وڭتۇستىك قازاقستان وبلىسىندا جەڭىستىڭ 73 جىلدىعىنا وراي مايدانگەرلەرگە قۇرمەت كورسەتىلدى. شىمكەنت قالاسىنداعى «وڭتۇستىك» قابىلداۋ ۇيىندە ارداگەرلەرگە ارناپ مەرەكەلىك داستارحان جايىلىپ، كونسەرتتىك باعدارلاما ۇسىنىلدى.

مەرەكەلىك جيىنعا قاتىسقان ايماق باسشىسى جانسەيىت تۇيمەبايەۆ پەن قالا اكىمى نۇرلان ساۋرانبايەۆ ەكىنشى دۇنيەجۇزىلىك سوعىسىنىڭ ارداگەرلەرى مەن تىل ەڭبەككەرلەرىنە سىي قۇرمەت جاساپ، بەيبىت ءومىر سىيلاعان اعا ۇرپاققا العىستارىن جەتكىزدى. بۇگىنگى ەلىمىزدىڭ وركەندەۋى مەن بىرلىكتىڭ بۇزىلماس قامالى وسىناۋ مەرەكەنىڭ جەمىسى، ارداگەرلەردىڭ ەرلىگى ەكەنىن ايتقان ءوڭىر باسشىسى   ارامىزدا جۇرگەن سوعىس ارداگەرلەرىنە ۇدايى قامقورلىق كورسەتۋ بۇگىنگى ۇرپاقتىڭ پەرزەنتتىك پارىزى ەكەنىن اتاپ ءوتتى.

«حالقىمىزدا «ەر - ەلىنىڭ قورعانى» دەگەن اتالى ءسوز بار. ءبىز وسىنداي جانداردىڭ ەرلىكتەرىنە ساي سىي-قۇرمەت كورسەتە وتىرىپ، ولاردان ونەگە الىپ وسەتىن جاس ۇرپاق وتانىنا ادال قىزمەت ەتەدى دەپ سەنەمىز. سىزدەردىڭ جانە ەرلىگىمەن ەسىمدەرى تاريحىمىزدا جازىلعان باتىر بابالاردىڭ الدىندا ولشەۋسىز قارىزدارمىز. ەلباسىمىز مايداننان ورالماعان جاۋىنگەرلەرىمىزدىڭ ەسىمدەرىن ماڭگى ەل ەسىندە ساقتاۋدا جانە ارامىزدا جۇرگەن ارداگەرلەرىمىز بەن تىل ەڭبەككەرلەرىن ارداقتاۋدا ءارقاشان مەملەكەتتىڭ قامقورلىعى بولاتىنىن ايتىپ، جارقىن باستامالارعا جول اشىپ كەلەدى. سوندىقتان دا اقتاڭداق جىلدارداعى ەل ازاماتتارىنىڭ جاۋجۇرەكتىلىگى مەن تىل ەڭبەككەرلەرىنىڭ ەرەن ەڭبەكتەرىنە ءبىز ءاردايىم قۇرمەتپەن باس يەمىز»،-دەدى وبلىس اكىمى.

سونىمەن قاتار مەرەكەلىك كەزدەسۋ بارىسىندا وبلىستىق جانە قالالىق ارداگەرلەر كەڭەسىنىڭ ءتوراعالارى مەن مايدان جانە تىل ارداگەرلەرى ءسوز سويلەپ، قازىرگى كەزدە مەملەكەت تاراپىنان كورسەتىلىپ جاتقان قۇرمەت، قولداۋلارعا ريزاشىلىقتارىن ءبىلدىردى. شارا كونسەرتتiك باعدارلامامەن ءوز جالعاسىن تاپتى.

ايتا كەتەيىك، مايدانعا وڭىردەن 140 مىڭنان استام ادام اتتانىپ، ولاردىڭ جارتىسىنا جۋىعى تۋعان جەرگە ورالماعان. ءىى دۇنيەجۇزىلىك سوعىستا جانقيارلىق ەرلىگى ءۇشىن وڭتۇستىكقازاقستاندىق 51 ارداگەر كەڭەس وداعىنىڭ باتىرى اتاعى، 8 مايدانگەر «داڭق» وردەنىنىڭ يەگەرى اتاندى. جاۋجۇرەك قايسارلىعى ءۇشىن مىڭداعان ارداگەرلەرىمىز ءتۇرلى وردەن، مەدالدارمەن ماراپاتتالدى. بۇگىنگى تاڭدا وبلىستا 174 سوعىس ارداگەرى، 4885 مايدانعا قاتىسۋشىلار مەن مۇگەدەككە تەڭەستىرىلگەندەر جانە 15 733 تىل ەڭبەككەرلەرى بار.