وڭتۇستىك قازاقستان وبلىسىندا 2018 جىلدىڭ قاڭتار-اقپان ايىندا سىرتقى ساۋدا اينالىمىنىڭ كولەمى 478،7 ملن اقش دوللارىن قۇراعان. ونىڭ ىشىندە ەكسپورت 224،8 ملن اقش دوللارعا جەتىپ وتىر.

بۇل تۋرالى وبلىس اكىمى جانسەيىت تۇيمەبايەۆ سەلەكتورلىق رەجيمدە وتكەن ۇكىمەتتىڭ وتىرىسىندا ءمالىم ەتتى.

ءوز بايانداماسىندا ايماق باسشىسى بيىلعى جىلى شەتەل نارىعىنا شىعارىلعان ونىمدەردىڭ ىشىندە 168 ملن. اقش دوللارى بولاتىن تاۋار وڭدەۋ ونەركاسىبىنىڭ ءونىمى ەكەنىن اتاپ ءوتتى.

«قازاقستان رەسپۋبليكاسىنىڭ ۇلتتىق ەكسپورتتىق ستراتەگياسى» باعدارلاماسىن ىسكە اسىرۋ جونىندەگى ءىس-شارالار جوسپارىنىڭ 11 تارماعىن ورىنداۋ ماقساتىندا ەكسپورتتىق الەۋەتى بار وندىرىستەردى قولداۋ جانە وڭىردەگى كاسىپورىنداردىڭ ەكسپورت كولەمىن ارتتىراتىن تەحنولوگيالاردى ەنگىزۋ بويىنشا ءىس-شارالار جوسپارى بەكىتىلگەن. باعدارلاما ەكسپورتتىڭ الەۋەتىن ارتتىرۋعا، قازاقستاندىق تاۋار وندىرۋشىلەردىڭ ءونىمىن سىرتقى نارىققا شىعارۋعا قولايلى جاعداي جاساۋ، سالاعا باعىتتالعان ءوندىرىستى دامىتۋعا مۇمكىندىك بەرەدى»، - دەدى جانسەيىت تۇيمەبايەۆ.

بۇدان بولەك، اكىم ەكسپورتتىق الەۋەتتى ۇلعايتۋ ماقساتىندا وبلىسقا يران، بىرىككەن اراب امىرلىكتەرى، كاتار جانە ساۋد ارابياسى مەملەكەتتەرىنە جاقىن ەكەندىگىن ەسكەرە وتىرىپ، ءوڭىردىڭ ەت ونىمدەرىن وڭدەۋشى كاسىپورىندارىن «حالال» ستاندارتى تالاپتارىنا سايكەس اككرەديتتەۋ، كەدەندىك توسقاۋىلداردى جويۋ، ەكسپورتتالۋشى ءتىرى سالماقتاعى جانە ەت ونىمدەرىن ساپالى جەتكىزۋ ءۇشىن ترانسپورتتىق ينفراقۇرىلىمدى جەتىلدىرۋ جۇمىستارى جۇرگىزىلەتىنىن ايتتى.

جالپى وڭتۇستىك قازاقستان وبلىسىنان ەكسپورتقا شىعارىلاتىن ونىمدەردىڭ باسىم كوپشىلىگى ترانسفورماتور، ناسوس، تىڭايتقىش جانە قۇرىلىس ماتەريالدارى، دارى-دارمەك پرەپاراتتارى، كىلەم جانە كىلەم بۇيىمدارى، توقىما بۇيىمدارى، ۇن، ۇندىك ەتى مەن ودان جاسالعان دايىن ونىمدەر.

سونىمەن قاتار، وبلىس اۋماعىندا ورنالاسقان 11 يندۋستريالىق ايماقتا 168،8 ملرد. تەڭگەنى قۇرايتىن 171 جوبا جۇزەگە اسىرىلۋدا. وندا 10 مىڭنان استام جۇمىس ورىندارىن اشۋ جوسپارلانۋدا.

قازىرگى تاڭدا 171 جوبانىڭ 75 جوباسى ىسكە قوسىلىپ، 4 مىڭنان استام جۇمىس ورنى قۇرىلىپ، بۇل جوبالارعا قۇنى 43،4 ملرد. تگ. ينۆەستيسيا تارتىلدى. اتالعان ايماقتا 2017 جىلى 5 جوبا 1900 توننا ءونىمدى 7،8 ملرد. تەڭگەگە ەكسپورتتاعان.