ەلىمىزدىڭ تاۋەلسىزدىك تۋى جەلبىرەگەنىنە 27 جىل. وسى ارالىقتار كوپتەگەن وزگەرىستەر ورىن الدى. قازىرگى تاڭدا جاڭا تەحنولوگيالارمەن وقىتۋ جۇيەلى جولعا قويىلىپ كەلەدى. ياعني ءبىلىم بەرۋدى جاڭعىرتۋ – بۇگىنگى زاماننىڭ تالابى. ەلباسىنىڭ جىل سايىنعى جولداۋىندا دا ءبىلىم سالاسى قالىس قالىپ كورگەن ەمەس. باتىس قازاقستان وبلىسىنداعى ءبىلىم سالاسى جاڭاشىلدىققا ۇمتىلۋدا ينجەنەرلىك وقىتۋ، يننوۆاسيالىق زەرتتەۋلەردى جەتىلدىرۋ سەكىلدى تىڭ باستامالاردى قولعا الۋدا. اسىرەسە ءبىلىم سالاسى سيفرلاندىرۋ بويىنشا وڭدى كورسەتكىشتەرگە قول جەتكىزە باستادى. بقو-داعى 380 مەكتەپ «Bilimland» ءبىلىم بەرۋ پورتالىنا جانە 143 مەكتەپ «كۇندەلىك» ەلەكتروندى جۋرنالىنا قوسىلدى.
وسى ورايدا باتىس قازاقستان وبلىستىق ءبىلىم باسقارماسىنىڭ باسشىسى شولپان قادىروۆا وبلىستاعى ءبىلىم سالاسىنا جاڭا پورتال ەنگىزىلگەلى جاتىرعانىن ايتتى. ونىڭ مالىمەتىنشە، قالاداعى جانە اۋدان ورتالىقتارىنداعى مەكتەپتەرگە قىركۇيەك ايىنا دەيىن «Bilimland» پورتالى قوسىلماق. سونداي-اق وبلىس بويىنشا مەكتەپ كابينەتتەرىندەگى 14 073 كومپيۋتەردىڭ 7718ء-ى ابدەن توزىعى جەتكەن ەكەن. بيىل سول ولقىلىقتى تۇزەۋ ءۇشىن 220 720،0 ملن. تەڭگەگە كومپيۋتەر، ەكران، پروەكتور سەكىلدى مۋلتيمەديالىق جابدىقتار ساتىپ الىنادى ەكەن. ءتىپتى 567 Bilimbook ترانسفورمەر-كومپيۋتەرى قولدانىسقا بەرىلمەك. بارلىق مەكتەپكە كەڭ جولاقتى عالامتور ەنگىزۋ ءۇشىن 145 258 مىڭ تەڭگە قاراستىرىلعان. سونىمەن بىرگە وزگە دە ءبىرقاتار جاڭا جوبالار ىسكە اسىرىلاتىن بولادى.
حاكىم ابايدىڭ «بالاڭ ءبىلىمدى، پاراساتتى بولسىن دەسەڭ مالىڭدى اياما» دەگەن كەرەمەت ءسوزى بار. سوندىقتان ءبىلىمدى ۇرپاق تاربيەلەۋ ءۇشىن ءبىلىم سالاسىنا جىل سايىن قىرۋار قارجى قاراستىرىلىپ كەلەدى.بولاشاق مامانداردىڭ ساۋاتتى دا ءبىلىم بولۋى ءبىلىم وشاقتارىنداعى دۇرىس وقىتۋدىڭ ناتيجەسىنە بايلانىستى. بۇگىنگى وقۋشى – ەرتەڭگى مامان. ساۋاتسىز، جاڭا تەحنولوگيانى مەڭگەرمەگەن وقۋشىدان ەرتەڭگى جاقسى مامان شىقپايتىنى بەلگىلى. سوندىقتان وڭىردەگى ءبىلىم سالاسسىنا جاسالىپ جاتىرعان جاڭا باستامالار جالعاسىن تابا بەرمەك.
سونداي-اق سىبايلاس جەمقورلىقتىڭ ءبىلىم سالاسىن دا اينالىپ وتپەگەنى انىقتالدى. ق ر سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ
بقو بويىنشا دەپارتامەنتىنىڭ باسقارما باسشىسى ارنۇر اxانوۆتىڭ ايتۋىنشا، 2016 جىلدىڭ باسىنان بۇگىنگە دەيىن دەپارتامەنتتە ءبىلىم سالاسىندا ورىن العان 17 جەمقورلىق ارەكەتى تىركەلگەن. ناتيجەسىندە 15 ازاماتتىڭ ۇستىنەن ءىس قوزعالىپ، ونىڭ التاۋى باس بوستاندىعىنان ايىرىلعان.
-مىسالى ورال قالاسىنداعى دارىندى بالالارعا ارنالعان مامانداندىرىلعان س. سەيفۋللين اتىنداعى №11 وبلىستىق قازاق مەكتەپ- ينتەرنات كەشەنىندە ەسەپشى قىزمەتىن اتقارعان ورازبايەۆا مەن ءالىموۆا جەكە شوتتارىنا زاڭسىز اقشا اۋدارىپ، 74 ملن. تەڭگە جىمقىرعانى ءۇشىن 3،5 جىلعا اباقتىعا قامالدى. سونىمەن قاتار №45 ورتا مەكتەپتىڭ بۇرىنعى ديرەكتورى داۋموۆاعا تۇرمىستىق جاعدايى تومەن وتباسى بالالارىنىڭ تاماقتانۋىنا قاتىستى جالعان قۇجاتتارعا قول قويىپ، پارا العانى ءۇشىن 3،6 ملن.تەڭگە كولەمىندە ايىپپۇل سالىندى. ءبىلىم سالاسى مەملەكەت تاراپىنان ۇلكەن قولداۋ تاۋىپ وتىر. وتكەن جىلدىڭ وزىندە اتالعان سالاعا 65،5 ملرد. تەڭگە ءبولىندى. قارجىنىڭ ءتيىستى جەرگە جۇمسالۋىن قاداعالاپ، ەكىجاقتى بىرىگىپ جۇمىس ىستەۋىمىز كەرەك، – دەدى ارنۇر قۋانىش ۇلى.
پىكىر قالدىرۋ