بيىلعى رامازان ايىندا بەرىلەتىن ءپىتىر ساداقا مولشەرى انىقتالدى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ. 

ءتورالقا ءماجىلىسى مۇشەلەرىنىڭ ءبىراۋىزدان قابىلدانعان شەشىمىمەن بيىلعى ءپىتىر ساداقا مولشەرى — 300 تەڭگە بولىپ بەكىتىلدى. ايتا كەتەيىك، بىلتىر دا ءپىتىر ساداقا وسى مولشەردە بولعان ەدى. 

ءپىتىرساداقانىڭ مولشەرى ءار وبلىستاعى بيدايدىڭ باعاسى ەسكەرىلىپ، ورتاق مولشەرمەن بەكىتىلەدى.

ءپىتىر ساداقانى قۇرمانىڭ، مەيىزدىڭ، ارپانىڭ قۇنىمەن دە بەرۋگە بولادى.

ەگەر ءپىتىر ساداقانى بيدايمەن بەرەتەن بولساڭىز، ءار ادام ءۇشىن جارتى ساع. ال جارتى ساع 1 كەلى 625 گراممعا تەڭ. اقشامەن ەسەپتەگەندە (ءار ايماقتىڭ بيداي باعاسىنا قاراي) 1 كەلى 625 گراممنىڭ قۇنىن بەرۋ كەرەك. قۇرما، مەيىز، ارپادان دا ءبىر ساعتىڭ (3،25 كگ) قۇنىن بەرۋ قاجەت.

ءپىتىر ساداقانى رامازان ايىنىڭ ءبىرىنشى كۇنىنەن ورازا ايت نامازىنا دەيىن بەرۋگە بولادى.

قمدب بەكىتكەن 2018 جىلعى ءدىني كۇندەر كۇنتىزبەسىنە سۇيەنسەك، وسى جىلى رامازان ايى مامىردىڭ ون التىسىنا سايكەس كەلىپ تۇر. ال 14 ماۋسىمدا ورازانىڭ سوڭعى كۇنى. ماۋسىمنىڭ 9-نان 10-نا قاراعان ءتۇنى — ءقادىر ءتۇنى.

ورازا ايت 15 ماۋسىمدا، ال قۇربان ايت 21 تامىزدا باستالادى.