كوكتەم كەلسە كورىكتى قىزداي قۇلپىرىپ سالا بەرەتىن الماتىنىڭ ءار بۇرىشىندا، مىنە، ءبىر اي بويى ءاز-ناۋرىز تويلانىپ جاتىر. اسىرەسە، ءبىلىم شاڭىراقتارى مەن مەكتەپكە دەيىنگى مەكەمەلەردەگى ءوتىپ جاتقان مەرەكەلەر ءتىپتى ەرەكشە مازمۇندا. سونداي ءبىر تاماشا مەرەكە اۋەزوۆ اۋدانىنداعى №97 جالپى ءبىلىم بەرەتىن مەكتەپ اۋلاسىندا ءوتتى. ءبىر شاڭىراق استىندا بىرنەشە ۇلت بالالارى ءتاتۋ-تاتتى ءومىر ءسۇرىپ، ءبىلىم الىپ جاتىر. سوندىقتان ولاردىڭ نەگىزگى تاقىرىبى ءاز-ناۋرىز بەن ۇلى دوستىققا ارنالدى.
كەڭ اۋلا الىپ كيىز ءۇي ىسپەتتى بەزەندىرىلگەن. التىباقانعا تەربەلگەن وقۋشىلاردىڭ ءجۇزى ءتىپتى شات. اسەم اۋەن تەك مەكتەپ اۋلاسىن عانا كەرنەگەن جوق، كورشى ۇيلەردىڭ تۇرعىندارى دا مەرەكەنى سىرتتاي قىزىقتاپ قاراپ تۇردى. سونىمەن، جاڭارۋ مەن جاسامپازدىقتىڭ باستاۋى، دوستىق پەن ىنتىماقتىڭ، داۋلەتتى تىرشىلىك اتاۋلىنىڭ بۇلاق كوزى بولعان ءاز-ناۋرىز تويى باستالىپ، كوكتەمءنىڭ كەلگەنىن «سۇيىنشىلەپ» ءبىلدىرگەن، تەاترلاندىرىلعان كورىنىس كورسەتىلدى. بارشا مەرەكە قوناقتارى مەن مەكتەپ ۇجىمىن وسىناۋ ءبىلىم شاڭىراعىنىڭ باسشىسى زويا قويشىبايەۆا قۇتتىقتادى.
– قازاق حالقى ەرتەدەن-اق ناۋرىز كەلدى، قۇت كىردى، ىرىس كەلدى» دەپ كوكتەمنىڭ كەلگەنىنە قۋانىپ، بىرلىكتىڭ، بەرەكەنىڭ كەزەڭى باستالدى دەپ ايرىقشا قۇرمەتتەگەن. شىنىمەن دە كۇننىڭ كوزىنىڭ جىلۋى بارشامىزعا كوتەرىڭكى كوڭىل-كۇي عانا سىيلاپ قويعان جوق، بىلىمگە، ەڭبەككە دەگەن ىنتامىزدى دا ارتتىرا تۇسكەندەي. بۇگىنگى مەرەكە ۇستىندە جاقىندا عانا «التىن قولدار» دەپ اتالاتىن حالىقارالىق ساندىك قولدانبالى بايقاۋعا قاتىسىپ، ءبىرىنشى دارەجەلى جۇلدەنى جەڭىپ العان 11-سىنىپ وقۋشىسى نيكيتا مالوفەيەۆكە ارنايى ديپلومدى تابىس ەتكەلى تۇرمىن. ءبىزدىڭ مەكتەپ بۇگىن وسىنداي قوس قۋانىشتى تويلاپ وتىر، – دەگەن زويا قاشقىنباي قىزى جەڭىمپازبەن بىرگە ونىڭ جەتەكشىسى و.تيموششەنكونى دا قۇتتىقتادى.
مەكتەپتىڭ حور ۇجىمى «عاجايىپ الەم» ءانىن ورىنداسا، 11-سىنىپ وقۋشىلارى «ناۋرىز» اتتى فلەشموب ءبيدى بيلەدى. مەكتەپتىڭ 5-سىنىبىندا وقيتىن كىشكەنتاي بيشىلەر «كالينكا» ءبيىن، 6 «ا» سىنىپ وقۋشىسى ەكاتەرينا فوكينا «حورەزم» ءبيىن، «ەدەلۆەيس» بي توبى «پاۆليندەر» ءبيىن، اناستاسيا سەمەنوۆا «مەن قازاقتىڭ قىزىمىن» ءانىن، 5 «ا» سىنىپ وقۋشىسى اناستاسيا ماچنيەۆا ىزگى تىلەگىمەن، 7-سىنىپ وقۋشىلارى ادەمى بيىمەن، 9-سىنىپ وقۋشىلارى «سۇگىر» ءبيىن بيلەپ، مەرەكەنىڭ كوركىن كىرگىزدى. ىزگىلىككە تولى مەرەكە وتە كوڭىلدى ءارى مازمۇندى بولىپ ءوتتى. ۇلتتىق ويىندارعا دا كەزەك بەرىلدى. اسىرەسە، 9–11-سىنىپ وقۋشىلارىنىڭ «كىم جىلدام جەيدى؟» جارىسى وتە قىزىقتى ءارى تارتىمدىلىعىمەن ەستە قالدى. مەكتەپتىڭ دەنەشىنىقتىرۋ ءپانى بىرلەستىگىنىڭ ۇيىمداستىرۋىمەن وقۋشىلار اراسىندا قازاقشا كۇرەس، توعىزقۇمالاق، بايگە، تىماق ۇرۋ سياقتى ۇلتتىق ويىنداردىڭ جارىسى دا ءاز-ناۋرىزدىڭ قىزىقتى وتۋىنە يگى اسەر ەتتى. مەكتەپ وقۋشىلارىنىڭ مەرەكەسىنە ارنايى كەلىپ قاتىسىپ وتىرعان اتا-انالاردىڭ اق تىلەگىن قادىرمەندى قاريا، اسىل اجە باتا بەرىپ جەتكىزدى. ۇلتتىق كيىم كيگەن ارۋ قىزدار شاشۋ شاشىپ، كەلگەن جىلدى قارسى الۋدىڭ ىرىمىن جاسادى.
رايا ەسكەندىر
الماتى اقشامى
