وڭتۇستىك قازاقستان وبلىسىندا سۋعا باتىپ بارا جاتقان 3 جاسار ءبۇلدىرشىندى ءورت ءسوندىرۋشى قۇتقارىپ قالعان بولاتىن. بايدىبەك اۋدانىنداعى № 10 ءورت ءسوندىرۋ ءبولىمىنىڭ جۇرگىزۋشىسىن بۇگىن ءوڭىردىڭ تجد باسشىلىعى ماراپاتتادى.

ايتا كەتەيىك، وقيعا 20 ساۋىردە بايدىبەك اۋدانىنداعى جامبىل اۋىلىندا بولعان ەدى. كەزەكتى ەڭبەك دەمالىسىنا شىققان اۋداندىق ءورت ءسوندىرۋ قىزمەتكەرى ەركىنبەك بەردىبەكوۆ سول اۋىلداعى شارۋا قوجالىعىنا كومەكتەسۋگە بارعان. جۇمىس ىستەپ جاتىپ ول ساسىق وزەنى بويىندا جىلاپ جۇگىرىپ بارا جاتقان كەلىنشەكتى كورىپ قالادى. سول ساتتە ول بىردەن بالانىڭ سۋعا كەتكەنىن تۇسىنگەن. ءورت ءسوندىرۋشى ويلانباستان وزەنگە سەكىرىپ، سۋدا اعىپ بارا جاتقان بالانى قۇتقارىپ قالدى. سۋعا تۇنشىعىپ قالعان بالانى جاعاعا شىعارىپ، وعان العاشقى مەديسينالىق كومەك كورسەتكەن. ءبۇلدىرشىندى اۆتوكولىگىمەن اۋىلداعى ەمحاناعا، كەيىننەن اۋداندىق اۋرۋحاناعا جەتكىزگەن. ءورت ءسوندىرۋشىنىڭ وسىناۋ ەرلىگى مەن دارىگەرلەردىڭ دەر كەزىندە كومەك كورسەتۋىنىڭ ارقاسىندا 3 جاسار راحىم ەسىمدى بالا امان قالدى.

ەسكە سالايىق، ون جىلدان استام ءورت ءسوندىرۋ سالاسىندا قىزمەت اتقارىپ كەلە جاتقان ازامات بۇعان دەيىن دە ايازدى كۇنى باسسەين سۋىنا باتقان ءجاسوسپىرىمدى قۇتقارىپ قالعان بولاتىن. قاشاندا ادامدارعا كومەك كورسەتۋدەن ايانبايتىن ءسوندىرۋشى بىرنەشە ماراپاتتارعا يە بولعان.