بارشا مۇسىلمان قاۋىمى ءۇشىن قاسيەتتى رامازان ايى قارساڭىندا مەملەكەت باسشىسى ەلوردالىق «سارىارقا» اۋدانىندا ورنالاسقان جاڭا مەشىتكە باردى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

پرەزيدەنتكە مەشىتتىڭ سالىنۋ بارىسى، سونداي-اق وسى عيماراتتى ەلەكتر قۋاتىمەن جانە جىلۋمەن قامتاماسىز ەتۋ ءۇشىن پايدالانىلاتىن بالامالى ەنەرگيا كوزدەرى جونىندە مالىمدەلدى.

ەسىل وزەنىنىڭ وڭ جاعالاۋىندا ورنالاسقان مەشىتتىڭ قۇرىلىسى 2016 جىلى باستالدى. جاڭا مەشىت قايىرىمدىلىق ماقساتپەن جينالعان قاراجات ەسەبىنەن تۇرعىزىلدى. مەشىت عيماراتى ءداستۇرلى ورنەكتەر مەن دەكوراتيۆتى ەلەمەنتتەر قولدانىلا وتىرىپ، پوستمودەرنيزم ستيلىندە سالىنعان. نەگىزگى عيمارات كۇردەلى ءارى جارتىلاي سفەرالىق نىساندى ەلەستەتەدى. ونىڭ قابىرعالارى ءۇشبۇرىشتانا سۇيىرلەنىپ، ديامەترى 26 مەترلىك كۇمبەزبەن جالعاسقان. مەشىتتىڭ سىرتقى ديزاينى گۇلدى ءارى الماستىڭ قىرلارىن ەسكە سالادى.

مەشىتتىڭ باستى عيماراتىنىڭ سولتۇستىك جاعىندا ورنالاسقان مۇنارانىڭ بيىكتىگى – 43،5 مەتر. ول «قالام» – «قاسيەتتى قاۋىرسىن» تۇرىندە بوي كوتەرگەن.

جاڭا مەشىتتى ەنەرگيا قۋاتىمەن قامتاماسىز ەتۋ ءۇشىن پايدالانىلاتىن بالامالى ەنەرگيا كوزدەرى قاجەتتى مولشەردەن ءۇش ەسە كوپ ەلەكتر قۋاتىن وندىرەدى. جاڭا مەشىت 750 ادامعا لايىقتالعان.

مەشىت عيماراتىنىڭ اۋدانى – 2248 شارشى مەتر. ورنالاسقان جەردىڭ اۋدانى – 1،44 گا.