الماتىداعى №94 مەكتەپتە ۇزىلىسكە جەتپەي، دابىل قاعىلدى. سىرتقا ۇمتىلعان وقۋشىلار ءقاۋىپسىز جەرگە جينالدى. ايتسە دە، اپات ورنىندا قالىپ قويعاندارى دا بار. ولار - كومەككە ءزارۋ. بۇل - جاتتىعۋ شارتى بولاتىن. توتەنشەلىكتەر تالىمگەرلەرگە دەر كەزىندە كومەككە كەلە الدى ما؟ دايىندىعى قالاي؟
اپاتتى جاعدايدا قاعىلاتىن دابىلدى ەستىگەن مەكتەپ وقۋشىلارى جاپپاي سىرتقا ۇمتىلدى. باسىن سومكەمەن جاۋىپ العان ولار ءبىرىن-بىرى تاپتاماي، شاپشاڭ دالاعا شىقتى. ايتسە دە، كەيبىر وقۋشىلار نىساننىڭ ىشىنەن دەر كەزىندە شىعا الماي قالدى. توتەنشەلىكتەر عيمارتتى تولىقتاي يتپەن ءتىنتىپ، تابىلعانداردى 3ء-شى قاباتتىڭ تەرەزەسىنەن ءتۇسىردى.
زارە-قۇتى قاشقان وقۋشىلارعا العاشقى كومەك تە دەر كەزىندە كورسەتىلدى. سىرتقا شىققاندار توپ بولىپ تۇرا قالىپ، سىنىپتاستارىن تۇگەلدەي باستادى. قولدارىنا جاسىل ءتۇستى قاعازدى ۇستاعاندار وزدەرىنىڭ تۇگەل ەكەنىن بىلدىرسە، قىزىل ءتۇستى كورسەتكەندەر ارالارىنا ءالى دە ورالماعانداردىڭ بار ەكەنىن حابار بەرىپ تۇردى. بۇل ءتاسىل اپاتتى جاعدايدا اقپارات بەرۋدىڭ ەڭ وڭتايلى ءتاسىلى بولسا كەرەك.
«رەسەي فەدەراسياسىنىڭ كەمەروۆو قالاسىندا ءوتىپ جاتقان وقيعالار بويىنشا، وعان قوسا ءبىزدىڭ ءمينيستردىڭ بۇيرىعى بويىنشا، الماتى قالاسى بويىنشا بارلىق مەكەمەلەردە وسىنداي سەيسميكالىق وقۋ-جاتتىعۋلار جانە ورتكە قارسى جاتتىعۋلار جۇرگىزىلىپ جاتىر»، - دەدى الماتى قالاسى تجد ازاماتتىق قورعاۋ باسقارماسىنىڭ اعا-وفيسەرى بەكبولات بۇعابايەۆ.
وسىلايشا كەمەروۆوداعى قابىرعانى قايىستىرعان قايعىلى جاعداي كوپكە ساباق بولدى. «ساقتىقتا قورلىق جوق» دەيتىن ماماندار مۇنداي دايىندىقتى ۇدايى جۇرگىزىپ جاتقاندىقتارىن العا تارتتى. وسىنداي جاتتىعۋ جۇمىستارى وقۋشىلاردىڭ مەكتەپتەن تىس ۋاقىتتا دا اپاتتى جاعدايدا قاجەتىنە جاراپ جاتقانى جەتەرلىك.
«ماقساتى-بالالاردى دايىنداۋ، توتەنشە جاعداي مەن بەتپە-بەت كەزدەسكەندە ولاردىڭ قاۋىپسىزدىك مادەنيەتىن جوعارىلاتۋ. الاتاۋ اۋدانىندا ۇيدە ءورت العان كەزدە، 11 جاسار دانيار ساتىپالدى ۇلى ءوزىنىڭ جاستىعىنا قاراماستان، ەكى قارىنداسىن، ءىنىسىن ورتكە ورانىپ جاتقان بولمەدەن شىعارىپ العان ەكەن»، - دەدى الماتى قالاسى تجد رەسمي وكىلى ساندۋعاش بايمۇحامبەتوۆا.
جان-جاقتى قامتىلعان جاتتىعۋ ساباعى تەك بوستاندىق اۋدانىندا ءوتتى. شاراعا وقۋشىلاردان بولەك، 30-دان استام مەكتەپ ديرەكتورى مەن 28 بالاباقشانىڭ مەڭگەرۋشىسىنە دەيىن قاتىستى. بۇل جولى كورمەگەندى كورىپ، بىلمەيتىنىزدى سانامىزعا ءسىڭىرىپ قايتتىق دەيدى ولار.
«جاڭاشىلدىعى ول - مىناۋ تەرەزەدەن ءتۇسىرىلىپ جاتىر. ادامدار قۇتقارىلىپ جاتىر. سول ساتتەرى قىزىق بولىپ جاتتى. يتپەن ىزدەپ شىققانداي. ال ءبىز جالپى 3 قوڭىراۋمەن دالاعا بالالاردى شىعارۋ، ستاديوندا جيناۋدى بارلىق مەكتەپ بىلەدى»، - دەدى م.ۆ. لومونوسوۆ اتىنداعى № 38 قازاقستان-رەسەي گيمنازيانىڭ ديرەكتورى گۇلجان دوسايەۆا.
اپاتتتىڭ ايتىپ كەلمەيتىنى اقيقات. ايتسە دە، توتەنشە جاعدايعا ساقاداي ساي بولۋ ءاربىر مەكەمەنىڭ مىندەتى. بىلتىرعى دايىندىق بويىنشا، الماتىداعى بارلىق ءبىلىم وشاعى مەن مەكتەپكە دەيىنگى ءبىلىم بەرۋ مەكەمەسىندەگى توتەنشەلىكتەردىڭ تەكسەرىسى، ولاردىڭ 100 پايىز اپاتتى جاعدايعا توتەپ بەرە الاتىندىعىن انىق دەگەن ەدى. ەندى بيىل مامىر ايىنا دەيىن قالاداعى بارلىق نىسانداردا سەيسموجاتتىعۋ جۇمىستارى جۇرگىزىلمەك.
پىكىر قالدىرۋ