىستى تەرەڭدەتۋگە دايىن ەكەنىن ءبىلدىردى.

كينويندۋستريادا فەستيۆالدىك كورسەتىلىمدەردەن گورى فيلمدەردى بىرلەسىپ ءتۇسىرۋ مەن ىلگەرىلەتۋگە باسىمدىق بەرىلە باستادى. «روسكينو» وكىلى ورتاق پراكتيكالىق جوبالاردى جۇزەگە اسىرۋعا قىزىعۋشىلىق تانىتتى. ال، «قازاقفيلم» ۇلتتىق كينوستۋدياسى دايىندىق كەزەڭى اياقتالۋعا جاقىن قالعان «ۆرەميا» ءفيلمى بويىنشا جۇمىستى جالعاستىرۋعا ءازىر ەكەنىن راستادى. ءتۇسىرىلىم جۇمىستارى قازاقستان مەن رەسەي اۋماعىندا وتەدى دەپ جوسپارلانىپ وتىر. سونىمەن بىرگە رەسەيدىڭ مەملەكەتتىك كينوقورىندا ساقتالعان قازاق كينوسىنىڭ قۇندى مۇراسىن سيفرلاندىرۋ ءىسى قاتار جۇرگىزىلىپ جاتىر.

كەزدەسۋ بارىسىندا جاس رەسەيلىك جانە قازاقستاندىق كومپوزيتورلار اراسىنداعى كاسىبي تاجىريبە الماسۋ ماسەلەلەرى دە ءسوز بولدى. سونداي-اق، دجاز مۋزىكاسىن دامىتۋعا باسىمدىق بەرۋ جانە كونسەرتتىك الاڭدار ارقىلى ءوزارا ىقپالداستىقتى جەتىلدىرۋ جولدارى تالقىلاندى. حورەوگرافيا ونەرىن وركەندەتۋ ماسەلەسىنە دە ەرەكشە نازار اۋدارىلدى. بۇل باعىتتا بىرلەسكەن ءبىلىم بەرۋ باستامالارىن، تاعىلىمداما باعدارلامالارىن، شەبەرلىك ساباقتارىن جۇزەگە اسىرۋ، سونداي-اق ەكى ەلدىڭ بەيىندى اكادەميالارىندا قوس ديپلومدى دايارلاۋ جۇيەسىن ەنگىزۋ پەرسپەكتيۆاسى قاراستىرىلدى.

جيىن سوڭىندا ايدا بالايەۆا ايتىلعان بارلىق ۇسىنىس الداعى جۇمىستىڭ وزەگىنە اينالاتىنىن جەتكىزدى. سونداي-اق، ول 2027-2028 جىلدارعا ارنالعان ءوزارا ءىس-قيمىل جوسپارى بارلىق تاراپتىڭ ناقتى ۇسىنىستارىمەن تولىعا تۇسەتىنىنە سەنىم ءبىلدىردى.

كەزدەسۋ قورىتىندىسى بويىنشا قازاقستان رەسپۋبليكاسىنىڭ ۇلتتىق مۋزەيى مەن رەسەي فەدەراسياسىنىڭ رەسەي ەتنوگرافيالىق مۋزەيى اراسىندا ىنتىماقتاستىق تۋرالى مەموراندۋمعا قول قويىلدى. قۇجات تاقىرىپتىق كاتالوگتاردى بىرلەسىپ ازىرلەۋدى، عىلىمي جانە ادىستەمەلىك باعىتتاردى دامىتۋدى، سونداي-اق سۋرەتشىلەر، رەستاۆراتورلار جانە مۋزەي ءىسىنىڭ وزگە دە ماماندارى اراسىنداعى بايلانىستى نىعايتۋدى كوزدەيدى.

ق ر مادەنيەت جانە اقپارات مينيسترلىگىنىڭ باسپا ءسوز قىزمەتى