جۋىردا باتىس قازاقستان وبلىسى اكىمى التاي كولگىنوۆتىڭ توراعالىعىمەن بقو-عا ينۆەستيسيا تارتۋ جانە ينۆەستيسيالىق احۋالدى جاقسارتۋ جونىندەگى وڭىرلىك كەڭەس وتىرىسى ءوتتى. جيىندا ەكى ينۆەستيسيالىق جوبا تالقىلانىپ، ماقۇلداندى.
الدىمەن ورال قالاسىندا قاتتى تۇرمىستىق قالدىقتاردى باسقارۋ جۇيەسى بويىنشا كەشەن قۇرىلىسى جوباسى تانىستىرىلدى. جوبانى ىسكە اسىرۋدى قولعا العان «Baltic tade hose» باسقارماسىنىڭ مۇشەسى، «Green Servise Company» جشس-نىڭ وكىلى، فينليانديا رەسپۋبليكاسىنىڭ ازاماتى كالۆەر كاپپەردىڭ ايتۋىنشا، وسى كوكتەمدە قالدىقتاردى ىرىكتەيتىن جەلى قۇرىلىسى باستالادى. وندا 80 ادامعا جۇمىس بەرىلەدى. ورال قالاسىنىڭ ءبىر تۇرعىنى جىلىنا 300 كەلى شاماسىندا قالدىق تاستايدى. بۇل جوبا بويىنشا قالدىقتاردىڭ 60 پايىزىن وڭدەپ، كادەگە جاراتۋعا بولادى. ءقازىر قوقىس پوليگونىنىڭ پايدالانۋ مەرزىمىن 15 جىلعا ۇزارتۋ ماقساتىندا ەلەكتر جانە جىلۋ قۋاتىن وندىرەتىن بيوگاز ستانساسىنىڭ قۇرىلىسى جوبالانۋدا. قالدىقتاردى ىرىكتەۋ جەلىسىنەن شىققان قالدىق تۇرلەرى ودان ءارى وڭدەلەدى. قاعازدان قاپتاما ماتەريالدار، جۇمىرتقاعا ۇياشىق قاعاز، اجەتحانا قاعازى، پلاستيكتەن پلاستيك تۇيىرشىكتەرى، حالىق تۇتىناتىن تاۋارلار، پاكەتتەر جاسالادى. «ءقازىر جەرگىلىكتى بيلىك ورىندارىمەن ۇيلەسىمدى بايلانىس ورناتىپ، تۇرعىنداردىڭ، اسىرەسە، مەكتەپتەگى بالالار اراسىندا ءاقپاراتتىق-تۇسىندىرۋ جۇمىستارىن جۇرگىزۋىمىز كەرەك. قالدىقتاردى ىرىكتەۋ جەلىسى قۋاتتى، سوندىقتان قالانىڭ قالدىقتارى بىزگە ازدىق ەتەدى. اۋىل-ايماقتان دا تۇرمىستىق قالدىقتاردى قابىلدايمىز»، –دەگەن كالۆەر كاپپەر جەر تەلىمى بولىنسە، اتالمىش جەلىنىڭ بيىل سالىناتىنىن جەتكىزدى. ونىڭ سوزىنە سۇيەنسەك، فينليانديادا تۇرمىستىق قالدىقتاردىڭ 98 پايىزى وڭدەلەدى، سوندىقتان قالدىقتار پوليگونى بۇل ەلدە جوق. ءتىپتى قوقىس قالدىقتارى جەتپەگەندىكتەن، ونى وزگە ەلدەردەن ساتىپ الادى. – ءبىرىنشى كەزەڭدە پوليگون-داعى ينفراقۇرىلىمدى جاقسارتامىز. ءقازىر وندا ينفراقۇرىلىم اتىمەن جوق. قالدىقتاردى ىرىكتەۋ جەلىسىن سالامىز. ەكىنشى كەزەڭدە قالدىقتار وڭدەلەدى. ال ءۇشىنشى كەزەڭ - بيوگاز ستانساسىن (قۋاتتىلىعى 1مۆت) سالۋ. مۇنىڭ بارلىعىن ءۇش جىل ىشىندە سالىپ، ىسكە قوسامىز. پوليگوندى زەرتتەدىك، وندا بيوگاز جانىپ كەتكەن. سوندىقتان ماماندارىمىز گاز جينالعانشا ونى جاۋىپ قويادى،– دەدى كالۆەر كاپپەر وبلىس اكىمىنىڭ بيوگاز ستانساسى قۇرىلىسىنا قاتىستى قويعان ساۋالىنا وراي.
