"قازاقفيلم" كينوستۋدياسىنىڭ شىعارماشىلىق توبى «قازاق ەلى» تۋىندىسىنىڭ «التىن تاق» دەپ اتالاتىن ءىى-ماۋسىمىن وڭتۇستىكتە ءتۇسىرۋدى جوسپارلاعان بولاتىن. وسىعان بايلانىستى وڭىرگە ارنايى ساپارمەن كەلىپ، وبلىس اكىمى جانسەيىت تۇيمەبايەۆقا ءفيلمدى تاريحي ورىنداردا تۇسىرۋگە بايلانىستى قولداۋ كورسەتۋ جايىن ءسوز ەتتى. ناتيجەسىندە بۇگىندە ءتۇسىرىلىم جۇمىستارى تۇلكىباس اۋدانىندا باستالدى.

ايتا كەتەرلىگى، ءفيلمنىڭ بۇل ماۋسىمى 10 سەريادان تۇرادى. تۇلكىباس اۋدانى، ءيىرسۋ اۋىلى ماڭىنداعى تاقياتوبە جەرىندە ءوتىپ جاتقان تۇسىرىلىمگە 500-گە جۋىق ادام جۇمىلدىرىلعان. سەناريي اۆتورلارى: سماعۇل ەلۋباي مەن تيمۋر جاقسىلىقوۆ. تۋىندىنىڭ باس رەجيسسەرى رۇستەم ابدىراشيەۆ وڭتۇستىك ءوڭىرىنىڭ تابيعي ەرەكشەلىگى مەن تاريحي ءرولى فيلم ءۇشىن ماڭىزدى ەكەندىگىن جەتكىزدى.

«قازاق ەلى» تۋىندىسىنىڭ ءىى-ماۋسىمىنىڭ العاشقى 5 سەرياسى الماتى وبلىسىنىڭ تالعار اۋدانىندا باستالدى. كەيىنگى بولىمدەرى وسى وڭتۇستىك وڭىرىندە ءتۇسىرىلىپ جاتىر. مۇندا كەرەي مەن جانىبەكتىڭ جانە ءابىلقايىر اسكەرلەرىنىڭ شايقاسى، قازتۋعاننىڭ كوشى، قاسىم حاننىڭ اماناتتان ورالۋى سىندى ەپيزودتارى تاسپالانۋدا. الداعى ۋاقىتتا تۇركىستان قالاسىندا جانىبەكتىڭ حان تاعىنا وتىرۋى سىندى كورىنىستەردى تۇسىرەتىن بولامىز. وسى ءتۇسىرىلىم جۇمىستارىنا اتسالىسقان وبلىس باسشىسى جانسەيىت قانسەيىتۇلىنا العىس بىلدىرەمىز»، - دەدى ر. ابدىراشيەۆ.

«قازاق ەلى» ءفيلمىنىڭ وڭتۇستىكتەگى ءتۇسىرىلىم جۇمىستارى ماۋسىم ايىنا دەيىن جالعاسادى. تاريحتى تانىستىرىپ، تەكتى تانىتاتىن تاريحي تۋىندى اعىمداعى جىلدىڭ جەلتوقسان ايىندا كوپشىلىك نازارىنا ۇسىنىلاتىن بولادى.