- قاس قارايسا، شىقپاڭدار دەپ دالاعا!
اقىل قوسىپ وتىراتىن اراعا.
ءالى ەسىمدە بۇرىن اجەم ايتاتىن،
سول اقىلىن ۇيدە وتىرعان بالاعا.

بوراندى كۇن يت پەن بالا قۇتىرىپ،
اقىلىنان كەتەتىنبىز قۇتىلىپ.
سودان كەيىن جەردەن تاياق جەيمىز كەپ،
ۇيگە قاراي ال قايتامىز ۇتىلىپ.

اجەم ايتقان اقىل سوندا باسقا ەكەن،
ءبىزدىڭ كوڭىل سول اقىلعا قاس پا ەكەن؟!
شىقپا دەسە، سىرى ونىڭ تاستا ەكەن،
تاستا دا ەمەس، ەسەيەتىن جاستا ەكەن.

قاس قارايسا، ءقازىر مەنىڭ قاسىمدا،
مىڭ قۇبىلعان ويلار جاتىر باسىمدا.
تۇنەك باسسا تۇنەرەتىن دۇنيە،
جۇمباق ءارى قورقىنىشتى راسىندا!

بوزبالا شاق،
ەسەيدىك پە بىلمەدىم،
تۇسىنگەندەي دۇنيەنىڭ ءبىر كەمىن...
قاس قارايسا كۇبىر-كۇبىر بىرەۋلەر،
داۋىستايدى، مەن داۋىسپەن بىرگەمىن.

قۇلاعىمنىڭ تۇبىنە كەپ سىبىرلاپ،
ءان سالادى ءباز بىرەۋلەر ىڭىلداپ.
بالا كۇنگى ەسسىز كوڭىل ءدال بۇگىن،
ۇرەي باسقان دۇنيەگە قۇبىلماق.

قاس قارايسا دالا تۇگىل ءۇي ءىشى،
ولىكتەردىڭ... شىنىمەن-اق ءيىسى.
قۇلاعىما جىرتىڭداعان ەستىلەد،
قوس شايتاننىڭ، قوس ءىبىلىس ءسۇيىسى...

كۇبىرلەيتىن كىمدەر سوندا قۇلاققا،
كەتپەي قويدى نەگە داۋىس جىراققا؟؟؟
تۇننەن شىققان دەل-سال مەنىڭ ءتۇرىمدى،
بايقامايدى باسقا ادامدار ءبىراقتا.

دەرتىم بە ەكەن، اۋرىمىن با الدە مەن،
ايتا المايمىن ال دەرتىمدى ەلگە مەن.
بالا كۇندە كورشى بالا دالاعا،
شىعىپ كەتىپ اداسقانىن كورگەن ەم...

مەن دە سوندا دالا بەزىپ جۇرگەن ەم،
تاۋ-تاسىم بار جەرىم دە جوق جۇرمەگەن.
قاس قارايىپ، كىرپىك كەتكەن ءىلىنىپ،
اي دالادا تۇنەپ شىقتىم، بىلمەگەم.

سودان بەرى ەستىپ كەلەم داۋىستى،
داۋىس كۇندە، داۋىستارمەن قاۋىشتى.
ويلانۋعا ءالىم كەلمەي وتىرمىن،
ءوزىمدى-وزىم الدە مەنى تاۋىستى...

ءتۇن باتادى سودان تاڭدى اتىرام،
ويدى ويعا تەرەڭىنەن باتىرام.
قاس قارايسا جانارىمدى تارس جۇمىپ،
داۋىستاردان ولەڭ قۇراپ وتىرام...

(س) مارعۇلان اقان