الماتىدا تاستاياقتان الەم چەمپيوناتى ءوتىپ جاتىر. جەر جاھاننان كەلگەن حاس شەبەرلەر «ديناميكالىق پيراميدا» بويىنشا كىم مىقتىدان كىل مىقتىنى انىقتاۋدا.

27 جاستاعى ءاليحان قارانەيەۆ 3 دۇركىن الەم چەمپيونى. بيلياردقا كىشكەنتايىنان قىزىعادى. وسى جارىستا دا توپ جارام دەپ وتىر. الايدا، ءالسىز قارسىلاستىڭ جوق ەكەنىن ايتادى. ءبىراق ءدۇبىرلى دودانىڭ الماتىدا ءوتىپ جاتقانى - قوسىمشا كۇش بەرەدى دەيدى.

«بۇل جارىستى جەڭۋ - مەن ءۇشىن ۇلكەن مارتەبە. سوندىقتان مەن چەمپيون بولۋىم ءۇشىن بارىمدى سالامىن. جانكۇيەرلەردىڭ ءۇمىتىن اقتايمىز دەپ ويلايمىن. قازاقستان وسى چەمپيوناتتا كوماندالىق ەسەپتە ءبىرىنشى ورىن الىپ، كۋبوكتى وزىمىزدە الىپ قالۋىمى كەرەك. ءدۇبىرلى دوداعا الەمنىڭ كىل مىقتىلارى كەلگەن. ءالسىز دەپ قاراۋعا بولمايدى. ءارقايسىسىنا تىڭعىلىقتى دايىندىقپەن شىعامىن»، - دەدى بيلياردتان الەم چەمپيونى ءاليحان قارانەيەۆ.

قازاقستان بيليارد فەدەراسياسى ءاليحاننان وزگە دە سپورتشىلارىمىزعا ۇلكەن سەنىم ارتامىز دەيدى. وتانداستارىمىزدىڭ وسال ەمەس ەكەنىن ايتادى.

«ءبىزدىڭ ۇلتتىق قۇرامانىڭ دايىندىعى جوعارى دەڭگەيدە. سوندىقتان جەڭىسكە جەتەمىز دەگەن ويدامىز. جارىسقا ەلىمىزدىڭ اتىنان ەكى الەم چەمپيوندارى قاتىسىپ جاتىر. ءاليحان قارانەيەۆ پەن ەرنار شىمبايەۆ وتكەن جارىستاردا كەرەمەت كورسەتكىشتەرگە قول جەتكىزدى. بىرنەشە دۇركىن الەم چەمپيوندارىن جارىس جولىنان شىعارىپ تاستاعان بولاتىن. ءبىز بۇل جىگىتتەردەن تەك التىن كۇتەمىز»، - دەدى ق ر بيليارد فەدەراسياسىنىڭ ۆيسە-پرەزيدەنتى ماقسات داۋىلبايەۆ.

الەم بىرىنشىلىگىنە 19 مەملەكەتتەن كەلگەن 100-گە جۋىق سپورتشىلار ءوزارا مىقتىنى انىقتايدى. جارىستىڭ جۇلدە قورى 12 ملن تەڭگەنى قۇرايدى. مىقتى كوماندالار قاتارىندا ءبىزدىڭ قۇرامادان بولەك رەسەي، بەلارۋس، ۋكراينا جانە قىرعىزستان بار.

«مەن بۇل جارىستا فاۆوريت دەپ 10 مىقتى سپورتشىنى اتار ەدىم. قازاقستاندىق قاتىسۋشىلاردىڭ اراسىندا مىقتىلار كوپ. ونىڭ ۇستىنە ءوز جەرلەرىندە بولىپ جاتقاننان كەيىن، وڭايىراق بولادى دەپ ويلايمىن. سپورتشىلار پسيحولوگيالىق تۇرعىدا جوعارى دايىندىقپەن شىعۋلارى كەرەك»، - دەدى رف بيليارد سپورت فەدەراسياسىنىڭ ۆيسە-پرەزيدەنتى الەكساندر پۋحلەنكو.

ءدۇبىرلى دوداعا 64 ەرلەر جانە 32 ايەلدەر كوماندالارى قاتىسادى. الەم بىرىنشىلىگى الماتىدا 8 ساۋىرگە دەيىن جالعاسادى. ايتا كەتەيىن، بايراقتى باسەكە بالۋان شولاق اتىنداعى سپورت سارايىندا وتەدى.