گەنەرال سابىر راحىموۆتىڭ تاشكەنتتەگى ەسكەرتكىشى بۇرىنعى ورنىنا قايتا قويىلاتىن بولدى. بۇل تۋرالى وزبەكستان رەسپۋبليكاسىنىڭ پرەزيدەنتى شاۆكات ميرزيويەۆ نامانگان وبلىسىنا قاراستى نارىن اۋدانىنداعى جيىن بارىسىندا مالىمدەدى.

اتالعان جيىندا كورشى ەلدىڭ مەملەكەت باسشىسى ەسكەرتكىشتى ورنىنا قايتارۋ تاريحي ادىلدىك بولار ەدى دەگەن پىكىرىن ءبىلدىرىپ كەتتى. ءارى بۇل شارۋانى 9 مامىرعا دەيىن بىتىرگەن دۇرىس بولاتىنىن اتاپ ءوتتى.

ايتا كەتەيىك، گەنەرال سابىر راحىموۆتىڭ ەسكەرتكىشى 2010 جىلدىڭ سوڭىنا دەيىن تاشكەنتتىڭ ورتالىعىنداعى المازار (بۇرىنعى سابىر راحىموۆ) اۋدانى اكىمدىگى عيماراتىنىڭ الدىندا تۇرعان بولاتىن. كەيىن سول كەزدەگى پرەزيدەنت يسلام كاريموۆتىڭ بۇيرىعىمەن قازاق گەنەرالىنا ورناتىلعان تاس ءمۇسىن عافۋر عۇلام اتىنداعى ساياباققا كوشىرىلگەن ەدى.

اۋدان اتىنىڭ وزگەرتىلۋى قوعامدى ءتۇرلى پىكىرتالاس تۋىنداتىپ، كوپشىلىكتىڭ تالقىسىنا ءتۇستى. عالىمدار مەن اۋدان وكىلدەرى جەرگىلىكتى تۇرعىنداردىڭ ءوتىنىشى بويىنشا تاريحي اتاۋدىڭ قايتا بەرىلگەنى دۇرىس دەگەن پىكىر ايتقان بولاتىن.

ايتا كەتەيىك، سابىر راحىموۆ 1902 جىلى وڭتۇستىك قازاقستان وبلىسىنىڭ قازىعۇرت اۋدانى، كوكىبەل اۋىلىندا دۇنيەگە كەلگەن. اكەسى ەرتە قايتىس بولىپ، جاس قالعان راحىموۆتى شەشەسى (وزبەك قىزى) وزبەكستانعا الىپ كەتكەن. 1922 جىلى سول جاقتان اسكەر قاتارىنا شاقىرىلعان. ەكىنشى دۇنيەجۇزىلىك سوعىس باستالعاندا پولك، كەيىن ديۆيزيا قولباسشىسى بولدى.

1941 جىلى شىلدەدە جاۋ قورشاۋىن بۇزىپ شىققانداعى باتىلدىعى ءۇشىن 2-رەت قىزىل تۋ وردەنىمەن ماراپاتتالىپ، پولكوۆنيك شەنىن الدى. ونىڭ ديۆيزياسى دونداعى روستوۆتا، كاۆكازدا ۇرىس جۇرگىزدى. بەلارۋستى، پولشانى ازات ەتۋگە قاتىستى. راحىموۆ لەنين، 4 رەت قىزىل تۋ، قىزىل جۇلدىز، 2-دارەجەلى سۋۆوروۆ وردەندەرىمەن، مەدالدارمەن ماراپاتتالعان. تاشكەنتتەگى باۋىرلاستار زيراتىنا جەرلەنگەن گەنەرال-مايور كەڭەس وداعىنىڭ باتىرى اتانعان.