2018 جىلعى مامىر ايىنىڭ 8ء-ى مەن 19 ارالىعىندا «رۋحاني جاڭعىرۋ» باعدارلاماسى اياسىندا 71 حالىقارالىق كانن كينوفەستيۆالىندە، وتاندىق كينويندۋستريا ونىمدەرى ۇسىنىلاتىن «قازاقستاننىڭ ۇلتتىق پاۆيلونى» ءوز جۇمىسىن باستايدى. اتالعان ءىس-شارالار قازاق ۇلتتىق ونەر ۋنيۆەرسيتەتى مەن استانانىڭ 20-جىلدىعىنا وراي جاسالعالى وتىر.

پاۆيلوندا حالىقارالىق «ەۋرازيا» كينوفەستيۆالىنىڭ پرەزەنتاسياسى وتەدى. اتاپ ايتار بولساق: «ەۋرازيا» كينوفەستيۆالىنىڭ اكىمشىلىك باسقارۋ توبىن، باعدارلاماسىن، قازىلار القاسى مۇشەلەرىن تانىستىرۋ، ەۋرازيالىق كينوجوبالاردىڭ رىنوگىن وتكىزۋ، وتاندىق فيلمدەردى تاراتۋ بويىنشا ديستريبيۋتەرلىك كومپانيالارمەن كەزدەسۋ، قازاقستان كينومەكتەپتەرىن تانىستىرۋ، «ەۋرازيا» حكف كارتينالاردى ىرىكتەۋ، ق ر كينەماتوگرافيستەرىنىڭ قاتىسۋىمەن پرەسس-بريفينگتەر جاساۋ جانە باسقا دا ءىس-شارالاردى اتقارۋ.  

وڭتۇستىك-شىعىس جەرورتا تەڭىزى جاعالاۋىندا وتەتىن بەدەلدى كينوفورۋمداعى قازاقستاننىڭ پاۆيلونى بيىل ەكىنشى رەت اشىلماق. بۇل جىلى قازاقستاننىڭ جاس ءارى تالانتتى رەجيسسەرلەرىنىڭ كوپتەگەن ءفيلمى بىرنەشە كونكۋرستىق باعدارلامالارعا قاتىسىپ وتىر.

بيىل كانن كينوفەستيۆالىنىڭ «ەرەكشە كوزقاراس» باعدارلاماسىندا ەلىمىزدىڭ اتىنان ءادىلحان ەرجانوۆتىڭ «لاسكوۆوە بەزرازليچيە ميرا» ءفيلمى، جاننات الشانوۆانىڭ "كونەس سەزونا" ءفيلمى سينەفونداسون باعدارلاماسىندا،  ACID باعدارلاماسىندا  ولگا كوروتكونىڭ «تاك سەبە زيما» ءفيلمى قاتىستىپ وتىر. سونداي-اق، رەجيسسەرلەرى ۆەنەرا قايىرجانوۆا مەن بەرىك جاحانوۆتىڭ قىسقامەتراجدى «تىعىلماق» جانە «اسان» فيلمدەرى Marchedufilm كينورىنوگى اياسىنداعى «ShortFilmCorner» («قىسقامەتراجدى فيلمدەردىڭ بۇرىشىندا»)  كورسەتىلەتىن بولادى.

دەلەگاسيا قۇرامىندا مەملەكەتتىك ۇيىمداردىڭ وكىلدەرى، شىعارماشىلىق ينتەللەگەنسيا، قازاقستان كينوسى مەن تەليەۆيزياسىنىڭ بەلدى ازاماتتارى جانە قازاق ۇلتتىق ونەر ۋنيۆەرسيتەتىنىڭ ستۋدەنتتەرى بار.

2018 جىلدىڭ 8 مامىر كۇنى «Hôtel Barrière Le Majestic Cannes» قوناق ۇيىندە ۇلتتىق پاۆيلوننىڭ اشىلۋىنا وراي «كاننداعى قازاق كەشى» اتتى رەسمي جيىن وتەدى. بۇل ايتۋلى كەشكە مەملەكەتتىك «سوليستەر اكادەمياسى» وركەسترىنىڭ سۇيەمەلدەۋىمەن ق ر حالىق ءارتيسى ايمان مۇساقوجايەۆا مەن ەلىمىزدىڭ تانىمال ءانشىسى ديماش قۇدايبەرگەن جانە باسقا دا انشىلەر ونەر كورسەتەدى.

«قازاقستاننىڭ ۇلتتىق پاۆيلونى» كانن حالىقارالىق كينوفەستيۆالى اياقتالعانعا دەيىن ءوز جۇمىسىن جاساپ، شەتەلدىك كينوكومپانيالارمەن بىرلەسىپ كينو وندىرۋگە قاجەتتى سەرىكتەستەردى تارتۋمەن اينالىساتىن بولادى.  

«قازاقستاننىڭ ۇلتتىق پاۆيلونى» ق ر مادەنيەت جانە سپورت مينيسترلىگى مەن ق ر فرانسياداعى ەلشىلىگىنىڭ قولداۋىمەن اشىلادى.