اقتوبەدە 31 جاستاعى يۋريي ۆاسيليەۆتى ءوز ايەلىنىڭ ءسىڭلىسىن زورلادى دەگەن ايىپپەن سوت 11 جىلعا باس بوستاندىعىنان ايىردى.

سوت ۇكىم شىعارسا دا، ءيۋرييدىڭ جۇبايى ونىڭ كىناسىز ەكەنىن العا تارتادى.

«انام ءاۋ باستان-اق وتباسىن قۇراتىنىمىزعا تۇبەگەيلى قارسى بولدى. ءتىپتى تويىمىزدىڭ وزىندە كۇيەمىم مەنى تالدىقورعانعا الىپ كەتەدى دەپ قورقاتىنىن ايتقان بولاتىن»،-دەيدى سوتتالعان ەر ادامنىڭ جۇبايى يرينا.

يرينا مەن يۋريي مارتۇق اۋدانىنداعى اۋىلداردىڭ بىرىندە يرانانىڭ اكە-شەشەسىنىڭ ۇيىندە تۇرعان. ولارمەن بىرگە تاعى ەكى كامەلەتكە تولماعان قىزدار بولعان.

«ءسىڭلىم بۇرىننان-اق ەرسى مىنەز-قۇلىق تانىتاتىن. ۇيگە ماس كۇيىندە كەلىپ جۇرەتىن، ءتىپتى ءبىز كۇيەۋىم ەكەۋمىز ول ۇيگە كوشىپ كەلمەي تۇرىپ ول جىنىستىق قاتىناستا بولعانىنا سەنىمدىمىن»،-دەيدى يرينا.

يرينانىڭ ايتۋىنشا، ونىڭ كۇيەۋىن قىزدىڭ وتباسى ءبىرىنشى ساتتەن-اق قابىلداماعان.

«اتا-انام وعان داۋىس كوتەرىپ، ءۇي شارۋاسىنداعى جۇمىستاردى جاساۋىن تالاپ ەتەتىن. الايدا كۇيەۋىم جانجالعا جاقىن ەمەس، ءار ۋاقىتتا ۇندەمەي بارىنە توزە بەرەتىن»،-دەيدى ول.

كەيىن ەرلى-زايىپتىلار تالدىقورعانعا كوشىپ كەتكەن سوڭ، سول جەردەگى ۇيلەرىنە پوليسيا كەلىپ ءيۋرييدى الىپ كەتكەن. بەلگىلى بولعانداي، يرينانىڭ اناسى ءيۋرييدىڭ ۇستىنەن ارىز جازعان.

«انامنىڭ ارىزىنا سايكەس، مەنىڭ كۇيەۋىم ءسىڭلىمدى بىرنەشە رەت زورلاعان، ءتىپتى، تاعى ءبىر بويجەتكەنگە جۇدىرىق جۇمساعان»،-دەيدى ايەل.

سوتتىڭ شەشىمى بويىنشا، يۋريي ۆاسيليەۆ قىزعا قاتىستى قىلمىستىق ىستەر جاسادى دەگەن ايىپپەن 11 جىلعا باس بوستاندىعىنان ايىرىلدى.

«ولاردىڭ ايتۋىنشا، يۋريي ءسىڭلىمدى ەكى جىلعا جۋىق زورلاپ كەلگەن. الايدا ءبىزدىڭ ەكەۋىمىزدىڭ وتباسىن قۇرعانىمىزدىڭ وزىنە ەكى جىل تولعان جوق. ول اكە-شەشەمنىڭ ۇيىندە ءجيى بولمايتىن. بولسا دا، تەك مەنىڭ قاسىمدا جۇرەتىن.

سونىمەن بىرگە، بۇل جاعدايلاردان كەيىن ءسىڭلىم ساباققا بارماي ءجۇردى دەلىندى. ءبىراق مەكتەپتىڭ كەلىپ-كەتۋ جۋرنالىندا ول كەلدى دەپ تىركەلىپ تۇر، دەمەك ساباققا كەلىپ جۇرگەن»،-دەيدى يرينا.

ونىڭ ايتۋىنشا، اناسى قىزداردى يۋرييگە قارسى ارىز جازۋعا يتەرمەلەگەن. سوتتىڭ شەشىمىن ادىلەتسىز دەپ تاپقان يرينا بۇل جاعدايدى باق-قا جەتكىزۋگە شەشىم قابىلداعان.