بۇگىن وڭتۇستىك قازاقستان وبلىسىنىڭ اكىمى ج.تۇيمەبايەۆ قازاقستانداعى جۇڭگو حالىق رەسپۋبليكاسى شەنسي پروۆينسياسى ۇكىمەتى وكىلدىگىنىڭ باسشىسى چەن حە باستاپ كەلگەن ينۆەستورلارمەن كەزدەستى. باس قوسۋدا تاراپتار ەكى ەل اراسىنداعى ەكونوميكالىق بايلانىستى ارتتىرۋ، بىرلەسكەن جوبالار قۇرىپ، وبلىس اۋماعىندا كاسىپورىندار اشۋ جايىن تالقىلادى.

كەزدەسۋدە وبلىس اكىمى قوناقتاردى ءوڭىرىمىزدىڭ ەكونوميكالىق الەۋەتىمەن تانىستىرا كەلە، ءوندىرىس ورىندارىن اشۋعا نيەتتى ينۆەستورلارعا بارىنشا جاعداي جاسالاتىنىن جەتكىزدى.

«وزدەرىڭىز بىلەتىندەي، قازاقستان مەن جۇڭگو اراسىندا ستراتەگيالىق بايلانىس ورناعان. ناتيجەسىندە ەكى ەل اراسىنداعى تاۋار اينالىم 10،4 ملرد. اقش دوللارىن قۇرادى. ءبىر عانا ءبىزدىڭ وبلىستىڭ وزىندە قىتايلىق كومپانيالاردىڭ قاتىسۋىمەن 5 بىردەي جوبا جۇزەگە اسىپ وتىر. بولاشاقتا وزدەرىڭىزبەن ديپلوماتيالىق قارىم - قاتىناستى نىعايتا وتىرىپ، ينۆەستيسيالىق جوبالاردى جۇزەگە اسىرامىز دەگەن ويدامىز»، – دەدى جانسەيىت قانسەيىت ۇلى.

ءوز كەزەگىندە قوناقتار وبلىسىمىزدا قورعاسىن جانە مىرىش قالدىقتارىن قايتا وڭدەيتىن زاۋىت سالۋعا نيەتتى ەكەنىن جەتكىزدى. جالپى قۇنى 4،8 ملرد. تەڭگەنى قۇرايتىن جوبا جىلىنا 300 مىڭ توننا قالدىقتى وڭدەۋگە قاۋقارلى. زاۋىت ىسكە قوسىلسا، 100-دەن استام جاڭا جۇمىس ورنى اشىلاتىن بولادى.

سونداي-اق، ءوڭىر باسشىسى قىتايلىقتاردى ەكى جاقتى مەموراندۋم تۇزۋگە شاقىردى. وسىنىڭ نەگىزىندە وبلىسىمىزدا وندىرىلەتىن اۋىل شارۋاشىلىق ونىمدەرىن قىتايعا ەكسپورتتاۋ جايىن اقىلداستى. ودان بولەك، ەلەكتر قۋاتىمەن جۇرەتىن كولىك شىعاراتىن زاۋىتتى وڭتۇستىكتەن سالۋدى ۇسىندى. قوناقتار بۇل ۇسىنىستارعا قىزىعۋشىلىق تانىتىپ، اتالعان جوبالاردى بىرگە جۇزەگە اسىرۋعا دايىن ەكەنىن ايتتى.

جيىن سوڭىندا قوس تاراپ بىر-بىرىنە سىي-سياپات جاساپ، ەستەلىككە سۋرەتكە ءتۇستى.