15 جىلدان بەرى ۇيىمداستىرىلىپ كەلە جاتقان ەۋرازيا مەديا فورۋمى بيىل دا جوعارى دەڭگەيدە وتپەك. ەۋرازيالىق مەديافورۋمعا الەمنىڭ ءار تۇكپىرىنەن جينالاتىن جۋرناليستەر، ساياساتتانۋشىلار، قوعام قايراتكەرلەرى قانداي ماسەلەلەردى تالقىلايدى؟ جىل سايىن بۇل شاراعا قوماقتى قارجى ءبولىنىپ، شەتەلدەردەن قوناقتار شاقىرىلادى. الايدا، سوعان سالعان رەسۋرستار ءوزىن قانشالىقتى اقتاۋدا؟ ءبىزدىڭ جۋرناليستەرىمىز ولارمەن تەڭ دارەجەدە سۇحباتقا شىعا الا ما؟ وسىنداي سۇراقتار اركىمنىڭ دە كوكەيىندە بار. 

فورۋمنىڭ نەگىزگى وتىرىستارىنىڭ ءبىرى «ەۋروپالىق وداقتىڭ ەۆوليۋسياسى» دەپ اتالادى ەكەن. وندا وداقتىڭ قازىرگى قيىندىقتارى مەن بولاشاقتاعى دامۋ مۇمكىندىكتەرى تالقىلانادى دەيدى ۇيىمداستىرۋشىلار.

ولاردىڭ ايتۋىنشا، مۇنداي تاقىرىپتى تاڭداۋ قالىپتى جاعداي.  سەبەبى، ەۋروپالىق وداق بىرەگەي. ول ەۋروپانىڭ دامۋى مەن تۇراقتىلىعىنىڭ بەلگىسى بولىپ سانالادى. مۇنىمەن قاتار، سوڭعى ۋاقىتتا ەۋروپالىق وداق: بوسقىندار جانە قارىزدىق داعدارىس، BREXIT سياقتى ەكونوميكالىق جانە ساياسي ماسەلەلەرمەن بەتپە-بەت كەلۋدە. سوندىقتان مەديا فورۋمدا وداقتىڭ بولاشاق ۇلگىسى مەن سيپاتى جان-جاقتى قارالادى-مىس.

وتىرىس بارىسىندا، ۇلىبريتانيا سىرتقى ىستەر مينيسترلىگىنىڭ باسپا ءسوز حاتشىسى سايمون ماكدجي، ۆۆس تەلەارناسىنىڭ جاڭالىقتار رەداكتورى گيەۆين حيۋيتت، حالىقارالىق ساياسات بويىنشا ساراپشى، Le Figaro گازەتىنىڭ نەگىزىن قالاۋشى فرانسۋزدىق رەنو جيرار،  ەۋروپا كەڭەسىنىڭ «سيەۆەر-يۋگ» ورتالىعىنىڭ باسشىسى، يتاليا پارلامەنتىنىڭ مۇشەسى دەبورا بەرگاميني پولشا «سويۋز دەموكراتيچەسكيح ليەۆىح سيل» (SLD) پارتياسى ءتوراعاسىنىڭ ورىنباسارى، ەجي ۆەندەرليح، Media & Strategic Communications ەۋروپالىق وداق ماسەلەلەرى بويىنشا  مامان ەلي حادجييەۆا ءوزىنىڭ ساراپشىلىق كوزقاراستارىن بىلدىرەدى.

XV ەۋرازيالىق مەديا فورۋم، «ەۆوليۋسيانىڭ 15 جىلى: الەم قالاي وزگەرەدى جانە ءبىزدى قالاي وزگەرتەدى» تاقىرىبىمەن ۇيىمداستىرىلىپ وتىر. سونداي-اق، بيىلعى جىلى فورۋمنىڭ كەڭەيتىلگەن باعدارلاماسى بويىنشا: «حالىقارالىق قارىم-قاتىناستار ەۆوليۋسياسى: عالامدىق سالقىنداۋ»، «قورشاعان ورتا ەۆوليۋسياسى: بۇلتارتپاس اپوكاليپسيس نەمەسە جاسىل ەكونوميكاعا كوشۋ»، «قوعامداعى سەنىم ەۆوليۋسياسى: جاڭا زاماندا قوعامدى قالاي باسقارۋعا بولادى؟»، «فاكتىدەن فەيك-جاڭالىقتارعا دەيىنگى اقپاراتتىق تەحنولوگيالار ەۆوليۋسياسى. الاڭداۋ قاجەت پە؟»، «مەديا ەۆوليۋسياسى: بلوگ سالاسىنىڭ دامۋى - قاتەر مە الدە العا جىلجۋ ما؟»، «ادامگەرشىلىك پەن قۇندىلىقتار ەۆوليۋسياسى: جاڭا دۇنيەتانىمدى كىمدەر قالىپتاستىرىپ وتىر؟» – دەگەن اۋقىمدى تاقىرىپتار تالقىلاناتىن بولادى.

ءسوز جوق، بۇل - ورتالىق-ازيالىق تەڭدەسسىز الاڭ. ونىڭ ەرەكشەلىگى جەتەكشى ساياساتكەرلەر مەن ساياساتتانۋشىلار، جۋرناليستەر، قوعام قايراتكەرلەرى مەن وزگە دە ساراپشىلاردىڭ الەمدىك دەڭگەيدەگى الەۋمەتتىك-ەكونوميكالىق جانە گەوساياسي ماسەلەلەرگە تۇرلىشە پىكىر-كوزقاراستارىن بىلدىرۋىندە.  وسىنداي فورماتتىڭ ارقاسىندا كونفەرەنسيا حالىقارالىق تۇيتكىلدەردى تالقىلاپ،  شەشىم قابىلداۋدا ءتيىمدى پلاتفورما قالىپتاستىرۋعا قول جەتكىزدى.

ديالوگتىڭ مۇنداي ءتۇرىن قازاقستاننىڭ ۇسىنۋى كەزدەيسوق ەمەس. ەۋرازيا كىندىگىندە ورنالاسقان قازاقستان گەوگرافيالىق جانە تاريحي جاعىنان ءتۇرلى ۇلتتار مەن مادەنيەتتەردىڭ ديالوگ قۇرىپ، ءوزارا بەيبىت ارەكەت ەتەتىن الاڭىنا اينالعانى انىق. ءدال وسى جەردە ەامف ۇيىمداستىرۋ كوميتەتىنىڭ ءتورايىمى داريعا نازاربايەۆانىڭ باستاماسىمەن دوڭگەلەك ۇستەل اينالاسىندا ساراپشى قاۋىمداستىعىنىڭ الەمدىك كوشباسشىلارى باس قوسىپ، ەكونوميكالىق جانە گەوساياسي ماسەلەلەر بويىنشا تالقىلاۋ الاڭىن ۇسىنۋعا مۇمكىندىك تۋدى.

ەۋرازيا مەديا فورۋمى 22-24ء-شى مامىر ارالىعىندا العاش رەت الماتى قالاسىنداعى The Ritz-Carlton قوناقۇيىندە وتەدى.

وعان 60 ەلدەن جانە الەمنىڭ تۇكپىر-تۇكپىرىنەن كەلگەن 500  دەلەگات جينالىپ، 50-گە جۋىق حالىقارالىق جانە قازاقستاندىق ساراپشىلار، مەملەكەتتىك قايراتكەرلەر، ساياساتكەرلەر، ب ا ق وكىلدەرىنىڭ پىكىرىن تىڭداماقشى.

مۇرات راحيمجانوۆ