قازاقستاندىق بوكسشى دانيار ەلەۋسىنوۆتىڭ مەنەدجەرى زيا الييەۆ وليمپيادا چەمپيونىنىڭ كەلەسى جەكپە-جەگىنىڭ وتەتىن ۋاقىتىن اتادى، دەپ حابارلايدى Vesti.kz.

الييەۆتىڭ ايتۋىنشا، كەلەسى جەكپە-جەك 6 ماۋسىمدا لوندوندا وتەدى.

"قارسىلاستاردى تاڭداۋ كەزىندە - ءبىز مىقتىلاردى تاڭدادىق، ءبىراق دانياردىڭ ولاردان اساتىنىن بىلدىك. كەلەسى قارسىلاس تا وسال بولمايدى دەپ ويلايمىن. مىقتىراق. تاجىريبەسى مولىراق. ءبىراق، دانيار ودان دا اسىپ تۇسەدى دەگەن ويدامىن. ەرتەڭ فلوريدادا بولامىز، دايىندىق باستالادى. دايىندىققا ءۇش اپتامىز بار - سوڭعى اپتاسىندا لوندوندا بولامىز. جەرسىنۋ قاجەت. ساعاتتىق بەلدەۋ دە باسقا. بارلىعى جاقسى بولادى، دەپ ويلايمىن"، - دەدى الييەۆ.

ەسكە سالا كەتەيىك،  29 ساۋىردە وليمپيادا چەمپيونى قازاقستاندىق دانيار ەلەۋسىنوۆ كاسىپقوي بوكستاعى العاشقى جەكپە-جەگىندە قارسىلاسى نوا كيددتى نوكاۋتقا ءتۇسىردى. ەلەۋسىنوۆ - نوا كەزدەسۋى التى راۋندقا ەسەپتەلگەن ەدى، الايدا ءۇشىنشى راۋندا اياقتالدى. 27 جاستاعى قازاقستاندىق قارسىلاسىن نوكداۋنعا ءتۇسىرىپ، كەيىن سوققىسىن ۇدەتكەن ەدى. ەكىنشى نوكداۋننان كەيىن رەفەري ەسەپ الىپ، ەلەۋسىنوۆكە تەحنيكالىق نوكاۋتپەن جەڭىستى بەردى.