شىمكەنت قالاسىنىڭ اكىمدىگى قوشقار اتا وزەنى بويىن اباتتاندىرۋعا ۇلەس قوسقان 28 ازاماتقا العىس ءبىلدىردى. بۇل تۋرالى قالا اكىمىنىڭ ورىنباسارى عابيت ماۋلەنقۇلوۆ ءمالىم ەتتى.

قالا اكىمى ورىنباسارىنىڭ سوزىنشە، قوشقار اتا وزەنىنىڭ بويىن اباتتاندىرۋ جۇمىسىنىڭ ءبىرىنشى كەزەڭى بويىنشا وزەننىڭ ەكى جاعالاۋىنان 10 مەتر جەردى اباتتاندىرۋ جوسپارلانعان. الايدا بۇل جۇمىستارعا وزەن بويىنداعى 96 جەر ۋچاسكەسى كەدەرگى كەلتىرگەن. ونىڭ 20-سى - تۇرعىن ءۇي، 14 - جەڭىل قۇرىلىس نىسانى، 33 - گاراج بولسا، 28 ۋچاسكەدە قۇرىلىس سالىنباعان. ونىڭ ۇستىنە، جەر ۋچاسكەلەرىنىڭ بارلىعى جەكەمەنشىككە بەرىلىپ كەتكەن.

«ارادا جۇرگىزىلگەن كەلىسسوز ناتيجەسىندە وسى جەر ۋچاسكەلەرىنىڭ يەلەرى قۇرىلىس نىساندارىن بۇزۋعا كەلىسىم بەردى. سول ءۇشىن جەر يەلەرىنە اكىمدىك اتىنان العىس بىلدىرەمىن. ال 20 جەر ۋچاسكەسىنىڭ يەسى ءوز جەرلەرىن مەملەكەت مەنشىگىنە اقىسىز قايتارىپ بەردى. ولاردى قالانىڭ ناعىز پاتريوتى دەپ ايتار ەدىم. تۋعان قالاسىنا جانى اشيتىن، قالانىڭ بولاشاعىنا بەي-جاي قارامايتىن ازاماتتار وسىنداي بولار»، - دەدى عابيت ماۋلەنقۇلوۆ.

ايتا كەتەيىك، شاھاردىڭ ورتاسىنان وتەتىن قوشقار اتا وزەنى بويىندا اباتتاندىرۋ جۇمىستارى جۇرگىزىلىپ جاتىر. بۇگىندە ورداباسى الاڭىنان وزبەك كوشەسىنە دەيىنگى جەردە وزەن بويىمەن ءجۇرىپ وتۋگە ەش كەدەرگى جوق. قازىرگى تاڭدا بوساعان جەرلەردى اباتتاندىرۋ، كورىكتەندىرۋ جۇمىستارى باستالدى.