وڭتۇستىك قازاقستان وبلىسىندا 870 مىڭنان اسا  ازامات جالپى زەينەتاقى مەن ارنايى الەۋمەتتىك تولەم الادى. ولاردىڭ قارجى قاجەتتىلىگىنە اي سايىن 24،1 ملرد تەڭگە جۇمسالادى. بۇل تۋرالى  وڭىرلىك كوممۋنيكاسيالار قىزمەتىندە وتكەن بريفينگتە ق ر ەڭبەك جانە حالىقتى الەۋمەتتىك قورعاۋ مينيسترلىگى ەڭبەك، الەۋمەتتىك قورعاۋ جانە كوشى-قون كوميتەتىنىڭ وڭتۇستىك قازاقستان وبلىسى بويىنشا دەپارتامەنتىنىڭ باسشىسى ءاسيا تەمىربايەۆا مالىمدەدى

دەپارتامەنت باسشىسىنىڭ سوزىنشە، اعىمداعى  جىلدان باستاپ ارناۋلى مەملەكەتتىك جاردەماقى تولەمىنە وزگەرتۋلەر مەن تولىقتىرۋلار ەنگىزىلگەن.

«جىل باسىنان وبلىس كولەمىندە ارناۋلى مەملەكەتتىك جاردەماقى الۋشىلاردىڭ سانى 298 353ء-تى قۇراپ، وعان 2،3 ملرد تەڭگە كولەمىندە تولەم جۇرگىزىلگەن. بيىلدان باستاپ مۇنداي جاردەماقىنىڭ قۇرامىنان «التىن القا»، «كۇمىس القا» القالارىمەن ناگرادتالعان نەمەسە بۇرىن «باتىر انا» اتاعىن العان، I جانە II دارەجەلى «انا داڭقى» وردەندەرىمەن ناگرادتالعان كوپ بالالى انالارعا مەملەكەتتىك جاردەماقى ساناتى ءبولىنىپ، جەكە مەملەكەتتىك قىزمەت ءتۇرى بولىپ قوسىلدى. وسى اتالعان جاردەماقى بويىنشا 2018 جىلدىڭ ءبىرىنشى توقسانىندا 70 147 مەملەكەتتىك قىزمەت كورسەتىلدى»، - دەدى ءاسيا قۇرال قىزى.

سونداي-اق، دەپارتامەنت باسشىسى وسى جىلدان باستاپ كەزەڭ-كەزەڭىمەن ايەلدەردىڭ زەينەتكە شىعۋ جاسى ۇلعاياتىنىن ايتتى. 1960 جىلدىڭ 1 قاڭتارىندا تۋعان ايەل زەينەتكە 2018 جىلدىڭ 1 شىلدەسىندە، ياعني، 58،6 جاسىندا شىعادى. ەگەر ايەل 1960 جىلدىڭ 1 شىلدەسىندە دۇنيەگە كەلگەن بولسا، ونىڭ زەينەتكەرلىك جاسى 59 كەلەدى. سەبەبى، 2019 جىلدىڭ 1 قاڭتارىنا ونىڭ جاسى 58،6 تولعانىمەن، 2019 جىلى جالپى بەلگىلەنگەن زەينەتكەرلىك جاس 59-دى قۇرايدى.

ايتا كەتەيىك، 2018 جىلدىڭ 1 قاڭتارىنداعى جاعداي بويىنشا وبلىستا جالپى 234 924 زەينەتكەر بار. ولارعا 10 ملرد تەڭگە كولەمىندە زەينەتاقى تولەمى جۇرگىزىلگەن.