وڭتۇستىك قازاقستان وبلىسى ورداباسى اۋدانىندا ج.جابايەۆ اتىنداعى جالپى ورتا مەكتەبى 90 جىلدىق مەرەيتويىن تويلادى. قازاقتىڭ ءبىرتۋار ازاماتتارى وقىعان ءبىلىم وشاعىنىڭ سالتاناتتى جيىنىنا وبلىس اكىمى جانسەيىت تۇيمەبايەۆ ارنايى قاتىسىپ، كوپشىلىكتى اتالعان مەرەكەمەن قۇتتىقتادى.

«بۇل مەكتەپ 90 جىلدا تالاي شاكىرتتى قاناتتاندىرىپ، ۇلكەن ومىرگە ۇشىرىپ كەلدى. كەڭەس وداعىنىڭ باتىرى بەيسەن وڭتايەۆ، مەملەكەت جانە قوعام قايراتكەرلەرى بەكەن ءابدىرازاقوۆ، دۋلات يسابەكوۆ، سادىقبەك ادامبەكوۆ، قوسجان مۇسىرەپوۆ وسى وقۋ ورداسىندا ءبىلىم العانىن ءبىز ماقتان ەتەمىز. الىپتاردى شىعارعان بۇل ءبىلىم ۇياسى، حالقىنىڭ قامىن جەيتىن ءالى تالاي ۇرپاق تاربيەلەيتىنىنە بەك سەنىمدىمىن»، - دەدى ج.تۇيمەبايەۆ.

شارا بارىسىندا ءوڭىر باسشىسى مەن جازۋشى د.يسابەكوۆ مەكتەپتىڭ الدىندا بوي كوتەرگەن قازاق حالىق پوەزياسىنىڭ ايگىلى تۇلعاسى، جىراۋ، جىرشى ج.جابايەۆتىڭ ەسكەرتكىشىن سالتاناتتى تۇردە اشىپ بەردى. بۇدان بولەك، 3 تىلدە جارىق كورگەن «التىن ۇيا» اتتى كىتاپتىڭ تۇساۋىن كەسىپ، وزدەرىنىڭ قولتاڭبالارىن قالدىردى. سونداي-اق، وبلىس اكىمى اتالعان ءبىلىم ۇسىندا ءبىلىم الىپ، ءوڭىرىمىزدىڭ ءوسىپ وركەندەۋىنە سۇبەلى ۇلەس قوسىپ جۇرگەن ءبىرقاتار ازاماتتاردى ارنايى ماراپاتتاپ، قۇرمەت كورسەتتى.

ايتا كەتەيىك، عاسىرعا جۋىق تاريحى بار ءبىلىم وشاعىندا 2016 جىلى وبلىستىق بيۋدجەتتىڭ ەسەبىنەن 10 ملن تەڭگە ءبولىنىپ، كۇردەلى جوندەۋ جۇمىستارى جۇرگىزىلگەن. قازىرگى تاڭدا مۇندا 54 ۇلاعاتتى ۇستاز 430-دان استام وقۋشىعا ءبىلىم بەرىپ كەلەدى.