ءال-فارابي اتىنداعى قازۇۋ 2020 جىلعا دەيىن بۇۇ «اكادەميالىق ىقپال» باعدارلاماسىنىڭ عالامدىق حابىنا جەتەكشىلىك ەتەتىن بولدى. بۇل شەشىم ۋنيۆەرسيتەتتىڭ تۇراقتى دامۋ سالاسىنداعى تابىستى باسشىلىق قىزمەتىنىڭ قورىتىندىسى نەگىزىندە قابىلداندى.

بىرىككەن ۇلتتار ۇيىمىنىڭ نيۋ-يوركتەگى شتاب-پاتەرىندە قوعامدىق اقپارات دەپارتامەنتىنىڭ ديرەكتورى، بۇۇ «اكادەميالىق ىقپال» باعدارلاماسىنىڭ جەتەكشىسى رامۋ داموداران ءال-فارابي اتىنداعى قازۇۋ رەكتورى، اكادەميك عالىم مۇتانوۆقا ءتيىستى سەرتيفيكاتتى تابىس ەتتى.

2014 جىلدان بەرى عالامدىق حابتى باسقارىپ كەلە جاتقان قازۇۋ جۇمىسىن بۇۇ جوعارى باعالادى. ر. داموداران ۋنيۆەرسيتەتتىڭ وزىنە جۇكتەلگەن ميسسيانى ءتيىمدى ورىنداعانىن اتاپ ءوتتى. سونداي-اق جەتەكشى قازاقستاندىق جوعارى وقۋ ورنىنىڭ ۇجىمىنا زور العىس ءبىلدىرىپ، ادامزاتتىڭ جاھاندىق ماسەلەلەرىن شەشۋگە قوسقان ۇلەسى ءۇشىن شەكسىز ريزاشىلىعىن جەتكىزدى.

«ۋنيۆەرسيتەت بۇۇ-نىڭ ماڭىزدى ارىپتەسى جانە تۇراقتى دامۋ بويىنشا كوپتەگەن حالىقارالىق شارالاردىڭ باستاماشىسى رەتىندە اكادەميالىق قاۋىمداستىقتى ولاردى ىسكە اسىرۋعا بەلسەندى تۇردە تارتىپ، الەمدىك دەڭگەيدەگى جوبانى باسقارۋدا وزىق ۇلگى كورسەتۋدە. قازۇۋ وكىلەتتىكتەرىن 2020 جىلعا دەيىن ۇزارتۋ تۋرالى شەشىم زاڭدىلىق ءارى قازاقستاننىڭ ۇلكەن جەتىستىگى بولىپ تابىلادى. بۇل – حالىقارالىق قاۋىمداستىق مۇددەلەرىنە ساي جانە بۇۇ-نىڭ جوعارى سەنىمىنىڭ كورسەتكىشى»، – دەدى رامۋ داموداران.

          بۇۇ-نىڭ «اكادەميالىق ىقپال» باعدارلاماسى ادامزات وركەنيەتىنىڭ دامۋىن قامتاماسىز ەتۋدىڭ ون قاعيداسىن جۇزەگە اسىرۋ ماقساتىندا الەم ۋنيۆەرسيتەتتەرىن بىرىكتىرەدى.