« ...  قازىرگى دەنساۋلىق ساقتاۋ ءىسى قىمباتقا تۇسەتىن ستاسيونارلىق ەمگە ەمەس، نەگىزىنەن اۋرۋدىڭ الدىن الۋعا باعىتتالۋعا ءتيىس».

ق ر پرەزيدەنتى ن. نازاربايەۆتىڭ  «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» جولداۋىنان

ورال قالاسىنداعى  «Park  Hotel»  ءقوناقۇي كەشەنىندە «ساۋ بالا – باقىتتى انا»  اتتى رەسپۋبليكالىق  الەۋمەتتىك-مەديسينالىق  سەمينار ءوتتى. اتالمىش شارا پەرزەنتتەرىنە ەكپە سالدىرماعان اتا-انالارعا يممۋنوپروفيلاكتيكالىق  ۆاكسينانىڭ  تيىمدىلىگىن ءتۇسىندىرۋ ماقساتىندا ۇيىمداستىرىلدى.

جيىنعا  ق ر  دەنساۋلىق ساقتاۋ مينيسترلىگى  قوعامدىق دەنساۋلىق ساقتاۋ كوميتەتىنىڭ باس ساراپشىسى نۇرشاي ازىمبايەۆا، ق ر دەنساۋلىق  ساقتاۋ مينيسترلىگى سەسجم عپو  دەپارتامەنتىنىڭ ەپيدەميولوگ دارىگەرى لەنا قاسابەكوۆا، سونداي-اق  بقو قوعامدىق دەنساۋلىق ساقتاۋ دەپارتامەنتىنىڭ باسشىسى  جايدار  قۇرمانوۆ پەن وبلىستىڭ وكىل يمامى ەركەبۇلان قاراقۇلوۆ قاتىستى.

سوڭعى جىلدارى ۆاكسيناعا ءبىرقاتار اتا-انالاردىڭ قارسىلىق تانىتقانى ءمالىم. ايتا كەتسەك، وبلىس بويىنشا جالپى 959 بالا ەكپە الماعان. يممۋنوپروفيلاكتيكالىق ۆاكسيناعا قارسىلىق تانىتقان اتا-انالاردىڭ 76،1%-ى ءدىني سەبەپتەردى جەلەۋ ەتسە،  جەكە كوزقاراستارى بويىنشا 14،4%، ال ەكپەنىڭ تيىمدىلىگىنە 9،4%-ى سەنىمسىزدىك تانىتقان. سالا ماماندارىنىڭ ايتۋىنشا، كەي اتا-انالار  عالامتورداعى ءتۇرلى ارانداتۋشى اقپارتتارعا سەنىپ، ۇل-قىزدارىنا ۆاكسينا سالدىرۋدان باس تارتقان.

• بالالارعا ەكپە جاساۋ – مەديسينانىڭ ۇزدىك جەتىستىكتەرىنىڭ ءبىرى. ەكپە ارقىلى ميلليونداعان بالا ولىمنەن، مۇگەدەكتىكتەن امان قالۋدا. الايدا سوڭعى كەزدە ەكپەگە قارسى شىعاتىنداردىڭ قاراسى كوبەيدى. اسىرەسە، الماتى، اقتوبە، باتىس قازاقستان وبلىستارىندا ەكپەگە قارسى اتا-انالار كوپ.  ءبىزدىڭ بۇگىنگى ماقساتىمىز – سول اتا-انالارمەن  ارنايى كەزدەسىپ، ولاردىڭ ەكپە تۋرالى ۇرەيلى ويلارىن سەيىلتۋ، - دەدى  ق ر دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتىنىڭ باس ساراپشىسى نۇرشاي ازىمبايەۆا.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                            

سودان سوڭ بقو   قوعامدىق  دەنساۋلىق ساقتاۋ دەپارتامەنتىنىڭ باسشىسى جايدار قۇرمانوۆ  ەكپەنىڭ پايداسىن ناسيحاتتاۋ تۋرالى  وڭىردەگى  اتقارىلعان جۇمىستارعا توقتالدى. ونىڭ ايتۋىنشا،  2016 جىلى وبلىس بويىنشا 160  بالا ەكپە الماسا، بىلتىر  بۇل كورسەتكىش 134-كە ازايعان.   سونداي-اق 2015 جىلى  وبلىستا اتا-اناسى ەكپەدەن باس تارتقان ءتورت جاسار ءبۇلدىرشىن تۋبەركۋلەز دەرتىنە شالدىقسا، 2017 جىلى بالالار اراسىندا ەكى كوكجوتەل وقيعاسى تىركەلگەن.

ءبىر كەزدەرى بەلەڭ العان  ءقاۋىپتى ىندەتتەر ەكپەنىڭ ناتيجەسىندە جويىلعاندىعى تۋرالى  ق ر دەنساۋلىق ساقتاۋ مينيسترلىگىنىڭ ەپيدەميولوگ دارىگەرى  لەنا قاسابەكوۆا  ناقتى دەرەكتەر ارقىلى ءتۇسىندىردى.

- ەكپەنىڭ ناتيجەسىندە الەم بويىنشا بەلەڭ العان شەشەك دەرتى جويىلدى.  جالپى، مەديسينادا ەكپەنىڭ ناتيجەسىندە كوپتەگەن اۋرۋلاردىڭ الدىن الۋعا بولاتىندىعى دالەلدەندى.  ايتا كەتسەك، 2005-2006 جىلدارى رەسپۋبليكادا قىزىلشا دەرتىمەن ناۋقاستانعاندار سانى  1700-1800 بولسا، 2017 جىلى بۇل دەرتپەن ەشبىر ناۋقاس تىركەلمەگەن. سونداي-اق قىزامىق  بويىنشا دا جىل سايىن ەلىمىزدەگى 2000-3000  تۇرعىن ەم الىپ جۇرسە، بۇگىنگى تاڭدا اتالمىش دەرتپەن ناۋقاستانعاندار جوق. 1995 جىلدارى ەلىمىزدە ديفتەريا، ياعني كۇل اۋرۋى جاپپاي بەلەڭ العانى بەلگىلى. جىلىنا 1000-نان اسا ادام ءقاۋىپتى دەرتتى جۇقتىراتىن. ءقازىر ول اۋرۋدان دا قۇتىلدىق.  سوڭعى دەرەك  2008 جىلى عانا تىركەلگەن. سونىمەن قوسا 1998 جىلعا دەيىن ۆ ۆيرۋستى گەپاتيتىمەن جىلىنا 3500-4000  ادام ناۋقاستانسا، بۇگىندە  ەرەسەكتەر اراسىندا 90-100  جاعداي عانا تىركەلىپ وتىر، - دەدى لەنا قۇرالعازى قىزى.  ال ءوڭىرىمىزدىڭ وكىل يمامى ەركەبۇلان قاراقۇلوۆ ەكپەنىڭ يسلام شاريعاتىنا قايشى ەمەس ەكەنىن ءتۇسىندىردى.