وڭتۇستىك قازاقستان وبلىسى تولە بي اۋدانىندا سۋ شايىپ كەتكەن ەسكى قورىمداعى مۇردەلەر باسقا جەرگە كوشىرىلدى. بۇل تۋرالى زەرتاس اۋىلىنىڭ اكىمى لەسبەك سەرىكبايەۆ حابارلادى.

اۋىل اكىمىنىڭ سوزىنشە، مۇردەلەردى كوشىرۋ جۇمىستارى اياقتالۋعا جاقىن.

«مۇردەلەردى كوشىرۋ جۇمىستارىنىڭ بارلىعى شاريعات جولىمەن جاسالدى. ەسكى قورىمدا 20 ادامنىڭ سۇيەگى جەرلەنگەن. بۇلاقتار سۋىن ۋاقىتشا توقتاتۋ جۇمىستارى سۋ سورعىش قوندىرعىلاردىڭ كومەگىمەن جۇرگىزىلدى»،-دەيدى زەرتاس اۋىلىنىڭ اكىمى.

قورىمداعى مۇردەلەردى كوشىرۋ جۇمىستارى اۋا رايىنىڭ جاۋىن-شاشىندى بولۋىنا بالانىستى ۋاقىتشا توقتاتىلعان بولاتىن.

«كوشىرۋ كەزىندە ەكى ەكسكاۆاتور قولدانىلدى. ءبىز سۋ شىققان جەرلەردى قازىپ، قۇبىرلار تاستادىق. سۋ سول قۇبىرلارمەن كانالعا اقتى. بۇل جۇمىستار ءالى دە جالعاسۋدا. دەگەنمەن 80 پايىزدىق ءجۇمىس اياقتالدى دەۋگە بولادى. ەندى ول جەرلەرگە تاس تاستاپ، ول اۋماقتى كومۋ جۇمىستارى عانا قالىپ تۇر. ءبارى رەتتەلگەن سوڭ، ول جەرلەرگە اعاش وتىرعىزاتىن بولامىز»،-دەيدى لەسبەك سەرىكبايەۆ.

ايتا كەتەيىك، بۇعان دەيىن زەرتاس اۋىلىنداعى ەسكى قورىمدى سۋ شايىپ، مارقۇمداردىڭ سۇيەگى جەر بەتىنە شىعىپ قالعانى تۋرالى حابارلاعان بولاتىنبىز. ول كەزدە اۋىل اكىمى قورىمنىڭ استىنان بەس بىردەي بۇلاق كوزى شىققانىن ايتقان ەدى. ونداعى سۋلار قورىمنىڭ جانىن جارقاباققا اينالدىرىپ، سونىڭ سالدارىنان بىرنەشە مارقۇمنىڭ سۇيەكتەرى سۋعا اعىپ كەتكەنى بەلگىلى بولعان.