جوبانى جۇزەگە اسىرۋشىلار قالدىقتاردى ىرىكتەۋ جەلىسىنە 1،5 ملن. ەۋرو، بيوگاز ستانساسى قۇرىلىسىنا 3 ملن. ەۋرو ينۆەستيسيا قۇيماق. كەڭەس وتىرىسىندا قارالعان ەكىنشى جوبا – ورال قا- لاسىنداعى قۇرمانعازى كوشەسى 84 مەكەنجايىندا حالىقارالىق فرانشيزا بويىنشا ءقوناقۇي قۇرىلىسى. جوبامەن «Grand Hotel Service» جشس-نىڭ ديرەكتورى جاقسىلىق ساماتوۆ تانىستىردى. ونىڭ ايتۋىنشا، اتالمىش كومپانيا ورالداعى «Eldivino» ويىن-ساۋىق ورتالىعىن جانە اقسايدا «ماركو پولو» ءقوناق-ۇيى جوبالارىن جۇزەگە اسىرعان. ەندى «اقجايىق» ءقوناقۇيىنىڭ ورنىنا ەكى جىل ىشىندە جاڭا حالىقارالىق دەڭگەيدەگى 8200 شارشى مەترلىك ءقوناقۇي بوي كوتەرمەك. ونىڭ جانىندا اۋدانى 4200 شارشى مەتر بيزنەس ورتالىعى عيماراتى بولادى. جاڭا ءقوناقۇي حالىقارالىق فرانشيزا بويىنشا ىسكە قوسىلماق. ءقازىر ءقوناقۇي بيزنەسى بويىنشا الەمدىك فرانشيزا وكىلدەرىمەن كەلىسسوزدەر جۇرگىزىلۋدە. حالىقارالىق فرانشيزا بويىنشا اشىلاتىن ءقوناقۇي ونداعى كورسەتىلەتىن قىزمەت ساپاسىنىڭ تۇراقتى جانە قاتاڭ باقىلاۋدا بولاتىندىعىمەن، سەرۆيستىڭ جوعارى دەڭگەيىمەن، قالا جانە وبلىس مارتەبەسىن كوتەرۋىمەن، بولمەلەردىڭ الەمدىك ستاندارتقا ساي بولۋىمەن ەرەكشەلەنەدى.
شەتەلدىك ماماندارمەن ءقوناقۇي قىزمەتكەرلەرىن وقىتۋ جوسپارلانعان. قوناقۇيدە 125 بولمە، ونىڭ ىشىندە 92 ستاندارتتى، 10 ليۋكس كلاسس، ءبىر پرەزيدەنتتىك، 20 اپارتامەنت جانە ەكى مۇمكىندىگى شەكتەۋلى جاندارعا ارنالعان بولمە بولادى. عيمارات سەگىز قاباتتى. وندا 70 ورىندىق مەيرامحانا، ءۇش كونفەرەنس-زالى، كوفە-برەيك زالى، ورىس مونشاسى، تۇرىك حامامى، فيتنەسزال، ەكى قاۋىز دجاكۋزي جانە وزگە دە قاجەتتى قىزمەت كورسەتۋ ورىندارى بولماق. سونداي-اق جەر استى 40، جەر ءۇستى 20 كولىككە ارنالعان پاركينگ سالىنادى.
عيماراتتىڭ توبە شاتىرىنا رۋف-مەيرامحانا جانە جازدىق تەرراسا ورنالاسپاق.
پىكىر قالدىرۋ