وڭتۇستىك قازاقستان وبلىسىندا 2018 جىلعى كوكتەمگى مەرزىمدە 2 مىڭعا جۋىق ازامات اسكەرگە اتتانادى. بۇل ەلىمىزدىڭ باسقا وڭىرلەرىمەن سالىستىرعاندا 2 نەمەسە 3 ەسەگە دەيىن ارتىق. بۇل تۋرالى بۇگىن وڭىرلىك كوممۋنيكاسيالار قىزمەتىندە وتكەن بريفينگتە وقو قورعانىس ىستەرى جونىندەگى دەپارتامەنتىنىڭ باستىعى، پولكوۆنيك ت.ءالىقۇلوۆ مالىمدەدى.

دەپارتامەنت باسشىسى اسكەرگە بارۋعا ۇمتىلاتىن جاستاردىڭ قاتارى ارتىپ كەلە جاتقانىن ايتادى.

«اسكەرگە سۇرانىپ تۇرعان جاستاردىڭ قاتارى وتە كوپ، ءبىزدى وسى جاعى قاتتى قۋانتادى. جالپى اسكەرگە شاقىرتۋ العان ازاماتتاردى ءتۇرلى سالاداعى اسكەري بولىمدەرگە توپتاستىرىپ جىبەرىپ وتىرامىز. ماسەلەن، ءقازىردىڭ وزىندە قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ شەكارا قىزمەتىنە 500-گە جۋىق، مەملەكەتتىك كۇزەت قىزمەتىنە 26 ازامات جونەلتىلدى. جالپى قازاقستان رەسپۋبليكاسىنىڭ قارۋلى كۇشتەرىنە 700-گە جۋىق، ۇلتتىق ۇلانعا 1000-عا تارتا اسكەرگە شاقىرىلۋشى جونەلتىلەدى»، - دەدى تالعات شىمكەنتباي ۇلى.

اۋداندىق، قالالىق مەديسينالىق كوميسسيالار دارىگەر-ماماندارمەن 100 پايىز جاساقتالعان. وبلىستىق قورعانىس ىستەرى جونىندەگى دەپارتامەنتىنىڭ مەديسينالىق باقىلاۋ كوميسسيالارى 144 دارىگەر-مامانمەن قامتىلعان. جالپى وڭىردە قالالىق، اۋداندىق قورعانىس ىستەرى جونىندەگى باسقارما، بولىمدەرىندە 15 مەديسينالىق كوميسسياسى جۇمىس ىستەيدى.

ايتا كەتەيىك، وبلىستىق جيناقتاۋ بەكەتى عيماراتىندا اسكەرگە شاقىرىلۋشىرعا ارنالعان 60 ورىندىق 10 بولمە، اسكەري بولىمدەردىڭ وكىلدەرىن ورنالاستىرۋعا ارنالعان 10 ورىندىق 2 بولمە بار. سونداي-اق، اسكەرگە شاقىرىلۋشىلارعا ارنالعان ءۇش مەزگىل تاماقتانۋ، شاش الۋ، جۋىنۋ بولمەلەرى ۇيىمداستىرىلعان.