الماتى وبلىسىنىڭ اكىمى مارات سۇلتانعازييەۆ جۇڭگو حالىق رەسپۋبليكاسىنا ءىسساپارى كەزىندە «Xinjiang Commercial Logistics (Group) Co.، Ltd.» كومپانياسىنىڭ باسشىسى شەن سزينشەنمەن كەزدەستى. اتالعان كومپانيا ساۋدا جانە لوگيستيكا سالاسىندا زور الەۋەتكە يە. «ءبىر بەلدەۋ – ءبىر جول» باستاماسىن جۇزەگە اسىرۋعا ۇلكەن ۇلەس قوسىپ كەلەدى.
كەزدەسۋ بارىسىندا ەكى جاقتى ساۋدا-ەكونوميكالىق بايلانىس، ترانسپورتتىق-لوگيستيكالىق ينفراقۇرىلىم، حالىقارالىق تاسىمالداۋ، لوگيستيكانى سيفرلاندىرۋ جانە اگروونەركاسىپ ونىمدەرىن ەكسپورتتاۋ ماسەلەلەرى تالقىلاندى.
ءوز سوزىندە مارات ەلەۋسىز ۇلى كومپانيانىڭ قارقىندى دامۋىن جوعارى باعالايتىنىن اتاپ ءوتتى. الماتى وبلىسى جۇڭگو مەن ورتا ازيا اراسىنداعى نەگىزگى ترانسپورت جولدارىنىڭ قيىلىسىندا ورنالاسقانىن، شىڭجاڭ ۇيعىر اۆتونوميالىق اۋدانى ءۇشىن ستراتەگيالىق ماڭىزدى سەرىكتەس ەكەنىنە توقتالدى.
«دوستىق قارىم-قاتىناستىڭ ارقاسىندا الماتى وبلىسى مەن جۇڭگو ەلى اراسىنداعى تاۋار اينالىمى جىلداعى داستۇرگە ساي جوعارى دەڭگەيىن ساقتاپ كەلەدى. سوڭعى ءۇش جىل ىشىندە تاۋار اينالىمى تۇراقتى تۇردە 1 ملرد اقش دوللارىنان استى. بۇگىنگى تاڭدا وبلىستا جۇڭگو كاپيتالىنىڭ قاتىسۋىمەن 143 كاسىپورىن جۇمىس ىستەيدى. ءبىز ساۋدا-ەكونوميكالىق بايلانىستى ءارى قاراي نىعايتۋعا ۇلكەن ءمان بەرەمىز»، – دەگەن ايماق باسشىسى ەكى جاقتى بايلانىستىڭ ماڭىزدى باعىتتارىنا توقتالدى. ايتۋىنشا، ەڭ الدىمەن ترانسپورتتىق-لوگيستيكالىق ينفراقۇرىلىمدى دامىتۋ ماڭىزدى. بۇل باعىتتا الماتى وبلىسىندا زاماناۋي لوگيستيكالىق ورتالىقتار، قويما كەشەندەرى مەن مۋلتيمودالدى حابتار قۇرۋ كوزدەلىپ وتىر. سونىمەن قاتار حالىقارالىق تاسىمالداۋ سالاسىنداعى بايلانىستى ارتتىرۋعا باسىمدىق بەرىلدى. اتاپ ايتقاندا، «باتىس ەۋروپا – باتىس جۇڭگو» باعىتىنداعى مارشرۋتتاردى دامىتۋ، قۇرعاق پورتتار مەن شەكاراداعى وتكىزۋ پۋنكتتەرىنىڭ مۇمكىندىگىن ءتيىمدى پايدالانۋ ارقىلى ترانزيتتىك الەۋەتتى ارتتىرۋ جوسپارلانعان. ودان بولەك، لوگيستيكانى سيفرلاندىرۋ، ياعني زاماناۋي تەحنولوگيالار مەن پلاتفورمالاردى ەنگىزۋ ارقىلى جۇك تاسىمالداۋدى باسقارۋ جانە ەلەكتروندى ساۋدانى دامىتۋ دا نەگىزگى مىندەتتەردىڭ ءبىرى رەتىندە قاراستىرىلدى.
ايماق باسشىسى الماتى وبلىسى قازاقستانداعى اۋىل شارۋاشىلىعى قارقىندى دامىپ كەلە جاتقان وڭىرلەردىڭ ءبىرى ەكەنىن ايتتى. ەكولوگيالىق تازا اۋىل شارۋاشىلىعى ونىمدەرىن جۇڭگو جانە حالىقارالىق نارىققا شىعارۋ ءۇشىن كومپانيانىڭ لوگيستيكالىق جانە ساۋدا مۇمكىندىگىن پايدالانۋعا مۇددەلى ەكەنىن جەتكىزدى.
ءىسساپار بارىسىندا وبلىس دەلەگاسياسى «XINJIANG COMMERCIAL LOGISTICS (GROUP) Co.، Ltd.» كومپانياسىنىڭ ءتورت ەنشىلەس كاسىپورنىمەن تانىستى. ونىڭ قۇرامىنا جوعارى تەحنولوگيالىق جابدىقتارمەن اينالىساتىن «Xinjiang Machinery Research Institute Co.، Ltd.،» جەمىس-جيدەك پەن ورمان ونىمدەرىن شىعاراتىن «Xinjiang Fruit Industry Group»، ساپا ستاندارتتارى مەن ونەركاسىپتىك ساراپتامانى جۇرگىزەتىن «Xinjiang Standard Testing and Certification Company Limited»، سونداي-اق حالىقارالىق قۇرعاق پورت لوگيستيكاسى باعىتىندا جۇمىس ىستەيتىن شىڭجاڭ كومپانياسى كىرەدى.
جۇزدەسۋ ناتيجەسىندە حالىقارالىق تاسىمالداۋ سالاسىندا قازاقستانداعى ءىرى كومپانيالاردىڭ ءبىرى «Atasu Group» پەن شىڭجاڭ حالىقارالىق قۇرعاق پورت كومپانياسى قۇنى 270 ملن دوللار تۇراتىن مەموراندۋمعا قول قويدى. بۇل بىرلەسكەن جوبالاردى ىسكە اسىرۋعا، ۇزاق مەرزىمدى سەرىكتەستىكتى نىعايتۋعا جول اشادى.
