قازاقستان ۇلتتىق بانكىنىڭ ءتوراعاسى دانيار اقىشيەۆ استانادا ق ر پارلامەنتى سەناتىنىڭ وتىرىسىندا سويلەگەن سوزىندە "7-20-25" باعدارلاماسىنا قاتىسقىسى كەلەتىن ازاماتتارعا ءبىرقاتار ۇسىنىمدار بەردى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

"ءبىرىنشى، ۇلتتىق بانك باسشىسىنىڭ ايتۋىنشا باعدارلاماعا قاتىسۋشى ساتىپ العىسى كەلەتىن تۇرعىن ءۇيدى تاڭداۋعا ءتيىس. باعدارلامادا تۇرعىن ءۇيدىڭ شەكتى قۇنى بەلگىلەنەتىن بولادى. ماسەلەن، استانا، الماتى، اقتاۋ جانە اتىراۋ سياقتى قالالاردا تۇرعىن ءۇيدىڭ ەڭ جوعارعى قۇنى 25 ميلليون تەڭگە، باسقا وڭىرلەر ءۇشىن - 15 ميلليون تەڭگە بولادى. باستاپقى كەزەڭدە تەك باستاپقى تۇرعىن ءۇيدى ساتىپ الۋعا عانا وتىنىشتەر قارالاتىن بولادى دەپ بولجانىپ وتىر"، - دەيدى اقىشيەۆ.

ەكىنشىدەن، ونىڭ ايتۋىنشا، باعدارلاماعا قاتىسقىسى كەلەتىن ازامات ءوتىنىش پەن قاجەتتى قۇجاتتاردى الىپ بانككە كەلۋى ءتيىس. "ءبىز جاقىندا قاجەتتى قارجىلىق كورسەتكىشتەرى بار، فيليالدىق جەلىسى دامىعان جانە ازاماتتارعا قىزمەت كورسەتۋگە جاعدايى بار بانكتەردى، سونداي-اق قاجەتتى قۇجاتتاردىڭ بازالىق تىزبەسىن انىقتايمىز"، - دەپ اتاپ ءوتتى ۇلتتىق بانك باسشىسى.

سونىمەن قاتار ول قاتىسۋشىنىڭ كرەديتكە قىزمەت كورسەتۋ ءۇشىن قاجەتتى كىرىسىنىڭ بولۋى، سونداي-اق مەنشىك قۇقىعىندا تۇرعىن ءۇيىنىڭ بولماۋى قاجەت ەكەنىن ايتتى.

"ۇلتتىق بانك اتالعان قاعيدالاردى ءتۇسىندىرۋ ءۇشىن بارلىق كۇش-جىگەرىن سالادى جانە حالىقپەن بەلسەندى جۇمىس جاساۋعا دايىن"، - دەپ ءسوزىن قورىتىندىلادى ول.