«ماڭعىستاۋمۇنايگاز» اق-نا مەردىگەرلىك قىزمەت كورسەتەتىن قالامقاس كەنورنىندا ورنالاسقان «قازپروملوگيستيك» جشس-نىڭ 100-گە تارتا مۇنايشىسى جۇمىستارىنان باس تارتتى.
مۇنداي ءجايتقا مەكەمە باسشىلارىنىڭ جۇمىسكەرلەرگە ارنالعان ءتيىستى تالاپتاردى ورىنداماۋى سەبەپ بولىپ وتىر. اتاپ ايتقاندا مۇنايشىلاردىڭ جاتىن ورىندارى قولايسىز، جالاقىلارى تومەن، ەڭبەك دەمالىسى بەرىلمەيدى، ەڭبەك شارتى جاسالىنباعان، زەينەتاقى مەن الەۋمەتتىك اقىلار تولەنبەگەن. ال ەڭ سوراقىسى ناۋقاستانعان ادام ەشبىر ارنايى كومەكسىز دەرەۋ جۇمىستان بوساتىلاتىن كورىنەدى. كەنورىنىندا رادياسيانىڭ اسەرىنەن دەنساۋلىقتارى سىر بەرگەن ازاماتتاردىڭ قاراسى كوپ. سونداي-اق، جۇمىسكەرلەردىڭ ارنايى جۇمىس كيىمى دە قاراستىرىلماعان. قولايسىز اۋا رايىنا قاراماستان تىنىمسىز ەڭبەك ەتىپ جاتقان مۇنايشىلاردى تاسيتىن كولىكتىڭ دە بولماۋى ۇلكەن نارازىلىق تۋدىرىپ وتىر.
«قازپروملوگيستيك» ج ش س باسشىلىعىنىڭ نە سەبەپتى ءوز جۇمىسكەرلەرىنە نەمقۇرايدى قاراپ، قارا التىن وندىرۋشىلەردىڭ ەڭبەك ونىمدىلىگىن تومەندەتىپ وتىرعانى تۇسىنىكسىز. دەگەنمەن بۇل ءجايت زاڭدى جەلكەسىنەن باسۋدىڭ ايقىن كورىنىسى ەكەنى جاسىرىن ەمەس. اتالعان مەكەمەنىڭ نارازى ءبىر توپ ماماندارى ءتىپتى وزدەرىنىڭ باسشىلارىنىڭ دا ەسىمىن تولىق بىلمەيتىن كورىنەدى. ايتۋلارىنشا كومپانيا باسشىسىنىڭ ەسىمى – عاريفوللا. ءبىراق وسى كۇنگە دەيىن جۇمىسكەرلەرىنىڭ جاعدايىنا ەش الاڭداي قويماعان. كەن ورىنىندا كۇن، ءتۇن دەمەي تەر توگەتىن مۇنايشىلار وبلىس اكىمى ەرالى توعجانوۆ پەن وبلىس پروكۋرورى داستان سارتايەۆتان كومەك قولىن سوزىپ، جاعدايلارىن تۇزەۋگە ىقپال ەتۋىن سۇرايدى.
