وڭتۇستىك قازاقستان وبلىسى، سوزاق اۋدانىندا  جەڭىس كۇنى مەرەكەسى جوعارى دەڭگەيدە اتاپ ءوتىلدى. اۋدان جۇرتشىلىعى «بەلگىسىز سارباز» ەسكەرتكىشىنە گۇل شوقتارىن قويىپ، ءارۋاقتارعا قۇران باعىشتادى.

مەرەكەلىك شارادا اۋدان اكىمى سالىحان پولاتوۆ 6 سوعىس ارداگەرىنە  سۋ جاڭا اۆتوكولىكتەردىڭ كىلتىن تابىستادى. ودان بولەك، مايدانگەرلەرگە ۋران وندىرەتىن «كاتكو»، «ينكاي» كومپانيالارى قارجىلاي سىيلىقتار ۇسىندى.  مەرەكە كۇندەرى  تىل جانە اۋعان سوعىسى ارداگەرلەرىنە، چەرنوبىل اپاتىنا قاتىسۋشىلارعا دا اۋداندىق بيۋدجەتتەن قارجىلاي سىيلىقتار تاپسىرىلدى. مەرەكەلىك شارا ورتالىق يپپودرومدا بايگە، كوكپار، قىز قۋۋ سىندى ۇلتتىق سپورت تۇرلەرىمەن جالعاستى.

ايتا كەتەيىك، اتالعان اۋداننان مايدانعا 6 مىڭداي ازامات اتتانسا، ولاردىڭ  83 پايىزعا جۋىعى مايدان دالاسىندا قازا تاپتى. بۇگىنگى تاڭدا كوزى ءتىرى  6 سوعىس ارداگەرى بەيبىت زاماندا ءومىر ءسۇرىپ جاتىر.