ق ر اقپارات جانە كوممۋنيكاسيا ءمينيسترى داۋرەن ابايەۆ استانانىڭ تۋعان كۇنىنە وراي جۇمسالماق قاراجات پەن وڭىرلەردىڭ باس قالاعا جاساعان سىيلارى تۋرالى پىكىر ءبىلدىردى.

«وڭىرلەردىڭ استاناعا تارتۋلارى جايلى سۇراقتى باسقاشا قويىپ كورسەك؟! سامال ىقشام اۋدانى مەن ساياباق ارالىعىندا سالىنىپ جاتقان ۆەلوجۇرگىنشىلەرگە ارنالعان كوپىر قالا اكىمدىگى ءۇشىن سالىنىپ جاتقان جوق! ونىڭ ءبارى تۇرعىندار مەن قالا قوناقتارى ءۇشىن، بالالار ءۇشىن»، - دەدى ابايەۆ.

ءمينيستردىڭ سوزىنە سەنسەك، باس قالانىڭ تۋعان كۇنىنەن سوڭ مەرەكەگە وراي جۇمسالعان اقشانى تۇرعىندار ۇمىتادى، ەسەسىنە سول اقشاعا سالىنعان قۇرىلىستىڭ پايداسىنا كەنەلەدى.

«ءبىز باستى نازاردى تەك اقشاعا اۋدارىپ ۇيرەنگەنبىز. سول اقشاعا سالىنعان قۇرىلىستىڭ ناتيجەسىن ەشكىم ايتپايدى. ينفراقۇرىلىم قالادى، قالا داميدى. مۇنىڭ ءبارى تۇرعىندار مەن قالا قوناقتارى ءۇشىن. اقشانىڭ ءبارى سالىق تۇرىندە الدە باسقا جولمەن مەملەكەت قازىناسىنا قايتارىلادى»، - دەدى مينيستر.

بۇعان قوسا مەرەيتويعا بولىنگەن قاراجات تا ءسوز بولدى. ابايەۆتىڭ ايتۋىنشا، قاراجاتتىڭ قايدا، قالاي كەتىپ جاتقانى ارنايى تەكسەرۋ ورگاندارىنىڭ باقىلاۋىندا.

ايتا كەتەيىك، قازاقستان بيلىگى استانا قالاسىنىڭ 20 جىلدىعىنا وراي ءجۇز ءتۇرلى شارا ۇيىمداستىرىلادى دەپ جوسپارلاندى. سوعان وراي مەملەكەت قازىناسىنان 19 ملرد تەڭگە بولىنبەك.

استانانىڭ 20 جىلدىق مەرەيتويىن تويلاۋ ءۇشىن رەسپۋبليكالىق بيۋدجەتتەن 18،8 ميلليارد تەڭگە ءبولۋ كوزدەلگەن. بۇل تۋرالى مادەنيەت جانە سپورت ۆيسە-مينيسترى ساكەن مۇسايبەكوۆ مالىمدەگەن.

«20 جىلدىقتى تويلاۋ اياسىندا وتكىزىلەتىن 85 شاراعا بارلىعى 18 ميلليارد 800 ميلليون تەڭگە قاراستىرىلعان. ءبىزدى قارجى مينيسترلىگى قولداپ وتىر جانە بۇل قاراجات بيۋدجەتتە جوسپارلانعان. بۇل شارالاردى جوعارى دەڭگەيدە وتكىزەمىز دەپ سەنەمىن»، –دەدى ساكەن مۇسايبەكوۆ سارسەنبى كۇنى 2018-2020 جىلدارعا ارنالعان بيۋدجەتتىڭ تانىستىرىلىمى كەزىندە.

بۇعان قوسا قارجى ءمينيسترى باقىت سۇلتانوۆ بۇل شارالار ءبىر جىل بويى وتكىزىلەتىنىن اتاپ ءوتتى.

«شارالاردى جىل بويى وتكىزۋ تۋرالى تاپسىرما بار. وعان ەلدىڭ بارلىق ايماقتارى قاتىسادى»، – دەدى ول.

ايتا كەتەيىك، قازاقستاندا استانا كۇنى 6 شىلدەدە اتالىپ وتەدى.