الماتىدا ورتەنگەن كوپقاباتتى ءۇي تۇرعىندارىنا اقشالاي كومەك كورسەتىلمەك.

كوكجيەكتە ورتكە ورانعان پاتەرلەر از ۋاقىتتا تولىققاندى جوندەلىپ ءبىتۋى ءتيىس. قالا اكىمى باۋىرجان بايبەك وسىلاي دەپ تاپسىرما بەردى. ءقازىر وقيعا ورىندا تەرگەۋ-تەكسەرۋ جۇمىستارى ءجۇرىپ جاتىر. 90-نان استام پاتەردى زاقىمداعان ءورتتىڭ نەدەن شىققانى ءالى بەلگىسىز. ال جەرگىلىكتى تۇرعىنداردىڭ ايتۋىنشا، جالىن ءبىرىنشى قاباتتان تۇتانعان. زارداپ شەككەن وتباسىلارعا جەرگىلىكتى بيلىك 240 مىڭ تەڭگەدەن كومەك كورسەتپەك.

93 پاتەرلىك ءۇيدىڭ التىنشى قاباتى قاتتى زاقىمدانعان. مىنا ءبىر بولمەلى پاتەردىڭ ىشىنەن ءىلىپ الار زات تاپپايسىز. توڭازىتقىش، تەليەۆيزور، تەلەفون سىندى وزگەدە تۇرمىستىق تەحنيكالار ەرىپ كەتكەن. ال ءۇيدىڭ قوجايىندارى بولسا قارا كۇلگە اينالعان دۇنيەلەرىن كورۋگە باتپاي، جۇرەگى داۋالاماي، دالادا ءجۇر. 

كەشە كەشكە شىققان ءورت كەزىندە 300-دەن استام ادام ەۆاكۋاسيالانعان ەدى. ءبىراق تۇرعىنداردىڭ ءبىرازى ءورت شىققاندا ۇيدە ەمەس، جۇمىستا بولعان ەدىك دەيدى. تىپتەن پاتەرى جانىپ كەتكەن جانداردىڭ ىشىندە يپوتەكالىق قارىزدان ءالى قۇتىلماعان قاۋىمدا بار.

كوكجيەكتەگى قورشاۋعا الىنعان ۇيگە ادامدار تەك ارنايى رۇقساتپەن عانا كىرىپ، جارامدى زاتتارى مەن قۇجاتتارىن الىپ جاتىر. عيمارات گاز، توق، جارىقتان تولىق اجىراتىلدى. دەرەۋ قۇرىلعان ارنايى كوميسسيا شىعىندى ەسەپتەۋگە كىرىسكەن. 

«قالا اكىمىنىڭ ارنايى تاپسىرماسى بويىنشا ءۇيدى جىلدام قالپىنا كەلتىرۋ جۇمىستارى جۇرگىزىلەدى. جوبالاۋشى ينستيتۋت ماماندارى، قۇرىلىسپەن اينالىسقان مەكەمەلەردى شاقىرامىز. «كوكجيەك» شاعىن اۋدانىنداعى بۇل ۇيلەردى سالۋ 2007 جىلى باستالىپ، 2010 جىلى اياقتالعان»، - دەدى الماتى قالاسى جەتىسۋ اۋدانىنىڭ اكىمى  مۇحتار تاجىابايەۆ.

پاتەرى ورتەنگەن تۇرعىنداردى مەكتەپ اسحاناسىنان  تەگىن تاماقتاندىرۋ مەن سپورت زالدا جاتىن ورىن قاراستىرىلعان. ءبىراق ۇيىمداستىرۋشىلار كەشەدەن بەرى بىردە ءبىر ادام قونۋعا كەلمەي، تۋىس، تانىستارىنا كەتتى دەيدى.  ال اۋدانداعى الەۋمەتتىك جۇمىسپەن قامتۋ ءبولىمىنىڭ ماماندارى زارداپ شەككەن ءار ءبىر وتباسىنا 240 مىڭ تەڭگە كولەمىندە اقشالاي كومەك كورسەتپەك.