وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ سوعىس ارداگەرى مۇراتالى تولەپبەرگەنۇلىن جەڭىس كۇنىمەن ارنايى قۇتتىقتاپ بارىپ، سىي-سياپات جاسادى.

بۇگىندە توقساننان اسىپ وتىرعان ارداگەر كەزىندە بەلارۋس مايدانىندا بولىپ، ودەر وزەنىنەن ءوتۋ، ۋكراينا، بەلارۋس جەرلەرىن ازات ەتۋدە ەرلىك كورسەتكەن. برەست قامالى، ۆارشاۆا، دانسك، ۆيسسمارك، بيتتەنبۋرگ، پەرلەبەرگ قالالارىنىڭ شايقاسىنا قاتىسقان. سوعىستا كورسەتكەن ەرلىكتەرى ءۇشىن: ءىى-شى دارەجەلى «ۇلى وتان سوعىسى» وردەنىمەن، «ەرلىگى ءۇشىن»، «ۆارشاۆانى ازات ەتكەنى ءۇشىن»، «گەرمانيانى جەڭگەنى ءۇشىن» جانە مەرەكەلىك مەدالدارمەن ماراپاتتالعان. گەرمانيانىڭ بيتتەنبەرگ قالاسىندا جاۋىنگەرلىك جولى جەڭىسپەن اياقتالعان مايدانگەر ەلگە 1950 جىلى ورالعان.

ءوڭىر باسشىسى قارياعا ەكىنشى دۇنيەجۇزىلىك سوعىس كەزىندەگى جانكەشتى ەرلىگى مەن ەڭبەگى ءۇشىن العىس ايتىپ، ۇرپاقتىڭ باقىتتى بولاشاعى ءۇشىن وتقا تۇسكەن مايدانگەرگە مىقتى دەنساۋلىق پەن ۇزاق ءومىر تىلەدى.

«ەكىنشى دۇنيەجۇزىلىك سوعىسىنداعى جەڭىستە قازاقستاننان شىققان  قاھارمان جاۋىنگەرلەردىڭ وراسان زور ۇلەسى بار. سىزدەردىڭ قان مايداننىڭ الدىڭعى شەبىندەگى ەرلىكتەرىڭىزدىڭ، تىلداعى ەرەن ەڭبەكتەرىڭىزدىڭ ارقاسىندا قازاقستاندىقتاردىڭ بۇگىنگى ۇرپاعى كەلىسىم مەن بەيبىت ءومىر سۇرۋدە. بۇل وتان قورعاۋداعى وتانسۇيگىشتىكتىڭ، كوپۇلتتى تاتۋلىقتىڭ تەڭدەسسىز ۇلگىسى بولىپ تاريحتا جازىلىپ قالدى»،- دەدى اكىم.

مايدانگەر ءوزىن قۇتتىقتاي كەلگەن ايماق باسشىسىنا العىسىن ءبىلدىرىپ، ءوزىنىڭ اق باتاسىن بەردى. سونداي-اق، ءوڭىردىڭ وركەندەۋىنە، قارىشتاپ دامۋى جولىندا جاساپ جاتقان ەڭبەگىنە كوڭىلى تولاتىندىعىن جەتكىزدى.

ايتا كەتەيىك، سوعىس ارداگەرى 2 ۇل 6 قىز ءوسىرىپ، 19 نەمەرە، 10 شوبەرە ءسۇيىپ وتىر. مايدانگەر مۇراتالى تولەپبەرگەنۇلىنا 2014 جىلى مەملەكەت تاراپىنان شىمكەنت قالاسىنان پاتەر بەرىلگەن.