شىمكەنتتە جەڭىستىڭ 73 جىلدىعىنا ارنالعان «ەر ەسىمى - ەل ەسىندە» اتتى سالتاناتتى ءىس-شارا ءوتتى. «قاھارمان ۇلت» شەرۋىمەن باستاۋ العان شاراعا  ءۇش مىڭعا تارتا تۇرعىن قاتىستى.

شىمكەنت قالاسىنداعى «داڭق» مەموريالى كەشەنىندە وتكەن سالتاناتتى جيىنعا وبلىس اكىمى جانسەيىت تۇيمەبايەۆ پەن  قالا اكىمى نۇرلان ساۋرانبايەۆ، مايدانگەرلەر مەن تىل ەڭبەككەرلەرى، زيالى قاۋىم وكىلدەرى مەن سوعىسقا قاتىسقان ازاماتتاردىڭ ۇرپاقتارى قاتىستى.

بۇل مەرەكەنىڭ ەلىمىزدىڭ ومىرىندە الاتىن ورنى ەرەكشە ەكەنىن ايتقان ايماق باسشىسى ەكىنشى دۇنيەجۇزىلىك  سوعىسىنىڭ ارداگەرلەرى مەن تىل ەڭبەككەرلەرىن جانە بارشا وڭتۇستىكقازاقستاندىقتاردى جەڭىستىڭ 73 جىلدىعىمەن قۇتتىقتادى.

«قۇرمەتتى مايدانگەرلەر! سىزدەردىڭ قان مايداننىڭ الدىڭعى شەبىندەگى ەرلىكتەرىڭىزدىڭ، تىلداعى ەرەن ەڭبەكتەرىڭىزدىڭ ارقاسىندا قازاقستاندىقتاردىڭ بۇگىنگى ۇرپاعى بەيبىت ءومىر سۇرۋدە. وتان ءۇشىن وتقا ءتۇسىپ، قان مايدانداعى جەڭىسكە دەگەن تاباندىلىقتارىڭىز  ءۇشىن، العىس بىلدىرەمىز! ارداگەرلەردىڭ جانكەشتى ەرلىگى مەن ەڭبەگى جادىمىزدان ەشقاشان وشپەك ەمەس. ەلباسىمىز نۇرسۇلتان   "ءبىز ءارقاشاندا جەڭىس كۇنىن اعا بۋىننىڭ وتانعا دەگەن شەكسىز سۇيىسپەنشىلىگىنىڭ، جاستاردى ەرلىك پەن پاتريوتيزم رۋحىندا تاربيەلەۋدىڭ ولشەۋسىز ونەگەسى دەپ بىلەمىز!" دەپ وشپەس داڭقتى ەرەكشە اتاپ وتكەن بولاتىن. سونداي-اق مەملەكەت باسشىسى جىل سايىنعى جولداۋىندا  اعا ۇرپاق وكىلدەرىن الەۋمەتتىك قولداۋدا، اسىرەسە دەنساۋلىقتارىن تۇزەتۋ، ساۋىقتىرۋ جانە زەينەتاقى ۇستەمەلەرىن قوسۋ ماسەلەلەرىن نازاردان تىس قالدىرعان ەمەس»،-دەدى جانسەيىت تۇيمەبايەۆ.